បើករថយន្តចុះទូកដលឿន ជ្រុលធ្លាក់ទឹកទន្លេស្លាប់ម្នាក់

បើករថយន្តចុះទូកដលឿន ជ្រុលធ្លាក់ទឹកទន្លេស្លាប់ម្នាក់

ខេត្តកណ្ដាល ៖ រថយន្តមួយគ្រឿងបើកចុះទូកដរលឿនជ្រុល បណ្ដាលឱ្យធ្លាក់ក្នុងទឹកទន្លេបាសាក់ ស្លាប់មនុស្សម្នាក់ និងម្នាក់ទៀត ត្រូវបានគេជួយសង្គ្រោះទាន់។ ហេតុការណ៍នេះកើតឡើងកាលពីវេលាម៉ោង៣រសៀល ថ្ងៃទី១៨ ខែកក្កដា នៅកំពង់ចម្លងតាលន់ ចុងកោះត្រើយខាងកើត ស្ថិតក្នុងភូមិព្រែកតាប្រាក់ ឃុំតាលន់ ស្រុកស្អាង។

មន្ត្រីនគរបាលស្រុកស្អាងបានប្រាប់ឱ្យដឹងថា ជនរងគ្រោះដែលបានស្លាប់ ក្នុងហេតុការណ៍នេះ ជាជនពិការជើង ខ្វិនពីកំណើត ឈ្មោះ ធុន វីរៈ ភេទប្រុស អាយុ២០ឆ្នាំ ជិះក្នុងរថយន្ត ម៉ាកតូយ៉ូតា តាកូម៉ា ពីរបាំង ពាក់ស្លាកលេខភ្នំពេញ 2M-6152 បើកបរដោយបងស្រីជនរងគ្រោះ មានទីលំនៅរាជធានីភ្នំពេញ។

បើតាមសាក្សីបានឱ្យដឹងថា រថយន្តខាងលើនោះដឹកក្រុមគ្រួសារ មានគ្នា៦នាក់ត្រឡប់ មកពីបុណ្យ ប្រាំពីថ្ងៃសពបងប្អូន នៅភូមិកើតហេតុ។ នៅពេលកើតហេតុនោះ រថយន្តខាងលើ បើកមកដល់កំព់ងដ ក៏បានឈប់ឱ្យ អ្នករួមដំណើរ ជាមួយនោះចុះពីលើរថយន្ត គឺនៅសល់តែជនរងគ្រោះ ដែលពិការជើងមិនអាចចុះដើរបាន ជាមួយតៃកុង។

ពេលបើកចុះទូកដ ដែលមានឈ្មោះហៃ ជាអ្នកបើកទូកដនោះបានដាក់ក្ដា និងដាក់កំណល់ត្រឹមត្រូវ ហើយរថយន្តនោះបើកចុះពីច្រាំងមកលើទូកដ តែលឿនពេក ក៏ទៅបុកកំណល់ខ្លាំងជ្រុលធ្លាក់ទឹកទន្លេលិចរថយន្តចូលក្នុងទឹកជ្រៅតែម្ដង។ ពេលនោះអ្នកបើកទូកដ និងអ្នកឃើញហេតុការណ៍ បានមុជទឹកជួយសង្គ្រោះ ទាញជនរងគ្រោះចេញពីរថយន្ត ប៉ុន្តែជាអកុសលជួយសង្គ្រោះបានតែ អ្នកបើកបររថយន្តម្នាក់ ចំណែកម្នាក់ដែលខ្វិនជើងនោះ បានស្លាប់បាត់ទៅហើយ៕

ប្រភព ៖ កោះសន្តិភាព

កំណត់ហេតុខ្មែរឡូត៖

គួររំលឹកដែរថា ដោយឡែកករណីមួយវិញទៀត ជនរងគ្រោះ២នាក់ជាម្តាយ និងកូនប្រុសអាយុ២ឆ្នាំ ជាជនជាតិវៀតណាម បាននិងកំពុងបាត់ខ្លួន ក្រោយទូកដឹកទំនិញ (ដឹកដែក) ចំណុះ៣០០តោន បានលិចចូលទន្លេ ស្ថិតនៅចំណុចកំពង់ផែដែកយូ លឹមភូមិខ្សុំ ឃុំបន្ទាយដែក ស្រុកកៀនស្វាយ នៅវេលាម៉ោង ៣ទាបភ្លឺ ថ្ងៃទី១៣ ខែមិថុនា ឆ្នាំ២០១៦ កន្លងទៅ។ ហេតុការណ៍នេះ ជនរងគ្រោះ៦នាក់ បានរួចពីសេចក្តីស្លាប់ ដោយសារហែលគេចទាន់។

សមត្ថកិច្ចមូលដ្ឋាន បានឲ្យដឹងថា ជនរងគ្រោះចំនួន០៨នាក់ ក្នុងនោះប្រុស៧នាក់ ស្រីម្នាក់ ហើយបាត់ខ្លួន២ ជាម្តាយ និងកូន។ស្រី្តជាម្តាយឈ្មោះ ចាំង មុីថាន់ អាយុ២៨ឆ្នាំជនជាតិវៀតណាម មានទីលំនៅប្រទេសវៀតណាម និងកូនប្រុស ឈ្មោះផាម ជីធិន អាយុ០២ឆ្នាំដែលសមត្ថកិច្ចសង្ស័យថា ស្លាប់បាត់ទៅហើយ។

សមត្ថកិច្ច បានបញ្ជាក់ថា នៅថ្ងៃខែឆ្នាំខាងលើ វេលាម៉ោង១៩៖៣០នាទី ទូកដឹកដែក០១គ្រឿង ចំណុះ៣០០តោន មកពីប្រទេសវៀតណាម បានចូលចតចំណុចកើតហេតុខាងលើ លុះដល់វេលាម៉ោងកើតហេតុស្រាប់តែទឹកនាចទៅវិញ បណ្តាលឲ្យទូកផ្អៀង លិចទៅក្នុងទឹកទន្លេ បាត់ខ្លួនមនុស្សចំនួន២នាក់តែម្តង។

នៅពេលនេះ កម្លាំងសមត្ថកិច្ច និងអាជ្ញាធរជាច្រើននាក់ កំពុងជួយអន្តរាគមន៍តាម ស្វែងរកជនរងគ្រោះទាំង២នាក់៕