គាស់ផ្ទះទាំងថ្ងៃភ្លាត់ស្នៀត ត្រូវសមត្ថកិច្ចវាយខ្នោះ

គាស់ផ្ទះទាំងថ្ងៃភ្លាត់ស្នៀត ត្រូវសមត្ថកិច្ចវាយខ្នោះ

រាជធានីភ្នំពេញ ៖ ជនសង្ស័យជាមុខសញ្ញា គាស់ផ្ទះយ៉ាងសកម្មម្នាក់ ត្រូវបានកម្លាំងនគរបាលប៉ុស្តិ៍និរោធ សហការណ៍ជាមួយនគរបាលខណ្ឌច្បារអំពៅ ធ្វើការឃាត់ខ្លួនបានភ្លាមៗ ក្រោយពីជនសង្ស័យ បានធ្វើសកម្មភាពគាស់កញ្ចក់បង្អួចផ្ទះ ប្រជាពលរដ្ឋយកទ្រព្យសម្បត្តិ មានតម្លៃមួយចំនួន រួមទាំងអាវុធខ្លីមួយដើម ហើយព្យាយាមរត់គេចខ្លួន នៅចំណុចផ្ទះលេខ៥៩C ផ្លូវបេតុង ភូមិតាង៉ូវក្រោម សង្កាត់និរោធ ខណ្ឌច្បារអំពៅ កាលពីវេលាម៉ោង ១១និង០០នាទីព្រឹកថ្ងៃទី១១ ខែសីហា ឆ្នាំ២០១៦។

ជនសង្ស័យមានឈ្មោះ យូ ចិត្រា ភេទប្រុស អាយុ១៧ឆ្នាំ ជនជាតិខ្មែរ មុខរបរមិនពិតប្រាកដ ស្នាក់នៅភូមិស្វាយតាអុក សង្កាត់វាលស្បូវ ខណ្ឌច្បារអំពៅ។ លោកអនុសេនីយ៍ឯក ម៉ៅ សឿត អធិការរងនគរបាលខណ្ឌច្បារអំពៅ ទទួលជំនាញព្រហ្មទណ្ឌ ប្រាប់ឲ្យដឹងថា ម្ចាស់ផ្ទះជាជនរងគ្រោះមានឈ្មោះ ហាន់ សាលីម ភេទប្រុស អាយុ៣៥ឆ្នាំ ជនជាតិខ្មែរ មុខរបរមន្ត្រីរដ្ឋសភាជាតិ ស្នាក់នៅផ្ទះកើតហេតុ។

នៅវេលាម៉ោង៨ព្រឹក ថ្ងៃកើតហេតុ ជនរងគ្រោះបានចេញទៅធ្វើការបាត់ដូចសព្វដងដោយចាក់សោទ្វារ និងបង្អួចផ្ទះត្រឹមត្រូវ ពុំដែលមានការធ្វេសប្រហែសឡើយ លុះមកដល់វេលាកើតហេតុ ក៏លេចមុខជនសង្ស័យមកធ្វើសកម្មភាពគាស់យកទ្រព្យសម្បត្តិគាត់តែម្តង ទើបបង្កការភ្ញាក់ផ្អើលឡើង។

តាមចម្លើយសារភាព របស់ជនសង្ស័យឲ្យដឹងថា រូបគេធ្វើសកម្មភាព គាស់កញ្ចក់បង្អួចតែម្នាក់ឯងប៉ុណ្ណោះ ពុំមានគ្នីគ្នាឡើយ ដោយពេលនោះគេជិះម៉ូតូមួយគ្រឿងសង់កូរ៉េកញ្ចាស់ គ្មានស្លាកលេខ ក្នុងខ្លួនមានជាប់ម៉ាឡេតមកជាមួយ ឃើញបង្អួចផ្ទះរបស់ជនរងគ្រោះងាយស្រួលគាស់ ខណៈម្ចាស់ផ្ទះមិននៅផងនោះ ទើបរូបគេឈប់ម៉ូតូអែបក្បែរមាត់បង្អួច រួចទាញម៉ាឡេតចេញ ពីក្រោមកែបម៉ូតូ ធ្វើសកម្មភាពគាស់កញ្ចក់បង្អួច បានសម្រេចចូលទៅក្នុងផ្ទះ យកទ្រព្យសម្បត្តិ មានតម្លៃមួយចំនួន រួមទាំងអាវុធខ្លីមួយដើមចេញមក បានដោយសុវត្ថិភាព ហើយជិះរត់គេចមិនបាន ១គីឡូដីផង ក៏ត្រូវប្រជាពលរដ្ឋ រាយការណ៍ប្រាប់សមត្ថកិច្ច ចុះអន្តរាគមន៍ស្ទាក់ ឃាត់ខ្លួនបានភ្លាមៗផងដែរ។

