ត្បូងឃ្មុំ ៖ ករណីជនវិកលចរឹក ចាប់ក្មេង​ប្រុស អាយុ៦ឆ្នាំ ត្រូវជាក្មួយ ចងភ្ជាប់នឹង​​សសរ ក្នុងផ្ទះ ស្ថិតនៅភូមិកញ្ចែ ឃុំ​ក​ក់ ស្រុកពញាក្រែក ខេត្តត្បូងឃ្មុំ នៅវេលាម៉ោង​ប្រមាណ ៤រសៀលថ្ងៃទី ២៩ ខែកក្កដា ឆ្នាំ២០១៤នោះ បានបញ្ចប់​ហើយ នៅវេលាម៉ោងពាក់​កណ្តាលអាធ្រាត្រ ប៉ុន្តែក្មេងប្រុស រងគ្រោះ បានស្លាប់ខណៈ​​កំពុងដឹកបញ្ជូន ទៅកាន់​មន្ទីរពេទ្យ ដោយសារ តែជនបង្ក បានកាប់ចំនួន​៣កាំបិត ។
ដោយឡែក ជនបង្ក ត្រូវបាន​សមត្ថកិច្ច បង្ខំចិត្ត បាញ់បណ្តាល​ឲ្យស្លាប់ ខណៈជននេះ​កំពុង រត់មកកាប់ ក្រុម​សមត្ថ​កិច្ច នៅក្រោមផ្ទះ ក្រោយពេលរូបគេ បានកាប់ក្មេង ប្រុសរងគ្រោះរួច​ហើយនោះ ។
ស្នងការនគរបាល ខេត្តត្បូងឃ្មុំ លោកឧត្តម​​សេនីយ៍ ម៉ៅ ពៅ បានមាន​​ប្រសាសន៍ថា ចាប់តាំង​ពីពេល ជនបង្ក បាន​ចាប់ក្មេងប្រុសរងគ្រោះ អាយុ៦ឆ្នាំ ចងភ្ជាប់នឹងសសរ នៅលើផ្ទះ កម្លាំងសមត្ថកិច្ច របស់លោក ទាំងថ្នាក់ខេត្ត និង​មូល​ហេតុ ព្រមទាំងប្រជាពលរដ្ឋ ជាច្រើននាក់ បានរកយុទ្ធវិធី ដើម្បីរំដោះ​ក្មេងប្រុស រងគ្រោះមកវិញ ខណៈជន​បង្កជាមនុស្សវិក​ល​​ចិរឹក ដ៏កាចសាហាវ ហើយមានកាំបិត​​នៅជាប់នឹងខ្លួនចំនួន២ គឺកាំបិត ខ្លី និងកាំបិតវែង តែ​មធ្យោបាយ មួយចំនួន មិនបានធ្វើឲ្យជនបង្ក ព្រមប្រគល់​ក្មេងប្រុស រងគ្រោះមក​​វិញឡើយ។
ស្នងការនគរបាល បានបន្ត​​ទៀតថា កម្លាំងសមត្ថកិច្ច និងក្រុមការងារ ដែលជួយ​​សង្គ្រោះនោះ បានដាក់​ថ្នាំងងុយដេក នៅក្នុងទឹកសុទ្ធ និងកូកា បោះឲ្យវាផឹក តែវាមិនព្រមផឹកទៀត ហើយប្រជាពលរដ្ឋ នៅជិតខាង និងម្តាយក្មេងប្រុស រងគ្រោះ បានទៅស្រែក​​សុំអង្វរ ឲ្យជននេះដោះលែង ក្មេងប្រុសរង​​គ្រោះមកវិញ តែជននេះមិនព្រម ។
ប្រតិបត្តិការ បានបន្តរហូតដល់យប់ និងមានការ​​ចូលរួម ពីមេបញ្ជាការ ក្រុមខ្លាហោះ របស់អគ្គស្នងការ នគរបាលជាតិ ចុះទៅកាន់ កន្លែងកើតហេតុ ដើម្បីជួយយុទ្ធវិធី រំដោះក្មេង​ប្រុសរងគ្រោះ ។
