សើមៗ…! លោកចោរប្លន់ម៉ូតូមួយទៀតបានសម្រេច

សើមៗ…! លោកចោរប្លន់ម៉ូតូមួយទៀតបានសម្រេច

រាជធានីភ្នំពេញ ៖ នៅវេលាម៉ោង០៩និង៥១នាទីយប់ ថ្ងៃទី១១ ខែកក្កដានេះ តាមបណ្ដោយផ្លូវបេតុង ភូមិគោកចំបក់ សង្កាត់ចោមចៅ ខណ្ឌពោធិ៍សែនជ័យ (ជិតបន្ទាយទាហាន ភេរវកម្ម)មានករណីប្លន់យកម៉ូតូបានសម្រេចដោយសុវត្ថិភាព។ ប្រភពពីជនរងគ្រោះ បានបញ្ជាក់ថា រូបគេជាជនរងគ្រោះឈ្មោះ ភឹម អូន អាយុ២១ឆ្នាំ ជាកម្មករសំណង់ ស្នាក់នៅភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ មានស្រុកកំណើតនៅខេត្តកំពង់ធំ។

ចំណែកអ្នករួមដំណើរម្នាក់ទៀតឈ្មោះ ខៃ ប្រសិទ្ធ អាយុ២១ឆ្នាំ ជាកម្មកររោងចក្រ មានស្រុកកំណើតនៅក្នុងខេត្តកំពង់ស្ពឺ ជនរងគ្រោះទាំង២ត្រូវជាបងប្អូនជីដូនមួយនឹងគ្នា ហើយមានស្រុកកំណើតនៅខេត្តកំពង់ធំដូចគ្នា។ ជនរងគ្រោះបានប្រាប់បន្តថា គេទាំង២នាក់បាននាំគ្នាជិះម៉ូតូត្រឡប់មកពីមើលក្មួយឈឺ នៅមន្ទីរពេទ្យ គន្ធ បុប្ផា ។

ស្រាប់តែមកដល់ចំណុចកើតហេតុ ក៏បានលេចមុខជនសង្ស័យ៣នាក់ ជិះម៉ូតូ២គ្រឿង ហើយបានវាយទៅលើជនរងគ្រោះ បង្កឲ្យមានរបួសស្នាមពេញខ្លួន ទើបដកកាំភ្លើងបាញ់ ឡើងលើ រួចក៏ជិះម៉ូតូទៅបាត់ដោយសុវត្ថិភាព។ រីឯម៉ូតូដែលបាត់ម៉ាក ហុងដា ឌ្រីម សេ១២៥ ពណ៌ខ្មៅ ស៊េរី២០១៦ មួយគ្រឿងពាក់ស្លាកលេខ ស្វាយរៀង ២៥៤២ ។ បច្ចប្បន្នសមត្ថកិច្ចកំពុងតែកត់កំណត់ហេតុ កសាងសំណុំរឿង ដើម្បីស្វែងរកជនសង្ស័យដែលបានយកម៉ូតូ ជនរងគ្រោះ មកផ្ដន្ទាទោសទៅតាមផ្លូវច្បាប់ ៕

ប្រភព ៖ កោះសន្តិភាព

កំណត់ហេតុខ្មែរឡូត៖

គួររំលឹកដែរថា ដោយឡែកករណី ស្រដៀងគ្នានេះដែរ ក្រុមចោរប្រដាប់អាវុធមានគ្នា៣នាក់ ជិះម៉ូតូ២គ្រឿង បានធ្វើសកម្មភាពភ្ជង់ប្លន់យកម៉ូតូ១គ្រឿង របស់បុរសម្នាក់ដោយសុវត្ថិភាព នៅវេលាម៉ោងប្រហែល១០ព្រឹកថ្ងៃទី៨ ខែកក្កដា ឆ្នាំ២០១៦ កន្លងទៅ នៅតាមបណ្ដោយផ្លូវក្នុងភូមិទួលសង្កែ សង្កាត់ទួលសង្កែ ខណ្ឌឫស្សីកែវ។

ជនរងគ្រោះ បានប្រាប់សមត្ថកិច្ចថា ក្រុមចោរមានគ្នា៣នាក់ ជិះម៉ូតូ២គ្រឿងម៉ាកសង់សេ១២៥ និងMSXប្រដាប់ដោយអាវុធខ្លីចំនួន២ដើម បានមកធ្វើសកម្មភាពភ្ជង់ប្លន់ យកម៉ូតូរបស់គាត់១គ្រឿង ម៉ាកសង់ឌ្រីមសេ១២៥ សេរីឆ្នាំ២០១៥ តែក្រុមជនបង្កពុំបានបាញ់ឡើយ ទើបមិនបណ្ដាលឲ្យមានរបួស ខណៈម៉ូតូ១គ្រឿង ដែលក្រុមចោរប្លន់យកទៅនោះ ជនរងគ្រោះទើបតែខ្ចីពីអ្នកស្គាល់គ្នា មកជិះតែប៉ុណ្ណោះ។

បន្ទាប់ពីកើតហេតុ ជនរងគ្រោះ បានត្រឹមតែមកដាក់ពាក្យ បណ្ដឹងនៅ ប៉ុស្តិ៍នគរបាលទួលសង្កែ ដើម្បីឲ្យសមត្ថកិច្ចជួយ អន្តរាគមន៍តែប៉ុណ្ណោះ៕