កម្មការិនី២នាក់ ត្រូវចោរដាក់ថ្នាំសណ្ដំយកគ្រឿងអលង្ការ

កម្មការិនី២នាក់ ត្រូវចោរដាក់ថ្នាំសណ្ដំយកគ្រឿងអលង្ការ

រាជធានីភ្នំពេញ ៖ កម្មការិនីរោងចក្រកាត់ដេរ២នាក់ ត្រូវបានប្រជាពលរដ្ឋ នាំយកទៅសង្គ្រោះបន្ទាន់ភ្លាមៗ បន្ទាប់ពីបានប្រទះឃើញពួកនាងទាំងពីរនាក់នោះ ស្ថិតនៅក្នុងដីវាលមួយកន្លែង មានអាការៈស្លេកស្លាំងទន់ដៃជើង និងវង្វេងវង្វាន់មិនដឹងទិសតំបន់ ហើយក្រោយមកទើបនាងប្រាប់ថា ត្រូវមនុស្ស១ក្រុមដាក់ថ្នាំសណ្ដំយកគ្រឿងអលង្ការអស់ពីខ្លួន។

ហេតុការណ៍នោះបានកើតឡើងកាលពីវេលាម៉ោង៦និង៣០នាទីព្រឹក ថ្ងៃទី២ ខែសីហា ឆ្នាំ២០១៦ នៅចំណុចមុខវត្តគោកបញ្ជាន់ ដីវាលជិតស្រះព្រះទន្លេ ស្ថិតក្នុងភូមិថ្មគោល សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

ស្ត្រីរងគ្រោះខាងលើ កំពុងដាក់សេរ៉ូមស្ថិតនៅក្នុង មន្ទីរពហុព្យាបាលនិងសម្ភពអង្គរ ស្ថិតក្នុងភូមិចោមចៅ សង្កាត់ចោមចៅ ហើយបានលាក់មិនប្រាប់ឈ្មោះឲ្យដឹងនោះឡើយ។ ជនរងគ្រោះបានប្រាប់ថា ពួកនាង គឺជាកម្មការិនីរោងចក្ររេដសាន់ក្លូស៊ីង ស្នាក់នៅបន្ទប់ជួលក្នុងភូមិជ្រៃកោង សង្កាត់ចោមចៅ និងមានស្រុកកំណើតនៅក្នុងខេត្តព្រៃវែង។ ពួកនាងបានអះអាងថា ត្រូវថ្នាំសណ្ដំអស់ខ្សែកប្លាទីន២ខ្សែ ទម្ងន់ជាង៤ជី និងចិញ្ចៀន ២វង់ព្រមទាំង ទូរស័ព្ទដៃម៉ាកសាំសុង កាឡាក់ស៊ី ចំនួន២គ្រឿងផងដែរ។

ប្រភពដដែលបានបន្តថា នៅមុនពេលកើតហេតុខាងលើ ពួកនាងបាននាំគ្នាដើរចេញពីផ្ទះជួល ទៅធ្វើការរោងចក្រ លុះពេលទៅដល់ត្រង់ចំណុច រោងចក្រកាត់ដេរ សាន់ក្លូស៊ីង ស្ថិតក្ន្ងភូមិចោមចៅ មានស្ត្រី២នាក់ដើរទៅជិត រួចបានអមសងខាងពួកនាង រួចទះស្មាពួកនាង និងបាននាំពួកនាងជិះ ម៉ូតូ១គ្រឿង ទៅកាន់ចំណុចដីវាលក្បែរ ព្រះទន្លេមុខវត្តគោកបញ្ជាន់ស្ថិត ក្នុងភូមិថ្មគោលហើយបាន ធ្វើសកម្មភាព ដោះយកគ្រឿងអលង្ការទាំង ២នាក់បន្ទាប់មកបាននាំគ្នា ជិះម៉ូតូគេចខ្លួនបាត់ស្រមោល។

ដោយឡែកពួកនាង មានអាការៈទន់ដៃជើងវង្វេងវង្វាន់ និងបានដួលដើរលែងរួច។ នគរបាលបានឲ្យដឹងថា រឿងរ៉ាវខាងលើនោះនគរបាលនៅ ទាន់មានការជឿជាក់ថាជាការរដាក់ថ្នាំសណ្ដំនៅឡើយទេ ព្រោះថ្នាំសណ្ដំតែត្រូវហើយ មិនងាយនឹងដឹងខ្លួនត្រឹមតែរយៈពេល១ម៉ោងឬ២ម៉ោងនោះឡើយ ទាល់តែ២ឬ៣ថ្ងៃទើបដឹងខ្លួន ហើយបើធ្ងន់ធ្ងរអាចលើសពីនេះទៀតផង។

