ក្លិបមីតណាយ បាត់ម៉ូតូភ្ញៀវហើយមិនទទួលខុសត្រូវ

ក្លិបមីតណាយ បាត់ម៉ូតូភ្ញៀវហើយមិនទទួលខុសត្រូវ

រាជធានីភ្នំពេញ ៖ ម៉ូតូស៊េរីទំនើប១គ្រឿង ដែលបុរសម្នាក់ជិះទៅផឹកស៊ី នៅក្នុងក្លិបឌីស្កូមីត ណាយ ហើយបានដាក់ផ្ញើក្រុមសន្តិសុខក្លិបខាងលើ ដោយមានទាំងសំបុត្រផ្ញើយ៉ាងត្រឹមត្រូវផងនោះ ត្រូវបានក្រុមចោរលួចយកទៅបាត់ ហើយពេលម្ចាស់ចេញពីក្លិបមកវិញ ទាំងសន្តិសុខរួមនិងម្ចាស់ក្លិបផង សុទ្ធតែឆ្លើយថា មិនដឹង និងមិនចេញសងទៀត ។

ទើបម្ចាស់ម៉ូតូធ្វើដំណើរទៅកាន់ប៉ុស្ដិ៍នគរបាលចោមចៅ ដើម្បីដាក់ពាក្យបណ្ដឹងសុំឲ្យនគរបាលជួយអន្តរាគមន៍ កាលពីវេលាម៉ោង៩ព្រឹក ថ្ងៃទី៧ សីហា ២០១៦។

បុរសម្ចាស់ម៉ូតូខាងលើនោះ ឈ្មោះ ឃុត ចំរើន អាយុ២៦ឆ្នាំ មុខរបរកម្មកររោងចក្រ និងមានស្រុកកំណើតភូមិតាមុំ ឃុំតាភេម ស្រុកត្រាំកក់ ខេត្តតាកែវ និងមានប្រពន្ធឈ្មោះ ម៉ាប់ សេងហ៊ាន់ អាយុ២២ឆ្នាំ មុខរបរកម្មការិនីរោងចក្រប្លេតធី ស្រុកកំណើតនៅក្នុងភូមិទ្រាន ឃុំទ្រាន ស្រុកកំពង់សៀម ខេត្តកំពង់ចាម។ បាត់ម៉ូតូ១គ្រឿងម៉ាកហុងដាឌ្រីម សេ១២៥ ស៊េរីឆ្នាំ២០១៦ ពណ៌ខ្មៅ ពាក់ស្លាកលេខភ្នំពេញ 1FW-1192។

តាមប្រភពព័ត៌មានបានឲ្យដឹងថា នៅមុនពេលកើតហេតុ បុរសម្នាក់នោះបាននាំប្រពន្ធ និងមិត្តភក្ដិរបស់ខ្លួន២នាក់ទៀត ចូលទៅផឹកស៊ី និងរាំលេងនៅក្នុងក្លិបឌីស្កូមីតណាយ ដែលមានទីតាំងស្ថិតនៅតាមផ្លូវវេងស្រេង ក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ។

ដោយពេលទៅដល់បានផ្ញើម៉ូតូនៅកន្លែងទទួលបញ្ញើនៅក្នុងក្លិបនោះ ដោយមានសន្តិសុខមើលការខុសត្រូវ ហើយក្រុមសន្តិសុខនោះ បានឲ្យសំបុត្រផ្ញើម៉ូតូ និងទុកលុយថ្លៃផ្ញើចំនួន១.៥០០រៀលថែមទៀតផង

បន្ទាប់ពីដាក់ផ្ញើរួចរាល់ ក៏បាននាំគ្នាចូលទៅផឹកស៊ីនៅខាងក្នុង រហូតដល់វេលាម៉ោង១១និង៣០នាទីយប់ថ្ងៃដដែល ទើបនាំគ្នាចាកចេញពីក្លិប ក្នុងបំណងត្រឡប់ទៅផ្ទះវិញ ប៉ុន្តែពេលទៅដល់ ស្រាប់តែបាត់មិនឃើញម៉ូតូ ក៏បានសួរនាំសន្តិសុខ ហើយត្រូវបានសន្តិសុខប្រាប់ថា ឲ្យរង់ចាំដល់ពេលអស់ភ្ញៀវសិន ខណៈនោះជនរងគ្រោះបានរង់ចាំតាមបញ្ជារបស់ក្រុមសន្តិសុខទាំងនោះ រហូតដល់ជិតភ្លឺនៅតែមិនឃើញម៉ូតូរបស់ខ្លួនទៀត ទើបនៅវេលាម៉ោង៩ព្រឹក ថ្ងៃទី៧ សីហា ជនរងគ្រោះបានដាក់ពាក្យប្ដឹងឲ្យនគរបាលប៉ុស្ដិ៍ចោមចៅជួយអន្តរាគមន៍តែម្ដង៕

