ញាក់សាច់ ! ស្មានតែបានក្រេបទឹកឃ្មុំ បែរជាបានទឹកខ្មេះទៅវិញ

ញាក់សាច់ ! ស្មានតែបានក្រេបទឹកឃ្មុំ បែរជាបានទឹកខ្មេះទៅវិញ

រាជធានីភ្នំពេញ ៖ គូសង្សារ១គូត្រូវបានសមត្ថកិច្ច នគរបាលខណ្ឌ៧មករាចាប់ឃាត់ខ្លួនកាលពីរសៀលថ្ងៃទី១៩ ខែកក្កដា ឆ្នាំ២០១៦ បន្ទាប់ពីពួកគេបានប្រើល្បិច លួងលោមស្នេហា ដោយអន្ទងស្រីស្អាតម្នាក់ ឲ្យជួបគ្នានៅសណ្ឋាគាររួចចាប់ចងដៃចងជើងប្លន់យកទូរស័ព្ទ គ្រឿងអលង្ការ និងប្រាក់អស់ពីខ្លួន ។

ជនសង្ស័យដែលសមត្ថកិច្ចចាប់ខ្លួនម្នាក់ឈ្មោះ ថេង សម្បត្តិ ភេទប្រុស អាយុ២៧ឆ្នាំ មុខរបរមិនពិតប្រាកដ ស្នាក់នៅផ្ទះជួលសង្កាត់បឹងសាឡាង ខណ្ឌទួលគោក និងម្នាក់ទៀតឈ្មោះ ច័ន្ទ ស្រីណា ភេទស្រី អាយុ២៦ឆ្នាំ មានទីលំនៅសង្កាត់ទួលសង្កែ ខណ្ឌឫស្សីកែវ រាជធានីភ្នំពេញ មុខរបរនារីខារ៉ាអូខេ (ពីរនាក់ជាសង្សាគ្នា) ។ ចំណែកនារីរងគ្រោះឈ្មោះ ប៊ អាយុ២០ឆ្នាំ ជានារីបម្រើខារ៉ាអូខេដែរ ។

សមត្ថកិច្ចនគរបាលខណ្ឌ៧មករា បានបង្ហើបឲ្យដឹងជាជំហ៊ានដំបូងថា កាលពីថ្ងៃទី១៨កក្កដា មុនពេលកើតហេតុ នារីរងគ្រោះនិងនារីសង្ស័យបានបង្កើតវ៉ាត់អាប់(WhatsApp) ឆាតលេងជាមួយគ្នាទៅវិញទៅមក ។ ក្រោយមក មិត្តស្រីនារីរងគ្រោះ បានឲ្យលេខទូរសព្ទ័ និងឆាតលេងជាមួយ ប្រុសស្នេហ៍របស់គេបន្ត ។

សមត្តកិច្ចបង្ហើបឲ្យដឹងទៀតថា ពេលសង្សារមិត្តស្រីជនរងគ្រោះ ឆាតឆ្លងឆ្លើយទៅនារីរងគ្រោះ មិនមែនសាសងសេ្នហាលេងៗទេ គឺគេមានគំនិតទុច្ចរិតលួងលោមបោកប្រាស់ដើម្បីប្លន់យកទ្រព្យសម្បត្តិ ។ ក្រោយពេលឆាតលេងច្រើនដង ជនសង្ស័យ និងនារីរងគ្រោះ បានណាត់គ្នាមកជួប ក្រេបទឹកឃ្មុំនៅសណ្ឋាគារស ស្ថិតនៅតាមបណ្តោយផ្លូវព្រះមុនីវង្ស សង្កាត់អូរឫស្សី៤ ខណ្ឌ៧មករា ដោយសន្យាថា នឹងឲ្យប្រាក់ទៅខាងស្រីចំនួន១០០ដុល្លារអាមេរិក ។

នារីរងគ្រោះអាចនិយាយថា ចាញ់ល្បិចលួងលោមចង់ បានប្រាក់ពីជនសង្ស័យផង ក៏សម្រេចចិត្តមកតាម ការណាត់ជួបខាងប្រុស នៅបន្ទប់មួយនៃអតីត សណ្ឋាគារសតែម្តង ។ លុះពេលនារីរងគ្រោះទៅដល់សណ្ឋាគារ ស្រាប់តែលេចចេញក្រុមជនសង្ស័យប្រុសស្រី ៤ ទៅ ៥ នាក់បានចាប់នារីរងគ្រោះបិទមាត់ និងចងដៃចងជើង ប្រមូលយកទូរស័ព្ទដៃ គ្រឿងអលង្ការ និងប្រាក់មួយចំនួន ហើយដាក់ក្នុងបន្ទប់នៃសណ្ឋាគារនោះ ។ បន្ទាប់ពីជនសង្ស័យបាន ធ្វើសកម្មភាពចងដៃចងជើង ជនរងគ្រោះប្លន់យកទ្រព្យសម្បត្តិហើយ ពួកគេបាននាំគ្នាគេខ្លួនបាត់អស់ ។

ប្រភពបញ្ជាក់ថា នៅពេលពួកគេចុះចេញពី សណ្ឋាគារគេចខ្លួនមានជនសង្ស័យម្នាក់ក្នុងចំណោម ៤-៥ នាក់បានខ្សិបប្រាប់អ្នកបម្រើនៅទីនោះថា ឲ្យប្រញាប់ឡើងទៅសម្អាតបន្ទប់ដែលគេជួលដេកនោះផង ។

ម្នាក់នោះប្រាប់ អ្នកបម្រើសណ្ឋាគារដូច្នេះ ព្រោះគេខ្លាចនារីរងគ្រោះមានគ្រោះថ្នាក់ដល់ជីវិត ស្របពេលនោះដែរ ក្រុមគ្រួសារនារីរងគ្រោះ បាត់សមាជិកមួយយប់បានទៅសួររកតាមរយ:ម៉ូតូឌុប ទើបដឹងថា នារីរងគ្រោះស្នាក់នៅបន្ទប់មួយក្នុងសណ្ឋាគារនោះក៏ប្តឹងសមត្ថកិច្ចឲ្យអន្តរាគមន៍ឡើងទៅរំដោះនារីរងគ្រោះដែលកំពុងជាប់ចំណង ។

បន្ទាប់ពីរំដោះ នារីរងគ្រោះបានហើយ សមត្ថកិច្ចបានសហការ ជាមួយនារីរងគ្រោះ ធ្វើការស្រាវជ្រាវរហូត ឈានទៅដល់ការឃាត់ខ្លួន ជនសង្ស័យជាសង្សារ១គូនេះ ខណៈពេលពួកគេ កំពុងសេពគ្រឿងញៀន នៅច្រកផ្លូវខាងក្រោយសណ្ឋាគារនោះ ។

ក្រោយពេលចាប់ខ្លួន ជនសង្ស័យជាសង្សារមួយគូនេះ សមត្តកិច្ចនគរបាលខណ្ឌ៧មករាកំពុង សាកសួរយកចម្លើយ ដើម្បីឈានទៅចាប់ខ្លួនបក្សពួកបន្តទៀត ៕

ប្រភព ៖ កោះសន្តិភាព

ខ្មែរឡូត

មុន បន្ទាប់

មតិយោបល់