ម្យ៉ាងទៀតមិនអាច ត្រឹមតែទះស្មាសន្លប់នោះឡើយ ករណីនេះសង្ស័យពួកនាងកម្មការិនីខាងលើ ចាញ់ល្បិចចោរទម្លាក់យោង ដែលយកកាឡៃដូរមាស។ លុះពេលដោះមាស និងប្លាទីនឲ្យចោរអស់ខ្លួនបានកាឡៃ មានអារម្មណ៏តក់ស្លុត និងស្ដាយរបស់ខ្លួនទើបទន់ដៃជើងមានអាការៈមិនស្រួលខ្លួន និងថាត្រូវថ្នាំសណ្ដំ ៕

ប្រភព ៖ កោះសន្តិភាព

កំណត់ហេតុខ្មែរឡូត៖

គួររំលឹកដែរថា ដោយឡែកករណីមួយផ្សេងទៀត នារីដៃឆើត២នាក់ត្រូវបានប្រជាពលរដ្ឋឃាត់ខ្លួនប្រគល់អោយនគរបាល ខណៈដែលនារី ទាំងពីរនាក់ចូល មកទិញគ្រឿង អលង្ការ ហើយអ្នកលក់ គ្រឿងអលង្ការ ឃើញពួកនាងក៏ចង់ញ៉ែបាន ប្រើឲ្យនាងទៅ ទិញទឹកអំពៅផឹក ស្រាប់តែនាងបានដាក់ថ្នាំ សណ្តំបន្លំ យកទ្រព្យសម្បត្តិ តែសំណាង ល្អ ប្រជាពលរដ្ឋនៅក្បែរ កន្លែងកើតហេតុឃើញ ហើយក៏សង្ស័យបាន ឃាត់ខ្លួននារី ទាំងពីរនាក់ បញ្ជូនមកឲ្យ សមត្ថកិច្ចសួរនាំ ។

ហេតុ ការណ៏ខាងលើនេះបានភ្ញាក់ផ្អើលឡើងកាលពីម៉ោង៣ និង៤៥នាទី រសៀលថ្ងៃទី៩ មករា ២០១៥ កន្លងទៅ នៅក្នុងផ្សារប៉័ងកសី ស្ថិតនៅភូមិ ត្រពាំងខ្យង ឃុំទួលអំពិល ស្រុកបរសេដ្ឋ ខេត្តកំពង់ស្ពឺ ។

នារី ២នាក់ដែលប្រជាពលរដ្ឋឃាត់ខ្លួនអោយនគរបាលនោះមានឈ្មោះ ជួន សុភី អាយុ ២៤ឆ្នាំ មុខរបរ មិនពិតប្រាកដ ត្រូវជាមីងនឹងនារី ម្នាក់ទៀត ដែលមានឈ្មោះ វ៉ែន ឃឺន ហៅ ធីប អាយុ ១៩ឆ្នាំ មុខរបរមិនពិតប្រាកដ នារីទាំងពីរនាក់រស់ នៅក្នុងភូមិផ្សារដែក ឃុំផ្សារដែក ស្រុកពញាឮ ខេត្តកណ្តាល ។

រីឯបុរសរងគ្រោះដែលផឹកទឹកអំពៅត្រូវថ្នាំសណ្តំ មានឈ្មោះ ខៀវ រីន អាយុ ៥២ឆ្នាំ មុខរបរលក់គ្រឿង អលង្ការ និងដូរលុយ រស់នៅក្នុងភូមិ ឃុំ កើតហេតុខាងលើ ។

បើតាមសម្តីរបស់ប្រជាពលរដ្ឋ រស់នៅកន្លែងកើតហេតុបាននិយាយអោយដឹងថា នៅមុខពេលកើតហេតុ គេឃើញ នារី២នាក់ខាងលើ បាន ចូលទៅរកទិញ គ្រឿងអលង្ការអ្វីមិនដឹងទេ ។ ដោយសារនារី ពីរនាក់ នោះនៅក្មេងៗ ធ្វើឲ្យអ្នកលក់បែបចង់ ផ្តេសផ្តាស់ក៏ផ្ដោះផ្ដង ស្នេហាប្រើ ពាក្យវាចា ឲ្យនាងទៅ ទិញទឹកអំពៅ មកហូបទាំងអស់គ្នា ។ មួយសន្ទុះក្រោយមក គេឃើញនារីទាំង២នាក់ នោះរត់ចេញពី តូបបុរសវ័យ ចំណាស់ ប្រុងឡើងម៉ូតូ ឌុបគេចខ្លួន សំណាងល្អមានអ្នកទៅ រកទិញគ្រឿងអលង្ការ ទៅឃើញអ្នក លក់ដួលសន្លប់ ក៏បានស្រែកឆោឡោ ធ្វើឲ្យភ្ញាក់ផ្អើលឡើង នាំគ្នាឃាត់ខ្លួន នារីទាំង២នោះ ប្រគល់ឲ្យនគរបាល ធ្វើការឆែកឆេរ ឃើញមាន ខ្សែ.ក ផ្លាកទីន ១ខ្សែ ទម្ងន់២ជី និងចិញ្ចៀន ២ហ៊ុន ចំនួន១វង់ ៕