កុំចេះតែហ៊ាន ទោះបីគេនៅម្នាក់ឯងក៏ដោយ

កុំចេះតែហ៊ាន ទោះបីគេនៅម្នាក់ឯងក៏ដោយ

ខេត្តបាត់ដំបង ៖ ជនសង្ស័យម្នាក់ត្រូវបានសមត្ថកិច្ចស្រុកមោងឫស្សីចាប់ខ្លួនកាលពីបន្ទាប់ពីបានរត់គេចខ្លួនបាន១ថ្ងៃ បន្ទាប់ពីមានពាក្យបណ្ដឹងពីក្មេងស្រីរងគ្រោះអាយុ១៣ឆ្នាំម្នាក់ ថាបានលបឡើងលើផ្ទះបម្រុងចាប់រំលោភខណៈនាងនៅផ្ទះតែម្នាក់ឯង ។

សមត្ថកិច្ចស្រុកមោងឫស្សីបានឲ្យដឹងថា ជនសង្ស័យឈ្មោះ រី រិទ្ធ ភេទប្រុស អាយុ២៥ឆ្នាំ រស់នៅភូមិគួយជីកដី ឃុំរបស់មង្គល ស្រុកមោងឫស្សី ខេត្តបាត់ដំបង ត្រូវបានសមត្ថកិច្ចចាប់ខ្លួនកាលពីវេលាម៉ោង៥ និង៣០នាទីល្ងាច ថ្ងៃទី១៥ ខែកក្កដា ឆ្នាំ២០១៦ ចំណែកក្មេងស្រីរងគ្រោះឈ្មោះ ជ.ឆ.វ អាយុ១៣ឆ្នាំ ។

នៅក្នុងពាក្យបណ្ដឹងក្មេងស្រីរងគ្រោះបានរៀបរាប់ឲ្យដឹងថា នាងរស់នៅផ្ទះតែម្នាក់ឯង ដោយសារឪពុកម្តាយរបស់នាងទៅធ្វើកម្មករស៊ីឈ្នួលដកដំឡូងឲ្យគេនៅព្រំដែន ។ នៅយប់កើតហេតុ ខណៈនាងកំពុងដេកលក់ ស្រាប់តែបុរសម្នាក់បានលបឡើងផ្ទះរបស់នាងហើយបានចាប់ខ្ទប់មាត់នាង ព្រមទាំងគំរាមនាងមិនឲ្យរើបម្រះ និងស្រែកឡើយ ។ ដោយសារសំឡេងនោះធ្វើឲ្យនាងដឹងថាជាឈ្មោះ រី រិទ្ធ ដែលនៅផ្ទះក្បែរគ្នា ។

ក្មេងស្រីរងគ្រោះបានរៀបរាប់នៅក្នុងពាក្យបណ្ដឹងទៀតថា ខណៈពេលដែលជនសង្ស័យបម្រុងសម្រាតនាងដើម្បីរំលោភ នាងក៏មានឱកាសរើបម្រះ ហើយស្រែកយ៉ាងខ្លាំងៗដើម្បីឲ្យអ្នកភូមិគេបានឮ និងមកជួយ ធ្វើឲ្យជនសង្ស័យភ័យស្លន់ស្លោររត់គេចខ្លួនបាត់ទាំងយប់ ។

សមត្ថកិច្ចស្រុកមោងឫស្សី បានឲ្យដឹងដែរថា ក្នុងករណីនេះដោយមានការភ្ញាក់ផ្អើល សមត្ថកិច្ចបានចុះទៅដល់កន្លែងកើតហេតុទាំងយប់ ហើយក៏ធ្វើការស្រាវជ្រាវ រហូតតាមចាប់ខ្លួនជនសង្ស័យបាននៅល្ងាចថ្ងៃបន្ទាប់ផងដែរ ។

បច្ចុប្បន្ន ជនសង្ស័យត្រូវបញ្ជូនទៅកាន់ការិយាល័យជំនាញ នៃស្នងការដ្ឋាននគរបាលខេត្តដើម្បីកសាងសំណុំរឿងចាត់ការតាមនិតិវិធីច្បាប់ ៕

