ចោរចូលលួចក្នុងអង្គការ តែសមត្ថកិច្ចមិនចង់ទម្លាយ

ចោរចូលលួចក្នុងអង្គការ តែសមត្ថកិច្ចមិនចង់ទម្លាយ

ខេត្តបាត់ដំបង ៖ ជនមិនស្គាល់មុខបានគាស់បង្អូចចូលលួចយកសម្ភារ និងលុយកាក់អស់គ្មានសល់ ស្ថិតក្នុងបន្ទប់ស្នាក់នៅនៃអង្គការមួយរបស់ជប៉ុន ក្នុងភូមិកំពង់សីម៉ា សង្កាត់វត្តគរ ក្រុងបាត់ដំបង ដែលកើតឡើងកាលពីវេលារំលងអធ្រាត្រ ឈានចូលថ្ងៃទី១៣ កក្កដា តែត្រូវសមត្ថកិច្ចបានព្យាយាមលាក់បាំង ដោយសារករណីបែបនេះ កើតឡើងច្រើនដងពេក ព្រោះតែទប់ស្កាត់ ឬបង្ក្រាបមិនបាន ។

បើតាមប្រភពឱ្យដឹងថា ទីតាំងកើតហេតុ ជាស្នាក់ការអង្គការ «សមាគមកប្បាសកម្ពុជា» ស្ថិតក្នុងភូមិ-សង្កាត់ខាងលើ ។ ប្រធាននៃអង្គការនេះ ឈ្មោះភឹង វិសាល ភេទប្រុស អាយុ២៨ឆ្នាំ និងលោកអាត ស៊ូស៊ីហ្វូរ៉ូឡាវ៉ា ជនជាតិជប៉ុន ជាម្ចាស់ជំនួយ ។ ប្រភពដដែលបន្តថា ជនមិនស្កាល់មុខ អាចចូលតាមរបងខាងក្រោយ ទាំងកណ្ដាលអធ្រាត្រ រួចគាស់ទ្វារបង្អួចចូលទៅក្នុងលួចយកទ្រព្យសម្បត្តិតែម្ដង ។

ប្រភពដដែលបញ្ជាក់ថា ជនសង្ស័យបានចូលទៅលួចយកសម្ភារនៅក្នុងបន្ទប់ដេក ខណៈមន្ត្រីអង្គការកំពុងដេកលក់ ហើយមិនបានចាក់គន្លឹះពីខាងក្នុង ។ ប៉ុន្តែនៅខាងក្រៅបន្ទប់ ក៏មានបំពាក់កាមេរ៉ាសុវត្ថិភាពដែរ ហើយថតជាប់នូវសកម្មភាពជនសង្ស័យនោះផង ។ សមត្ថកិច្ចហាក់មិនបានព្យាយាមលាក់បាំងនូវព័ត៌មាននេះ សំរាប់អ្នកសារព័ត៌មាន បើទោះជាបានចុះទៅពិនិត្យកន្លែងកើតហេតុរួចរាល់ហើយក្ដី ដោយអះអាងថា មន្ត្រីជំនាញកំពុងតាមប្រមាញ់ជនសង្ស័យ ដែលមានភិនភាគជាប់នៅក្នុងកាមេរ៉ាសុវត្ថិ

ភាព ។

ប្រភពពីមន្ត្រីបង្ហើបឱ្យដឹងថា សមត្ថកិច្ចមិនចង់ទម្លាយរឿងនេះឱ្យបែកខ្ចរខ្ចាយ មិនមែនមានន័យថា នាំដល់ការបរាជ័យក្នុងការចាប់ខ្លួនជនសង្ស័យនោះទេ តែដោយសារករណីគាស់ទម្លុះទម្លាយលួចទ្រព្យសម្បត្តិពលរដ្ឋបែបនេះ វាកើតមានច្រើនលើកពេក នៅក្នុងខេត្តបាត់ដំបង ហើយសមត្ថកិច្ចទប់ស្កាត់ ឬការបង្ក្រាបមិនបាន ម្លោះហើយទើបសមត្ថកិច្ចព្យាយាមបិទបាំងខ្លះទៅ ដោយបានត្រឹមប្រើពាក្យកំពុងស្រាវជ្រាវបន្តតែប៉ុណ្ណោះ ។

ជុំវិញករណីចោរចូលលួចទ្រព្យសម្បត្តិក្នុងស្នាក់ការអង្គការខាងលើនេះ បើតាមអ្នកគ្រប់គ្រងអង្គការបានឲ្យដឹងថា សម្ភារដែលបាត់បង់រួមមាន អាយភេត២គ្រឿង ទូរស័ព្ទអាយហ្វូន១គ្រឿង ឡេបថប១គ្រឿង កាមេរ៉ាថតរូប ម៉ាកកាណុង១គ្រឿង ប្រាក់ដុល្លារអាមេរិកចំនួន១,០០០ដុល្លារ ប្រាក់តៃវ៉ាន់ចំនួន៥០០ដុល្លារ និងប្រាក់ថៃចំនួន២៤,០០០បាត ។

ជនរងគ្រោះបានបញ្ជាក់ថា កាមេរ៉ាសុវត្ថិភាពបានថតជាប់រូបភាពជនសង្ស័យនោះ តែជាប់ក្នុងរយៈពេលខ្លី ដោយសារតែជនសង្ស័យនោះមើលឃើញកាមេរ៉ា ហើយក៏ទាញផ្ដាច់ប្រព័ន្ធខ្សែកាមេរ៉ានោះចោល ។

សូមបញ្ជាក់ថា ករណីក្រុមចោរធ្វើសកម្មភាពគាស់ទម្លុះទម្លាយចូលលួចទ្រព្យសម្បត្តិប្រជាពលរដ្ឋនៅក្នុងក្រុងបាត់ដំបង ក៏ដូចជានៅតាមបណ្ដាស្រុកមួយចំនួននៅក្នុងខេត្ត ហាក់កំពុងកើនឡើនគួរឲ្យកត់សម្គាល់ ចាប់តាំងពីក្នុងអំឡុងឆ្នាំ២០១៥ រហូតមកដល់ពេលនេះ ។ រីឯការគ្រប់គ្រងមុខសញ្ញា ការទប់ស្កាត់ ឬការបង្ក្រាបរបស់សមត្ថកិច្ច ហាក់នៅមានកម្រិតទាបបំផុត ។

ភាពបរាជ័យនៃការទប់ស្កាត់ និងការបង្ក្រាបជនល្មើសនេះ បានធ្វើឱ្យប្រជាពលរដ្ឋបារម្ភយ៉ាងខ្លាំង អំពីបញ្ហាអសន្តិសុខនៅក្នុងមូលដ្ឋាន ហើយក៏ជាបរាជ័យមួយ ក្នុងការអនុវត្តនូវគោលនោយោបាយ «ភូមិ-ឃុំមានសុវត្ថិភាព» ដែលជាគោលនយោបាយដ៏ចម្បងរបស់រាជរដ្ធាភិបាលដែរ។