ក្រសួងព័ត៌មាន គ្រោងចំណាយថវិកា ប្រមាណ៦ម៉ឺនដុល្លារ រៀបចំមហោស្រពចម្រៀងសម័យ ថ្នាក់ជាតិឆ្នាំ២០១៦

ក្រសួងព័ត៌មាន គ្រោងចំណាយថវិកា ប្រមាណ៦ម៉ឺនដុល្លារ រៀបចំមហោស្រពចម្រៀងសម័យ ថ្នាក់ជាតិឆ្នាំ២០១៦

ភ្នំពេញ៖ រដ្ឋលេខាធិការក្រសួងព័ត៌មាន លោក ជា ច័ន្ទបរិបូរណ៍ បានលើកឡើងថា ក្រសួងព័ត៌មាន គ្រោងនឹងចំណាយថវិកា ប្រមាណ៦ម៉ឺនដុល្លារ សម្រាប់រៀបចំមហោស្រព ចម្រៀងសម័យថ្នាក់ជាតិ ឆ្នាំ២០១៦ ក្នុងគោលដៅជួយលើក កម្ពស់ការតាក់ តែងទំនុកច្រៀង និងបទចម្រៀងថ្មីៗ និងចូលរួម លុបបំបាត់វប្បធម៌ ចម្លងពីរបទេស ។

យោងតាមទីភ្នាក់ងារ សារព័ត៌មានកម្ពុជា (AKP) បានដកស្រងសម្តី លោក ជា ច័ន្ទបរិបូរណ៍ កាលពីថ្ងៃទី១៩ ខែកក្កដា ឆ្នាំ២០១៦ថា រហូតមកដល់ពេលនេះ ក្រុមការងាររៀបចំ មហោស្រពចម្រៀង ថ្នាក់ជាតិនៃក្រសួងព័ត៌មាន ទទួលថវិកាពីសប្បុរសជន និងក្រុមហ៊ុននានា គូបផ្សំនឹងថវិកាឧបត្តម្ភពី លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានជិតពាក់កណ្តាលហើយ ប៉ុន្តែនៅខ្វះជាង ៣ម៉ឺនដុល្លារទៀត ខណៈដែលមហោស្រពចម្រៀងថ្នាក់ជាតិនេះ មិនចំណាយថវិកាជាតិនោះទេ ។

រដ្ឋលេខាធិការ ក្រសួងព័ត៌មានរូបនេះ ក៏បានអំពាវនាវដល់បណ្ដា សប្បុរសជន និងក្រុមហ៊ុននានា បន្តជួយគាំទ្រដល់ មហោស្រពចម្រៀងថ្នាក់ជាតិ ដែលរៀបចំដោយ ក្រសួងព័ត៌មាននេះ ដើម្បីចូលរួមលើក កម្ពស់សិល្បៈ វប្បធម៌ជាតិខ្មែរ ឱ្យគង់វង្សស្ថិតស្ថេរ គ្រប់សម័យកាល។

ជាមួយគ្នានេះដែរ ក្រសួងព័ត៌មានបានរៀបចំ មហោស្រពចម្រៀងថ្នាក់ជាតិនេះ ឡើងគឺជាការផ្តល់ឱកាស ដល់តន្ត្រីករ អ្នកនិពន្ធ សិល្បករ សិល្បការិនីខ្មែរ ឱ្យមានឆន្ទៈបង្កើតស្នាដៃថ្មីៗប្រកបដោយការ ទាក់ទាញ ហើយមិនលួចចម្លង ស្នាដៃរបស់អ្នកដទៃ ។

សូមបញ្ជាក់ថា រហូតមកដល់ពេលនេះ មានក្រុមតន្ត្រីមកពីគ្រប់រាជធានី-ខេត្ត បានមកដាក់ ពាក្យប្រឡងប្រមាណ ៤០ក្រុម ហើយ ប៉ុន្តែក្រសួងព័ត៌មាន នឹងជម្រុះយកត្រឹមតែ១៨ក្រុម ដែលលេច ធ្លោជាងគេឱ្យចូលរួម ការប្រឡងតែប៉ុណ្ណោះ។ មហោស្រពចម្រៀងថ្នាក់ជាតិនេះ នឹងចាប់ផ្តើមបើកការ ជាផ្លូវការនៅថ្ងៃទី២២ ខែសីហា ឆ្នាំ២០០៦ នៅស្ទីតយោ អគ្គនាយក ដ្ឋាន ទូរទស្សន៍ជាតិកម្ពុជា ៕

ប្រភព ៖ ដើមអម្ពិល

ខ្មែរឡូត

មុន បន្ទាប់

មតិយោបល់