(ភ្នំពេញ)៖ ស្រ្តីម្នាក់ដែលលែងប្តី មិនទាន់ដាច់ស្រាច់បានលួចទៅដើរលេងជាមួយបុរសផ្សេង ពេលប្តីតាមទាន់ ក៏កើតការដេញវាយប្រតាយប្រតប់គ្នា តាមដងផ្លូវបង្កឲ្យមានការភ្ញាក់ផ្អើល នៅវេលាម៉ោង១១យប់ ថ្ងៃទី២៦ ខែកក្កដា ឆ្នាំ២០១៦ តាមបណ្តោយផ្លូវសហពន្ធ័រុស្សី មុខទីស្តីការគណៈរដ្ឋមន្រ្តី ស្ថិតក្នុងសង្កាត់មិត្តភាព ខណ្ឌ៧មករា។

តាមសំដីអ្នកដែលបានឃើញហេតុការណ៍បានឲ្យដឹងថា មុនពេលកើតហេតុ គេបានឃើញរថយន្តពីរគ្រឿង បើកតាមបណ្តោយផ្លូវ សហពន្ធ័រុស្សីក្នុងទិសដៅពីកើតទៅលិច ក្នុងល្បឿនលឿនដេញកៀរគ្នា រហូតដល់មុខទីស្តីការគណៈរដ្ឋមន្ត្រី ក៏បានឈប់ហើយចុះមកប្រតាយប្រតប់គ្នា បង្កជាការភា្ញក់ផ្អើល ដល់ប្រជាពលរដ្ឋដែលធ្វើដំណើរតាមផ្លូវ។ 

បើតាមសម្តីបុរសជាប្តីវិញបានអះអាងថា លោកនិងប្រពន្ធបានរៀបអាពាហ៍ពិពាហ៍ ស្របច្បាប់ជាច្រើនឆ្នាំមកហើយ តែទើបតែរយៈពេល២ខែចុងក្រោយនេះទេ ដែលប្រពន្ធលោកចុះចោលផ្ទះបាត់ៗ មិនសូវនៅផ្ទះ ធ្វើឲ្យរូបលោកសង្ស័យ និងតាមដានទើបដឹងថា ប្រពន្ធលោកលួចមកនៅជាមួយបុរសម្នាក់ ដែលជិះរថយន្ត Hammer។

តែស្ត្រីជាប្រពន្ធវិញបានចោទបុរសជាប្តីថា មិនចេះរកស៉ីអីទេ គឺដេកចាំចាយលុយនាងចិញ្ចឹម ធ្វើឲ្យនាងអស់ចិត្ត បានដាក់ពាក្យប្តឹងទៅតុលាការ ដើម្បីលែងលះគ្នា តែអតីតប្តីនាងមិនព្រមលែងទេ ហើយចេះតែមកតាមរករឿងនាង ធ្វើឲ្យរូបនាងខ្មាសគេ។

ក្រោយពេលប្រតាយប្រតប់គ្នាមួយសន្ទុះ រួចមកសម្ថកិច្ចមូលដ្ឋានបានចុះមកដល់កន្លែងកើតហេតុ និងបានធ្វើការសម្របសម្រួល ដើម្បីឲ្យភាគីទាំងសងខាង ចេញផុតពីកន្លែងកើតហេតុឲ្យត្រឡប់ទៅផ្ទះវិញ៕ 

ប្រភព ៖ freshnews

កំណត់ហេតុខ្មែរឡូត៖

ដោយឡែក ករណីមួយផ្សេងទៀត កាលពីលើកមុន មានករណីហិង្សា ដ៏ឃោរឃៅក្នុងគ្រួសារ មួយបានកើតឡើង ដោយសារបុរស ជាប្តីប្រចណ្ឌប្រពន្ធ ចោទថា មានប្រុសថ្មី  ក៏បានល្បួងស្ត្រីជា ប្រពន្ធទៅក្នុងព្រៃ ចាប់ចងស្លាបសេក ជាមួយ ដើមឈើ ហើយយកកាំបិត និងកណ្តៀវចាក់ ចោះជើង បណ្តាល រងរបួសជាច្រើនកន្លែង ។ តែទោះបីជាយ៉ាងណា ស្ត្រីជាប្រពន្ធ បដិសេធ និងសុំអង្វរប្តី ឱ្យដោះលែង និងសុំឱ្យបញ្ជូនទៅ ព្យាបាល នៅមណ្ឌលសុខភាព ។

ប្រភពបន្តថា ប្តីយល់ព្រម បញ្ជូនទៅ សង្គ្រោះនៅ មណ្ឌលសុខភាពនោះ ស្ត្រីជាប្រពន្ធ ក៏ឆ្លៀតរត់ចេញមកក្រៅ ដើម្បីទៅប្តឹង សមត្ថកិច្ច មូលដ្ឋានឱ្យចាប់ខ្លួន បុរសជាប្តីនោះ កាលពីថ្ងៃទី២១ វិច្ឆិកា ២០១៤ ស្ថិតនៅចំណុចហាង កាត់សក់មួយ កន្លែង ។

ប្រភពបានឱ្យដឹងទៀតថា បុរសជាប្តីអគតិឈ្មោះឌឿន វ៉ាន់ អាយុ៣១ឆ្នាំ ចំណែកប្រពន្ធរងគ្រោះឈ្មោះវុន ស៊ីថា អាយុ២៥ឆ្នាំ មានទីលំនៅ ក្នុងភូមិធ្ង័រ ឃុំចែងមានជ័យ ស្រុកបាណន់ ខេត្តបាត់ដំបង ។

គួរបញ្ជាក់ថា កន្លងមកស្ត្រីជា ប្រពន្ធបានទៅធ្វើការ រោងចក្រនៅឯ រាជធានីភ្នំពេញ ហើយមានគេ មកប្រាប់ប្តីថា ប្រពន្ធឯងមាន ប្រុសថ្មី ហើយ ក៏ផ្ទុះកំហឹងហៅ ប្រពន្ធឱ្យត្រឡប់មក ផ្ទះវិញ ហើយក៏ធ្វើអំពើហិង្សា បែបនេះតែម្តងទៅ ។ បច្ចុប្បន្នជនសង្ស័យកំពុង ធ្វើការសាក សួរនៅអធិការដ្ឋានស្រុក បាណន់។

ខ្មែរឡូត