បុកពីក្រោយរថយន្តចៅហ្វាយនាយ ដួលរបួសធ្ងន់ធ្ងរ

បុកពីក្រោយរថយន្តចៅហ្វាយនាយ ដួលរបួសធ្ងន់ធ្ងរ

រាជធានីភ្នំពេញ ៖ បុរសម្នាក់ដែលតាមប្រភពព័ត៌មាន ពីកន្លែងកើតហេតុនិយាយថា គឺជាអង្គរក្ស ហើយបានជិះ ម៉ូតូ១គ្រឿង ក្នុងល្បឿនយ៉ាងលឿន តាមការពារពីក្រោយរថយន្ត ចៅហ្វាយនាយរបស់ខ្លួន ហើយខណៈដែលរថយន្តមេរបស់ខ្លួន វាក់ជាមួយរថយន្តដែលកំពុង បើកឆ្លងផ្លូវនៅខាងមុខ ក៏បានជាន់ហ្វ្រាំងបន្ថយល្បឿន ដែលជាហេតុធ្វើឲ្យ អង្គរក្សម្នាក់នោះជាន់ហ្វ្រាំងមិនទាន់ គេចចេញក៏មិនទាន់ ក៏បានបុកពីក្រោយ រថយន្តមេពេញទំហឹង បណ្តាលឲ្យដួលបោកទៅលើថ្នល់ រងរបួសយ៉ាងធ្ងន់ធ្ងរសន្លប់ស្តូកស្ដឹងតែម្ដង។

ឧប្បត្តិហេតុគ្រោះថ្នាក់ចរាចរនោះ បានកើតឡើងកាលពីវេលាម៉ោង ៣និង៤០នាទីរសៀល ថ្ងៃទី១៩ ខែកក្កដា ឆ្នាំ២០១៦ នៅកំណាត់ផ្លូវជាតិលេខ៤ ត្រង់ចំណុចមុខភូមិអូដឹម សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

ប្រភពដដែលបានបន្តថា បុរសជាអង្គរក្សម្នាក់នោះ ឈ្មោះ នៅ លក្ខ័ អាយុ២៨ឆ្នាំ មានស្រុកកំណើតនៅក្នុងភូមិជុំរំ ឃុំព្រៃផ្តៅ ស្រុកព្រៃកប្បាស ខេត្តតាកែវ។ បុរសនោះបានជិះម៉ូតូមួយគ្រឿងម៉ាក NOUVO ពណ៌ក្រហមលាយខ្មៅ មិនស្គាល់ស្លាកលេខ ព្រោះត្រូវបានមិត្តភក្ដិ បុរសនោះយកកន្សែងគ្របពីលើជិត ក្នុងបំណងមិនចង់ឲ្យ ក្រុមអ្នកសារព័ត៌មានមើលឃើញ និងថតរូបជាប់ឡើយ។

នៅមុនពេលកើតហេតុ បុរស នោះបានជិះម៉ូតូ១គ្រឿងនោះ តាមការពារពីក្រោយរថយន្តមេ របស់ខ្លួនម៉ាក TUNTRA មិនចាំស្លាកលេខ បើកបរក្នុងទិសដៅពីកើតទៅលិច។ លុះដល់ចំណុចខាងលើ មានរថយន្ត១គ្រឿងកំពុងបើកឆ្លងកាត់ផ្លូវ ធ្វើឲ្យរថយន្តមេវាក់ជាន់ហ្វ្រាំងបន្ថយល្បឿន ហើយបានធ្វើឲ្យរថយន្តអង្គរក្សនោះវាក់ដែរ ជាន់ហ្វ្រាំងឈប់មិនទាន់ និងគេចចេញក៏មិនទាន់ ក៏បានជ្រុលទៅបុកគូថរថយន្តចៅហ្វាយនាយពេញទំហឹង បណ្តាលឲ្យដួលបោក ទៅលើថ្នល់រងរបួសធ្ងន់ សន្លប់ស្ដូកស្ដឹង។

បន្ទាប់មករថយន្ត មេបានបន្តដំណើរទៅមុខ បាត់ស្រមោល នៅសល់តែបុរសនោះ ត្រូវបានគេបញ្ជូន តាមរថយន្តសង្គ្រោះ របស់អង្គភាព ៧១១ ដឹកទៅកាន់មន្ទីរពេទ្យព្រះកេតុមាលា ដើម្បីសង្គ្រោះបន្ទាន់ភ្លាមៗ រីឯម៉ូតូក៏ត្រូវបានមិត្តភក្ដិដឹកតាម រ៉ឺម៉កទៅរក្សាទុក៕

ប្រភព ៖ កោះសន្តិភាព

កំណត់ហេតុខ្មែរឡូត៖

គួររំលឹកដែរថា ដោយឡែកករណីមួយវិញទៀត កាលពីខែមុននេះ រថយន្ដស៊េរីទំនើបមួយគ្រឿង ដែលគេស្គាល់ថាជារបស់ឯកឧត្តមម្នាក់ ចតស្ងៀមមុខផ្ទះ ត្រូវបានជនជាតិចិនម្នាក់ក្នុងស្ថានភាពស្រវឹងជោគជាំ ជិះម៉ូតូបុកពីក្រោយពេញ ទំហឹង បណ្ដាលឱ្យរងរបួសធ្ងន់ធ្ងរ ចំណែកម៉ូតូ និងរថយន្តរងការខូចខាត ខ្លាំងផងដែរ ។

ហេតុការណ៍គ្រោះថ្នាក់ចរាចរណ៍នេះ កើតឡើងនៅយប់ឈានចូលថ្ងៃទី១១ ខែមិថុនា ឆ្នាំ២០១៦ កន្លងទៅ តាមបណ្ដោយផ្លូវលេខ៣៨៨ ក្នុងសង្កាត់ទួលស្វាយព្រៃ១ ខណ្ឌចំការមន រាជធានីភ្នំពេញ។

ប្រពភព័ត៌មានពីកន្លែងកើតហេតុបានឱ្យដឹងថា រថយន្ដរបស់ឯកឧត្តមម្នាក់ នោះ ម៉ាកLuxes570 ពាក់ស្លាកលេខភ្នំពេញ2AA-5959 បានចតស្ងៀមនៅមុខ ស្រាប់តែមានជនជាតិចិនម្នាក់ ស្ថិតក្នុងស្ថានភាពស្រវឹងជោគជាំ បានជិះម៉ូតូម៉ាកClick បុកពីក្រោយពេញទំហឹង បណ្ដាលឱ្យរងរបួសខ្លួនឯងធ្ងន់ធ្ងរ ត្រូវបានបញ្ជូនទៅមន្ទីពេទ្យ ដើម្បីជួយសង្គ្រោះ។

ក្នុងហេតុការណ៍នេះដែរ ភាគីខាងម្ចាស់រថយន្ដ មិនបានទាមទារសំណងអ្វីទាំងអស់ គ្រាន់សុំសមត្ថកិច្ចយករថយន្ដចូលផ្ទះ ដើម្បីបញ្ចប់រឿង៕