បើកលឿនមិនប្រយ័ត្ន រេចង្កូតបុកម៉ូតូពេញទំហឹងស្លាប់៣នាក់

បើកលឿនមិនប្រយ័ត្ន រេចង្កូតបុកម៉ូតូពេញទំហឹងស្លាប់៣នាក់

ខេត្តបាត់ដំបង ៖ នៅថ្ងៃទី១០ ខែសីហា ឆ្នាំ២០១៦ វេលាម៉ោង៦និង០០នាទីល្ងាចមុននេះ មានករណីគ្រោះថ្នាក់ចរាចរណ៍មួយ នៅចំណុចក្រុម៣ ភូមិកញ្ចាំង ឃុំស៊ុង ស្រុកសំឡូត ខេត្តបាត់ដំបង។

តាមការបំភ្លឺពី សមត្ថកិច្ចបានឲ្យដឹងថា មូលហេតុនៃករណីគ្រោះថ្នាក់ចរាចរណ៍នេះ ដោយអ្នកបើកបរ ប្រើប្រាស់ល្បឿនលឿន ទំនងបែបស្រវឹងផង ទើបគ្រប់គ្រងស្ថានការណ៍មិនបាន។

ខណៈផ្លូវដែលចិនចាក់ដី ខ្ពស់ទាបផងនោះធ្វើឲ្យរថយន្ដ បង្ករេចង្កូតទៅខាងឆ្វេងបណ្តាលឲ្យរថយន្តជ្រុលមកបុកនឹងម៉ូតូ ដែលបើកបរបញ្ច្រាសទិសគ្នារវាងរថយន្តនឹងម៉ូតូបណ្តាលឲ្យ ស្លាប់មនុស្ស៣នាក់ និងរបួសធ្ងន់ស្រាល៦នាក់ ហើយរថយន្តបង្ករអិលក្រឡាប់ធ្លាក់ផ្លូវចូលស្នាមភ្លោះ។

ជនរងគ្រោះទាំង ៣នាក់ ដែលជិះម៉ូតូម៉ាក ហុងដា សេ១២៥ ស៊េរី១០១២ ពណ៌ខ្មៅ មានទី១-ឈ្មោះ ហ៊ីង សុទីន ភេទស្រី អាយុ ២៣ឆ្នាំ ជនរងគ្រោះទី២- ឈ្មោះ រស់ សុឃៀ ភេទស្រី អាយុ ២៣ឆ្នាំ ជនរងគ្រោះ ទី៣-ឈ្មោះ អេន សុរ៉ា ភេទស្រី អាយុ ៣ឆ្នាំ ជាកូនបង្កើតរបស់ រស់ សុឃៀ អ្នកទាំង៣នាក់ មានទីលំនៅរស់នៅ កន្លែងកើតហេតុខាងលើ ។

ចំណែកឯភាគីបង្កឈ្មោះ ស្នា មិនស្គាល់ត្រកូល ភេទប្រុស អាយុ ២៧ឆ្នាំ ជាអ្នកបើកបររថយន្ដម៉ាក ណាវ៉ារ៉ា ពណ៌ស ពាក់ស្លាកលេខ ភ្នំពេញ AE-0700 រស់នៅស្រុកមោងឬស្សី ក្នុងនោះជនរងគ្រោះជាអ្នករួមដំណើរទាំង៦នាក់បានបញ្ចូនទៅមន្ទីពេទ្យ។

បច្ចុប្បន្នសមត្ថកិច្ចជំនាញ បានប្រមូលវត្ថុតាងយកមករក្សាទុក នៅអធិការស្រុកសំឡូត រង់ចាំភាគីទាំងសងខាង ចូលខ្លួនមកដោះស្រាយ ទៅតាមផ្លូវច្បាប់៕

