(កំពង់ស្ពឺ)៖ រថយន្តដឹកកម្មករកាត់ដេរមួយគ្រឿង បានក្រឡាប់ នៅតាមផ្លូវជាតិលេខ៥១ ចន្លោះគីឡូម៉ែត្រលេខ១២-១៣ ភូមិស្ដុកស្លាត ឃុំភ្នំតូច ស្រុកឧដុង្គ នាព្រឹកថ្ងៃទី៣ ខែសីហា ឆ្នាំ២០១៦នេះ បានបណ្តាលឲ្យរងរបួសចំនួន៣៣នាក់ ក្នុងនោះរបួសធ្ងន់ចំនួន១២នាក់។

លោក ចឹក បូរិន ប្រធានមន្ទីរការងារខេត្តកំពង់ស្ពឺ បានប្រាប់ភ្នាក់ងារ Fresh News ថា ជនរងគ្រោះដែលរងរបួសធ្ងន់ធ្ងរ៥នាក់ ត្រូវបានបញ្ជូនទៅកាន់មន្ទីរពេទ្យកាល់ម៉ែត។

សមត្ថកិច្ចមូលដ្ឋាន បានបញ្ជាក់ថា មុនពេលកើតហេតុ រថយន្តម៉ាកហីុយ៉ានដាយ បើកដឹកកម្មករ ទិសដៅពីជើងទៅត្បូង លុះដល់ចំណុចខាងលើបានគេចរថយន្តដឹកថ្មឆ្លងផ្លូវ បណ្ដាលឲ្យក្រឡាប់ចាក់កម្មករទៅលើផ្លូវតែម្តង៕

ប្រភព ៖ Fresh News

កំណត់ហេតុខ្មែរឡូត៖

ដោយឡែក រំលឹកព័ត៌មានចាស់លើកមុនផងដែរថា  កាមរីក្រឡាប់ ផ្ងារជើង របួសធ្ងន់៦នាក់ នៅស្រុកលំផាត់គួររំលឹកផងដែរថា មនុស្ស៦នាក់ ដែលក្នុងនោះ មានស្រីចំនួន៣នាក់ បានរងរបួសធ្ងន់ ខណៈដែលរថយន្តកាមរី ដែលពួកគាត់បានជិះនោះ ក្រឡាប់ផ្ញារជើង កាលពីថ្ងៃទី២ ខែសីហា  កន្លងទៅថ្មីៗនេះ នៅផ្លូវជាតិលេខ៧៦ ត្រង់ចំណុចភូមិ ស្រែឈូក ឃុំជ័យឧត្តម ស្រុកលំផាត់ ខេត្តរតនគិរី ។

បើតាមសាក្សីនៅកន្លែង កើតហេតុបានឲ្យដឹងថា ជនរងគ្រោះទាំងអស់មាន​ ចំនួន៦នាក់ ក្នុងនោះមានស្រី៣នាក់ ឯអ្នកបើកបរឈ្មោះ ញេន តៃយ៉ា ភេទប្រុស អាយុ២៥ឆ្នាំ មុខរបរជាកសិករ មានទីលំនៅក្នុងភូមិ គោកក្រសាំង ឃុំគោកគូងកើត ស្រុកកញ្ជ្រៀច ខេត្តព្រៃវែង ឯសំភារៈដែលខូចខាត មានរថយន្តកាមរី ពណ៌ខ្មៅ ស្លាកលេខភ្នំពេញ 2D-3620។ ភ្លាមៗក្រោយកើតហេតុ ជនរងគ្រោះទាំង៦នាក់ ត្រូវបានបញ្ជូនទៅកាន់ មន្ទីរបង្អែកខេត្តរតនគិរី ដើម្បីជួយសង្គ្រោះអាយុជីវិត ៕

ខ្មែរឡូត