ដេញតាមប្រព័ន្ធ GPS ចាប់បានទាំង២នាក់

ដេញតាមប្រព័ន្ធ GPS ចាប់បានទាំង២នាក់

ខេត្តកំពង់ឆ្នាំង ៖ យុវជន២នាក់ត្រូវបានសមត្ថកិច្ច ដេញរហូតចាប់បាន កាលពីវេលាម៉ោង១០ និង៣០នាទីព្រឹកថ្ងៃទី១៧ ខែសីហា ឆ្នាំ២០១៦ នៅចំណុចភូមិឃ្លាំងប្រាក់ សង្កាត់កំពង់ឆ្នាំង ក្រុងកំពង់ឆ្នាំង បន្ទាប់ពីជនទាំង២នាក់នោះ បានបើកទូរស័ព្ទដែលលួចបានបម្រុង យកទៅលក់ តែដោយសារទូរស័ព្ទនោះ មានភ្ជាប់ប្រព័ន្ធ GPS ក៏ត្រូវម្ចាស់ដឹងប្តឹងសមត្ថកិច្ច ឲ្យដេញចាប់ខ្លួនតែម្តង ។

លោក ពេជ រ៉ី នាយនគរបាលការិយាល័យ ព្រហ្មទ័ណ្ឌកម្រិតស្រាល នៃស្នងការដ្ឋាននគរបាលខេត្តកំពង់ឆ្នាំង បានឲ្យដឹងថា ជនសង្ស័យទាំង២នាក់ខាងលើ ម្នាក់ឈ្មោះ ផន លឹមហួត អាយុ១៦ឆ្នាំ មានទីលំនៅភូមិឃ្លាំងប្រាក់ សង្កាត់ប្អេរ និងម្នាក់ទៀតឈ្មោះ ទូច ពុទ្ធារ៉ា ឆវិទូ អាយុ២៤ឆ្នាំ មានទីលំនៅភូមិឡទឹកត្រី សង្កាត់កំពង់ឆ្នាំង ។ ចំណែកម្ចាស់ប្រាក់ និងទូរសព្ទ័ដៃ ឈ្មោះ ឌុច សុធី ភេទប្រុស អាយុ៣៨ឆ្នាំ មានទីលំនៅភូមិឃ្លាំងប្រាក់ដែរ ។

លោកបានបន្តថា កាលពីវេលារំលងអាធ្រាត្រា ឈានចូលថ្ងៃទី១៣ ខែសីហា មានចោរមួយក្រុមបានធ្វើ សកម្មភាពគាស់ផ្ទះ បុរសឈ្មោះ ឌុច សុធី ហើយលួចយកកាបូបដៃមួយ ដែលក្នុងនោះមានប្រាក់ អាមេរិកចំនួន ១,០៧៥ដុលា្លរ ប្រាក់ខ្មែរចំនួន៥០ម៉ឺនរៀល និងទូរសព្ទ័ដៃ២គ្រឿង ដែលនៅក្នុងទូរស័ព្ទ ទាំង២គ្រឿងនោះម្ចាស់បានភ្ជាប់ប្រព័ន្ធ GPS ហើយពេលដឹងថាបាត់ ម្ចាស់ទូរស័ព្ទបើក GPS ដើម្បីតាមដានរកមិនឃើញ ព្រោះចោរបានបិទទូរស័ព្ទដៃ នោះទៅហើយ ។

ក្រោយមកនៅព្រឹកថ្ងៃទី១៧ ខែសីហា ឆ្នាំ២០១៦ ម្ចាស់បានឃើញរលក សញ្ញាទូរស័ព្ទឡើងវិញ ទើបប្តឹងសមត្ថកិច្ចដេញ តាមចាប់ខ្លួនតែម្តង ហើយអ្វីដែលសំណាងទៀតនោះ ប្រាក់ទាំង ១,០៧៥ដុល្លារនៅទាំងអស់ បាត់តែប្រាក់ខ្មែរ ៥០ម៉ឺនរៀលប៉ុណ្ណោះ និងក្រៅពីនោះសមត្ថកិច្ច ដកហូតបានថ្នាំញៀន ម៉ាទឹកកក ២៦កញ្ចប់ទៀតផង ។