សូមបញ្ជាក់ថា សម្ភារដែលជនសង្ស័យ គាស់យកបានសម្រេចរួមមាន អាវុធខ្លី១ដើម ម៉ាកប៉ារ៉ាបូលីមលេខ៩០០១១៥៥១ បង់កាំភ្លើង១មានគ្រាប់១១គ្រាប់ កាបូបដៃ៥ ខ្សែកកាឡៃមានដាំត្បូង៣ខ្សែ នាឡិកាដៃ៤គ្រឿង កាមេរ៉ាថតរូប១គ្រឿង ម៉ាកSonyពណ៌ទឹកប្រាក់ និងខ្សែកាសទូរស័ព្ទ១ផងដែរ។

យ៉ាងណាមិញ បច្ចុប្បន្នជនសង្ស័យ និងវត្ថុតាង ត្រូវបញ្ចូនទៅឃុំខ្លួនបណ្តោះអាសន្ននៅ អធិការដ្ឋាននគរបាលខណ្ឌច្បារអំពៅ រង់ចាំកសាងសំណុំរឿងបញ្ចូន ទៅតុលាការចាត់ការ ទៅតាមនីតិវិធីនៅពេលក្រោយ៕

ប្រភព ៖ កោះសន្តិភាព

កំណត់ហេតុខ្មែរឡូត៖

គួររំលឹកដែរថា ករណីមួយវិញទៀត កម្លាំងនគរបាលខណ្ឌច្បារអំពៅ បានធ្វើការស្ទាក់តាមចាប់ ជនសង្ស័យដែលធ្វើសកម្មភាព គាស់សោរ ទ្វារផ្ទះលួចម៉ូតូ នៅចំណុចផ្ទះជួល ភូមិចុងព្រែក សង្កាត់ព្រែកឯង ខណ្ឌច្បារអំពៅ នៅម៉ោង ១៥និង៣០នាទី ថ្ងៃទី១៥ ខែកក្កដា ឆ្នាំ២០១៦ កន្លងទៅ ។

លោក ម៉ៅ សឿត អធិការងខណ្ឌច្បារអំពៅ បានឲ្យដឹងថា ជនរងគ្រោះឈ្មោះ ថា លី ភេទស្រី អាយុ២៤ឆ្នាំ ជនជាតិខ្មែរ មុខរបរនៅផ្ទះ ស្នាក់នៅផ្ទះកើតហេតុ ។ ចំណែកជនសង្ស័យឃាត់ខ្លួនឈ្មោះ ជា ធឿន ភេទប្រុស អាយុ២៨ឆ្នាំ ជនជាតិខ្មែរ មុខរបរ មិនពិតប្រាកដ ស្នាក់នៅភូមិតាងៅ សង្កាត់និរោធ ខណ្ឌច្បារអំពៅ។

លោកអធិការរង បន្តថា មុនពេលកើតហេតុ ជនរងគ្រោះបានចាក់សោរផ្ទះជួលកើតហេតុខាងលើពីខាងក្រៅ រួចចេញទៅផ្សារ ពេលជនរងគ្រោះត្រឡប់មកវិញ ក៏ស្រាប់តែបាត់ម៉ូតូម៉ាក ហុងដាវ៉េវ ពណ៌ខ្មៅ ពាក់ស្លាកលេខ ភ្នំពេញ ១FV-១២១៧ ដែលទុក នៅក្នុងផ្ទះកើតហេតុ ពេលនោះជនរងគ្រោះនិងសមត្ថកិច្ចយើង បានឆែកកាម៉េរ៉េសុវត្ថភាពឃើញជនសង្ស័យឈ្មោះថា ធឿន និងបក្ខពួកឈ្មោះថា ថេន ជិះម៉ូតូម៉ាកស្កុបពី ពណ៌ស ពាក់ស្លាកលេខ កំពង់ស្ពឺ ១F៧៤៩៥ មក ធ្វើសកម្មភាពលួចម៉ូតូជនរងគ្រោះ ។

លុះដល់ម៉ោង១៨និង០០នាទីថ្ងៃដដែល សមត្ថកិច្ចនគរបាលខណ្ឌច្បារអំពៅ សហការជាមួយកងរាជអាវុធហត្ថក្រុងតាខ្មៅ ឃាត់ខ្លួនបានជនសង្ស័យម្នាក់ឈ្មោះ ថា ធឿន និងម៉ូតូជិះធ្វើ សកម្មភាពនៅភូមិតាខ្មៅ សង្កាត់តាខ្មៅ ក្រុងតាខ្មៅ ខេត្តកណ្តាល ប្រគល់ឲសមត្ថកិច្ចខណ្ឌច្បារអំពៅ ចាត់ការបន្ត ។

ចំណែកជនសង្ស័យម្នាក់ទៀតឈ្មោះ ថា ថេន បានជិះមូ៉តូជនរងគ្រោះគេចខ្លួនបាត់។ បច្ចុប្បន្នជនសង្ស័យឈ្មោះថា ធឿន ឃាត់ខ្លួន បណ្តោះអាសន្ន នៅអធិការដ្ឋាននគរបាលខណ្ឌ ច្បារអំពៅ ដើម្បីចាត់ការតាមនីតិវិធី ៕