បើតាម លោក ម៉ៅ ពៅ ផែនការទី១​​នោះ គឺក្រុមការងារ បានប្រើប្រាស់​​កម្លាំង នគរបាលចំនួន៤នាក់ ចុះទៅចាប់​សង្គ្រប់ ជនបង្ក ប៉ុន្តែត្រូវជននេះ​​កាប់មកលើកម្លាំង នគរបាល បណ្តាលឲ្យ រងរបួសទៀត។
ភ្លាមៗនោះ ក្រុមសមត្ថកិច្ច បានចុះពីលើ​​ផ្ទះមកវិញ ដើម្បីរកផែនការទី២ ដើម្បីដោះស្រាយ ប៉ុន្តែនៅពេលកំពុ​ង​គិតរក​នោះ ជនបង្ក បានធ្វើសកម្មភាព កាប់ទៅលើ​ក្មេងប្រុសរងគ្រោះ ចំនួន៣កាំបិត មួយកាំបិ​តត្រង់ភ្លៅ មួយកាំបិតត្រង់ដៃ ខាងស្តាំ និងមួយកាំបិតត្រង់កញ្ចឹង ក ។
ដោយឃើញស្ថានភាពបែបនេះ កម្លាំង​សមត្ថកិច្ច បានបង្ខំចិត្ត​បាញ់ថ្នាំសន្លប់​ទៅលើ ជនបង្ក ប៉ុន្តែដោយសារ​តែរូប​គេមានកម្លាំងខ្លាំង ក៏មិនអាច​​សន្លប់ទៀត ក៏រត់ចុះមកក្រោមដេញ កាប់សមត្ថកិច្ច​​ជាហេតុធ្វើឲ្យសមត្ថកិច្ច ការពារខ្លួន​បាញ់ទៅលើជនបង្ក បណ្តាល​​ឲ្យស្លាប់តែម្តង ។ ដោយឡែក ក្មេងប្រុសរងគ្រោះ ត្រូវបានសមត្ថកិច្ច ប្រជាពលរដ្ឋ និងម្តាយរបស់​គេជួយដឹកភា្លមៗ ទៅកាន់មន្ទីរពេទ្យ តែដោយសារ​ស្ថានភាព របួសខ្លាំងពេក ក៏ដាច់ស្លាប់នៅ​តាមផ្លូវ​តែម្តង។
សូមបញ្ជាក់ថា ជនបង្ក អាយុ១៩ឆ្នាំ ជាមនុស្ស វិកលចរឹក ដែលមានម្តាយ​អាយុ៥០ឆ្នាំ ក៏ជាមនុស្សបែប​នេះដែរ រីឯ​ប្អូនស្រី អាយុ១៦ឆ្នាំ ជាមនុស្សជានា តែត្រូវបងប្រុសធ្វើបាប​ជាច្រើនលើក ជាច្រើនសារ ។ ដោយឡែក ក្មេង​ប្រុស​រងគ្រោះ ត្រូវជាក្មួយរបស់ជន​បង្កផងដែរ។ បច្ចុប្បន្ន សពក្មេងប្រុស​រងគ្រោះ និងសពជនបង្ក ត្រូវបាន​សមត្ថកិច្ច ប្រ​គល់ជូន ក្រុមគ្រួសារ យកទៅធ្វើ​បុណ្យតាមប្រៃណី៕

សពក្មេងប្រុសរងគ្រោះដែលស្លាប់ និងស្រ្តីជាម្តាយ យំស្តាយស្រណោះកូនប្រុស

សពជនបង្កជាមនុស្សវិកលចរឹក ដែលសមត្ថកិច្ចបង្ខំចិត្តបាញ់បណ្តាលឲ្យស្លាប់

ស្នងការខេត្តត្បូងឃ្មុំលោក ម៉ៅ ពៅ កំពុងសួរស្រ្តីជាម្តាយក្មេងប្រុសរងគ្រោះពីអត្តចរឹករបស់ជនបង្ក

ស្នងការខេត្តត្បូងឃ្មុំ កំពុងពិភាគក្សាជាមួយ មេបញ្ជាក្រុមខ្លាហោះ របស់អគ្គស្នងការនគរបាលជាតិ រកវិធីរំដោះក្មេងប្រុសរងគ្រោះ

(ប្រភព៖ដើមអម្ពិល)