ប្រភព ៖ កោះសន្តិភាព

កំណត់ហេតុខ្មែរឡូត៖

គួររំលឹកដែរថា ដោយឡែកករណីមួយវិញទៀត កាលពីវេលាម៉ោង ៥និង៣០នាទីល្ងាច ថ្ងៃទី៣០ ខែឧសភា ឆ្នាំ ២០១៦ កន្លងទៅ នៅស្ថានីចាក់ប្រេងតេលា តាមបណ្ដោយផ្លូវឧកញ៉ា ម៉ុង ឬទ្ធី ស្ថិតក្នុងភូមិបាយាប សង្កាត់ភ្នំពេញថ្មី ខណ្ឌសែនសុខ មានចោរលួចកាច់សោកម៉ូតូបានសម្រេច ហើយគេចខ្លួនដោយសុវត្ថិភាព ។

តាមប្រភពព័ត៌មានពីជនរងគ្រោះបានឲ្យដឹងថា រូបនាងឈ្មោះ ទាវ រ៉ាវី អាយុ២០ឆ្នាំ ស្នាក់នៅភូមិច្រេះ សង្កាត់ភ្នំពេញថ្មី ខណ្ឌសែនសុខ ដែលមានស្រុកកំណើតនៅខេត្តក្រចេះ ។

នារីរងគ្រោះបានឲ្យដឹងទៀតថា ម៉ូតូដែលនាងជិះមកសម្ភាសការងារ ហើយត្រូវចោរលួចយកទៅបាត់នោះ តាមពិតជាម៉ូតូខ្ចីគេទេ ដែលម្ចាស់ម៉ូតូនៅបន្ទប់ជួលជាប់គ្នា ហើយគេឲ្យមកជួយយកកូនគេចេញពីរៀន ។

ម៉ូតូនោះជាកម្មសិទ្ធិ ឈ្មោះ លឿម លាក ដែលមានអាសយដ្ឋាននៅភូមិគោកត្របែក ឃុំគោកដូង ស្រុកអង្គរជុំ ខេត្តសៀមរាប ជាម៉ូតូហុងដាវ៉េវ សេ១០០ ពណ៌ខ្មៅ ពាក្យស្លាកលេខ សៀមរាប 1R-1476 ។

នារីរងគ្រោះបានបន្ថែមទៀតថា មុនពេលកើតហេតុ រូបនាងត្រូវបានម្ចាស់ម៉ូតូដែលស្នាក់នៅបន្ទប់ជាប់គ្នា ពឹងពាក់ឲ្យទៅជួយយកកូនគាត់នៅសាលារៀន តែនាងឆ្លើយថា ជាប់រវល់ប្រញាប់ទៅសម្ភាសការងារ ហើយម្ចាស់ម៉ូតូក៏ប្រាប់ថា ឲ្យយកម៉ូតូគាត់ទៅអញ្ចឹង ។

ក្រោយពីជូនកូនម្ចាស់ម៉ូតូដាក់ផ្ទះហើយ នាងប្រញាប់ទៅកន្លែងសម្ភាសការងារ ដូចអាសយដ្ឋានខាងលើ ក្រោយពីរូបគេបានចូលក្នុងបន្ទប់សម្ភាសប្រមាណជា២០នាទី ពេលចេញមកវិញស្រាប់តែបាត់ម៉ូតូតែម្ដង ធ្វើឲ្យនាងស្រឡាំងកាំង និងតក់ស្លុតជាខ្លាំងព្រោះជាម៉ូតូគេផង ។

ឃើញហេតុការណ៍បែបនោះ សន្តិសុខដែលនៅចាក់សាំងជិតនោះបានប្រាប់ថា ឃើញមនុស្សប្រុសម្នាក់ជិះចេញទៅបាត់ហើយ ។ ភ្លាមៗនោះដែរនារីរងគ្រោះ បានជិះម៉ូតូឌុប ទៅដាក់ពាក្យបណ្ដឹងនោប៉ុស្ដិ៍រដ្ឋបាល សង្កាត់ភ្នំពេញថ្មីដែរ តែខាងសមត្ថកិច្ចប្រាប់ថា គេកំពុងជាប់រវល់ ចាំព្រឹកស្អែកចាំមកម្ដងទៀត ។ នារីរងគ្រោះក៏ជិះម៉ូតូឌុបតម្រង់មកផ្ទះវិញ ទាំងក្តីអស់សង្ឃឹមបំផុត ៕