គ្រោះអកុសល កើតលើបុរសចាំដីឱ្យគេ

គ្រោះអកុសល កើតលើបុរសចាំដីឱ្យគេ

ខេត្តកណ្តាល ៖ សេចក្តីរាយការណ៍បឋមឱ្យដឹងថា បុរសម្នាក់មិនដឹងភ្លាត់ស្នៀតយ៉ាងម៉េច បានជិះម៉ូតូធ្លាក់ចូលអូរទឹកមួយកន្លែងបណ្តាលឱ្យស្លាប់ភ្លាមៗ ដែលហេតុការណ៍នេះ បង្កឱ្យភ្ញាក់ផ្អើល កាលពីវេលាម៉ោង០៧ និង៤៥នាទីព្រឹកថ្ងៃទី២០ ០៧ ស្ថិតនៅចំណុចអូរទន្ទឹម ក្នុងភូមិកំពង់ទួល ឃុំអន្លង់រមៀត ស្រុកកណ្តាលស្ទឹង ខេត្តកណ្តាល ។

ប្រភពឱ្យដឹងថា ជនរងគ្រោះដែលស្លាប់ត្រូវគេស្គាល់ឈ្មោះសៀន សម្បត្តិ អាយុ៤៤ឆ្នាំ ជាអ្នកចាំដីឱ្យគេ បច្ចុប្បន្នស្នាក់នៅ

បណ្ដោះអាសន្នចំណុចអូរទន្ទឹម ភូមិកំពង់ទួលឃុំ អន្លង់រមៀត ស្រុកកណ្ដាលស្ទឹង ខេត្តកណ្ដាល មានស្រុកកណើតនៅភូមិត្រពាំង ឃុំសំអក ស្រុកកំពង់ត្របែក ខេត្តព្រៃវែង ជិះម៉ូតូម៉ាកសង់កូរ៉េ ពណ៌ក្រហម គ្មានស្លាកលេខ ។

ក្រោយកើតហេតុ ត្រូវសមត្ថកិច្ចធ្វើកោសល្យវិច័យលើសាកសពថា ពិតជាករណីគ្រោះថ្នាក់ចរាចរណ៍ពិតប្រាកដមែន រួចប្រគល់សាកសពទៅឱ្យគ្រួសារធ្វើបុណ្យតាមប្រពៃណី ។

ប្រភព ៖ កោះសន្តិភាព

កំណត់ហេតុខ្មែរឡូត៖

គួររំលឹកដែរថា ដោយឡែកករណីមួយវិញទៀត រថយន្តមួយគ្រឿងបើកចុះទូកដរលឿនជ្រុល បណ្ដាលឱ្យធ្លាក់ក្នុងទឹកទន្លេបាសាក់ ស្លាប់មនុស្សម្នាក់ និងម្នាក់ទៀត ត្រូវបានគេជួយសង្គ្រោះទាន់។ ហេតុការណ៍នេះកើតឡើងកាលពីវេលាម៉ោង៣រសៀល ថ្ងៃទី១៨ ខែកក្កដា កន្លងទៅ នៅកំពង់ចម្លងតាលន់ ចុងកោះត្រើយខាងកើត ស្ថិតក្នុងភូមិព្រែកតាប្រាក់ ឃុំតាលន់ ស្រុកស្អាង។

មន្ត្រីនគរបាលស្រុកស្អាងបានប្រាប់ឱ្យដឹងថា ជនរងគ្រោះដែលបានស្លាប់ ក្នុងហេតុការណ៍នេះ ជាជនពិការជើង ខ្វិនពីកំណើត ឈ្មោះ ធុន វីរៈ ភេទប្រុស អាយុ២០ឆ្នាំ ជិះក្នុងរថយន្ត ម៉ាកតូយ៉ូតា តាកូម៉ា ពីរបាំង ពាក់ស្លាកលេខភ្នំពេញ 2M-6152 បើកបរដោយបងស្រីជនរងគ្រោះ មានទីលំនៅរាជធានីភ្នំពេញ។

បើតាមសាក្សីបានឱ្យដឹងថា រថយន្តខាងលើនោះដឹកក្រុមគ្រួសារ មានគ្នា៦នាក់ត្រឡប់ មកពីបុណ្យ ប្រាំពីថ្ងៃសពបងប្អូន នៅភូមិកើតហេតុ។ នៅពេលកើតហេតុនោះ រថយន្តខាងលើ បើកមកដល់កំព់ងដ ក៏បានឈប់ឱ្យ អ្នករួមដំណើរ ជាមួយនោះចុះពីលើរថយន្ត គឺនៅសល់តែជនរងគ្រោះ ដែលពិការជើងមិនអាចចុះដើរបាន ជាមួយតៃកុង។

ពេលបើកចុះទូកដ ដែលមានឈ្មោះហៃ ជាអ្នកបើកទូកដនោះបានដាក់ក្ដា និងដាក់កំណល់ត្រឹមត្រូវ ហើយរថយន្តនោះបើកចុះពីច្រាំងមកលើទូកដ តែលឿនពេក ក៏ទៅបុកកំណល់ខ្លាំងជ្រុលធ្លាក់ទឹកទន្លេលិចរថយន្តចូលក្នុងទឹកជ្រៅតែម្ដង។ ពេលនោះអ្នកបើកទូកដ និងអ្នកឃើញហេតុការណ៍ បានមុជទឹកជួយសង្គ្រោះ ទាញជនរងគ្រោះចេញពីរថយន្ត ប៉ុន្តែជាអកុសលជួយសង្គ្រោះបានតែ អ្នកបើកបររថយន្តម្នាក់ ចំណែកម្នាក់ដែលខ្វិនជើងនោះ បានស្លាប់បាត់ទៅហើយ៕