ប្រភព ៖ កោះសន្តិភាព

កំណត់ហេតុខ្មែរឡូត៖

គួររំលឹកព័ត៌មានចាស់ដែរថា រថយន្តកុងតឺន័រមួយគ្រឿង បើកក្នុងល្បឿនលឿន និងគៀរទៅលើ ម៉ូតូរបស់យុវជន២នាក់ ដែលកំពុងឈរជជែកគ្នា លើសួនច្បារកណ្តាល ទ្រូងផ្លូវបណ្តាលអោយដួល ហើយកិនលើយុវជនម្នាក់ បែកក្បាលធ្លាយខួរ ស្លាប់ភ្លាមៗនៅនឹងកន្លែង យ៉ាងអាណោចអាធម៌បំផុត ។

ហេតុការណ៍គ្រោះ ថ្នាក់ចរាចរណ៍ដ៏ គួរអោយរន្ឋត់នេះ បានកើតឡើង កាលពីវេលាម៉ោង ១០និង ២០នាទី យប់ថ្ងៃទី៣០ ខែវិច្ឆិកា ឆ្នាំ២០១៥ កន្លងទៅ នៅចំណុចមុខធនាគារសួនវឌ្ឍន តាមបណ្តោយផ្លូវ វេងស្រេង ស្ថិតក្នុងភូមិតំណាក់ធំ៣ សង្កាត់ស្ទឹងមានជ័យ ខណ្ឌមានជ័យ។

ជនរងគ្រោះមានឈ្មោះដួង សុភាព ភេទប្រុស អាយុ២៨ឆ្នាំ មុខរបរជាកម្មកររោងចក្រ បច្ចុប្បន្ន ស្នាក់នៅផ្ទះជួលផ្សារឯករាជ្យ១ ស្ថិតក្នុងសង្កាត់ចោមចៅ ខណ្ឌពោធិ៍សែនជ័យ។

សេចក្តីរាយការណ៍ នៅកន្លែងកើតហេតុ បានអោយដឹងថា មុនពេលកើតហេតុគេបាន ឃើញយុវជន២នាក់ជិះម៉ូម៉ាក FTR ពណ៍ស មិនចាំស្លាកលេខ ជិះមកតាមបណ្តោយផ្លូវវេងស្រង ទិសដៅពីកើតទៅលិច ពេលទៅដល់កន្លែងកើហេតុបានឈប់ម៉ូតូ រួចនាំគ្នាឈរនិយាយគ្នា លេងនៅលើសួនទ្រូងផ្លូវ ។ លុះមួយសន្ទុះក្រោយមកស្រាប់តែមានរថយន្តកុងតឺន័រមួយគ្រឿង បើកក្នុងល្បឿនយ៉ាងល្បឿនមកគៀរជនរងគ្រោះបណ្តាលអោយដួល និងកិនបែកក្បាល ធ្លាយខួរស្លាប់នៅក្នុងធ្លុកឈាមយ៉ាងអាណោចអាធម៍ ហើយរថយន្តបង្កបាន ព្យាយាមបើក បន្ថែមល្បឿនគេចខ្លួនមិនទទួលខុសត្រូវ ។ ប៉ុន្តែត្រូវសមត្ថកិច្ចដេញ ឃាត់បានទាំងរថយន្តនិង អ្នកបើកបរក្នុងទឹកដីសង្កាត់សំរោងក្រោម។

ក្រោយកើតហេតុ សមត្ថកិច្ចជំនាញបានចុះមកដល់កន្លែងកើតហេតុដើម្បីធ្វើការវាស់វែង និងយករថយន្ត ព្រមទាំងអ្នកបើករថយន្តបង្ក ទៅការិយាល័យចរាចរណ៍ នៃស្នងការដ្ឋាន នគរបាលរាជធានីភ្នំពេញ រង់ចាំដោះស្រាយតាមផ្លូវច្បាប់ ចំណែកសពជនរងគ្រោះ សមត្ថកិច្ចប្រគល់អោយក្រុមគ្រួសារ យកទៅធ្វើបុណ្យតាមប្រពៃណី៕