លោកប្រធាន ការិយាល័យបន្តថា ប្រាក់ចំនួន ១,០៧៥ដុល្លា និងទូរស័ព្ទដៃ ២គ្រឿង បានរៀបចំប្រគល់ឲ្យ ម្ចាស់ដើមវិញ ចំណែកជនសង្ស័យ បានប្រគល់ឲ្យការិយាល័យនគរបាលប្រឆាំង គ្រឿងញៀនដើម្បី កសាងសំណុំរឿងបញ្ជូនទៅ តុលាការតាមផ្លូវច្បាប់ ដោយចោទប្រកាន់ ២ករណីផ្សេងគ្នា ទី១ ពីបទអំពើលួច និងទី២ ពីបទរក្សាទុកនូវសារធាតុញៀនខុសច្បាប់ ៕

ប្រភព ៖ កោះសន្តិភាព

កំណត់ហេតុខ្មែរឡូត៖

គួររំលឹកដែរថា ដោយឡែកករណីមួយវិញទៀត យុវជនពីរនាក់បងប្អូនបង្កើត ត្រូវបានប្រជាពលរដ្ឋ ចាប់ខ្លួនប្រគល់អោយ នគរប៉ុស្តិ៍ទន្លេបាសាក់ ក្នុងករណីលួចទូរស័ព្ទជនបរទេស ក្នុងហាងចិនម៉ាម៉ាវង់ ស្ថិតនៅតាមផ្លូវ៣០៨ ក្រុម៣២ ភូមិ៦ សង្កាត់ទន្លេបាសាក់ ខណ្ឌចំការមន រាជធានីភ្នំពេញ ។

លោក ហ៊ាង ថារ៉េត អធិការរងខណ្ឌចំការមន បានបញ្ជាក់ថា ជនសង្ស័យទី១មានឈ្មោះ ថាន់ សុខជា ភេទប្រុស អាយុ២២ឆ្នាំ មុខរបររត់ម៉ូតូឌុប ស្នាក់នៅបន្ទប់ជួលភូមិតាង៉ូវ សង្កាត់និរោធ ខណ្ឌច្បារអំពៅត្រូវបង ប្រុសជនសង្ស័យទី២មានឈ្មោះ ថាន់ សុខចិន ភេទប្រុស អាយុ១៣ឆ្នាំ មុខរបរមិនពិតប្រាកដ ស្នាក់នៅជាមួយបងប្រុស។

តាមការសារភារពរបស់ឈ្មោះ ថាន់ សុខជា បាននិយាយថា ខ្លួនបានជិះម៉ូតូឌុបប្អូនប្រុស បានជិះម៉ូតូចេញពីផ្ទះ ក្នុងបំណងដើរលេងទេ តែមកដល់មុខហាងម្ហូបចិន ម៉ាវង់ ក៏ឃើញជនបរទេស មានស្រីប្រុសកំពុងផឹកស៊ី ក្នុងហាងចិននោះ បែកគំនិត ចង់បានទូរស័ព្ទដែលឃើញទុកចោលលើ តុ ខ្លួនក៏បានប្រាប់អោយ ប្អូនប្រុសចុះពីលើម៉ូតូ ដើរចូលទៅក្នុងហាង ឆ្លៀតឱកាសពេលជនបរទេស ទាំងនោះភ្លេចខ្លួន ក៏លូកយកទូរស័ព្ទមួយគ្រឿង រត់ចេញមករកបងដែលរង់ចាំនៅក្រៅ ប៉ុន្តែចៃដន្យត្រូវម្ចាស់ឃើញទាន់ ស្រែកផ្អើលឆោឡោឡើង ហើយដេញចាប់បានទាំង២នាកើបងប្អូន រួចប្រគល់អោយសមត្ថកិច្ចតែម្ដង ។

បច្ចុប្បន្នទាំងបងទាំងប្អូន ត្រូវបាននគរបាល ខណ្ឌចំការមន កសាងសំណុំឯកសារ ដើម្បីចាត់បញ្ជូនទៅតុលាការ ផ្តន្ទាទោស តាមផ្លូវច្បាប់៕