ប្រភព ៖ កោះសន្តិភាព

កំណត់ហេតុខ្មែរឡូត៖

គួររំលឹកដែរថា ដោយឡែកករណីមួយវិញទៀត ជនម្នាក់ដែលបានចាប់រំលោភក្មេងស្រីអាយុ៥ឆ្នាំរហូតបានសម្រេច ត្រូវ នគរបាលស្រុកស្នួលតាមចាប់ឃាត់ខ្លួនបាននៅលើចុងដូង នៅពេលដែលរូបគេរត់ទាល់ច្រក។

នៅថ្ងៃទី៥ ខែកក្កដានេះ ជនល្មើសត្រូវនគរបាលស្រុកបញ្ជូនខ្លួន និងកសាងសំណុំរឿងទៅកាន់ស្នងការដ្ឋានដើម្បីបន្តនីតិវិធី។ នគរបាលព្រហ្មទណ្ឌស្រុកស្នួល បានឲ្យដឹងថា ជនល្មើសឈ្មោះ សយ សិដ្ឋ អាយុ១៥ឆ្នាំ រស់នៅឃុំទន្លូង ស្រុកមេមត់ ខេត្តត្បូងឃ្មុំ និងបានមកស្នាក់នៅធ្វើចម្ការមួយកន្លែងនៅខាងក្រោយឃុំស្រែចារ ស្រុកស្នួល។

កម្លាំងនគរបាលបានឲ្យដឹងទៀតថាកាលពីថ្ងៃកើតហេតុ ថ្ងៃទី៤ ខែកក្កដា កន្លងទៅ ជននេះបានល្បួងក្មេង ស្រីអាយុ៥ឆ្នាំម្នាក់ ចាប់រំលោភសេពសន្ថវៈរហូតបានសម្រេចម្តងនៅក្នុងខ្ទមចម្ការនៅក្រោយភូមិ ខណៈដែលឪពុកម្តាយរបស់ក្មេងស្រីរងគ្រោះមិននៅ។

អធិការរងទទួលបន្ទុកព្រហ្មទណ្ឌស្រុកស្នួលលោក ប៊ុត នឿន បានឲ្យដឹងថា ជនល្មើស ត្រូវបាននគរបាលចាប់ឃាត់ខ្លួនបានភ្លាមៗបន្ទាប់ពីទទួលពាក្យបណ្តឹងរបស់ជីដូន និងឪពុក ម្តាយក្មេងស្រីរងគ្រោះ។ ដោយជនល្មើសបានព្យាយាមរត់គេចពីការដេញតាមចាប់ ហើយរត់ទាល់ច្រកក៏បានឡើងដើមដូងដើម្បីសម្ងំលាក់ខ្លួន តែយ៉ាងណាក៏ត្រូវបាននគរបាល រកឃើញ។

កម្លាំងនគរបាលបានបន្ថែមថា កាលពីថ្ងៃកើតហេតុ ខណៈដែលជននេះនៅមើលទូរទស្សន៍ក្នុង រោងចម្ការជាមួយនឹងក្មេងស្រីរងគ្រោះ ជននេះបានល្បួងនាងរំលោភបានសម្រេចតែមិនស៊ីជម្រៅខ្លាំង។ ហើយក្រោយពីរំលោភសម្រេច ជននេះមិនបានគេចខ្លួនទៅណាភ្លាមៗទេ ដោយធ្វើដូចជាមិនដឹងរឿង។

តែយ៉ាងណា ក្មេងស្រីរងគ្រោះបានប្រាប់រឿងនេះទៅប្រាប់ ជីដូន និងឪពុកម្តាយនាង ទើបមានការមកប្តឹង ហើយក៏ឈានឲ្យមានការចុះទៅចាប់ខ្លួន។ លោកអធិការរងបានបញ្ជាក់ថាក្រោយពីមានការនាំខ្លួនមកសាកសួរ ជនល្មើសបាន ទទួលឆ្លើយសារភាព ទើបកម្លាំងជំនាញ កសាងសំណុំរឿងបញ្ជូនខ្លួនបន្តមកស្នងការដ្ឋាន៕