ហ៊ីយ៉ាន់ដាយបុកម៉ូតូពីក្រោយពេញទំហឹង ស្លាប់ម្នាក់

ហ៊ីយ៉ាន់ដាយបុកម៉ូតូពីក្រោយពេញទំហឹង ស្លាប់ម្នាក់

ខេត្តកណ្តាល ៖ បុរសម្នាក់បានស្លាប់ នៅនិងកន្លែងកើតហេតុក្នុងករណីគ្រោះថ្នាក់ចរាចរណ៍ រវាងរថយន្តបុកជាមួយម៉ូតូ កាលពីវេលាម៉ោង០៦និង១០នាទី ថ្ងៃទី០៨ខែកក្កដា លើកំណាត់ផ្លូវជាតិលេខ១ត្រង់ចំណុចចន្លោះបង្គោលគីឡូម៉ែត្រលេខ៣៨-៣៩ ស្ថិតក្នុងភូមិព្រែកតាកែវ២ ឃុំសំរោងធំ ស្រុកកៀនស្វាយ ខេត្តកណ្តាល។

ជនរងគ្រោះឈ្មោះ សៅឌី រតនៈ ភេទប្រុស អាយុ២២ឆ្នាំ ជិះម៉ូតូម៉ាកសេ១២៥ពណ៌ខ្មៅ ពាក់ស្លាកលេខ កណ្តាល1N-7531មានទីលំនៅភូមិព្រែកថ្មី ឃុំរកាខ្ពស់ស្រុកស្អាង ខេត្តកណ្តាល។ ចំណែករថយន្តបង្ក ម៉ាកហ៊ីយ៉ាន់ដាយពណ៌សគ្មានស្លាកលេខ។ ក្រោយពីបង្កគ្រោះថ្នាក់ចរាចរណ៍ឲ្យមានមនុស្សស្លាប់ រួចអ្នកបើកបរបានរត់គេចខ្លួនបាត់ស្រមោល ដោយបន្សល់ទុកតែរថយន្តនៅនឹងកន្លែងកើតហេតុ។

ប្រភពព័ត៌មានបាននិយាយថាមុនពេលកើតហេតុ គេឃើញជនរងគ្រោះជិះម៉ូតូម្នាក់ឯងក្នុងទិសដៅពីអ្នកលឿងទៅភ្នំពេញ លុះមកដល់ចំណុចខាងលើក៏ត្រូវរថយន្តបង្កបើកបរស្របទិសគ្នាបុកប៉ះចំហៀងម៉ូតូផ្នែកខាងក្រោយ បណ្តាលឲ្យអ្នកបើកបរខ្ទាតចេញពីម៉ូតូដួលទៅលើថ្នល់ត្រូវកង់រថយន្តកិនចំក្បាលបែកចេញខួរស្លាប់តែម្តង។

ក្រោយកើតហេតុសមត្ថកិច្ចនគរបាលជំនាញចុះសហការជាមួយនគរបាលប៉ុស្តិ៍ពិនិត្យ និងធ្វើការវាស់វែងប្រមូលយកមធ្យោបាយទាំង២ទៅរក្សាទុកបណ្តោះអាសន្ន នៅអធិការដ្ឋាននគរបាលស្រុក ដើម្បីចាត់ការបន្តតាមច្បាប់ចរាចរណ៍ផ្លូវគោគ៕

ប្រភព ៖ BBC

កំណត់ហេតុខ្មែរឡូត៖

គួររំលឹកដែរ ហេតុការណ៍ថ្នាក់ចរាចរណ៍មួយ បន្ទាប់ពីជិះម៉ូតូទាក់ដៃចង្កូតគ្នា បណ្តាលឱ្យដួលរងរបួសធ្ងន់ម្នាក់ ពេលនោះ មានអ្នកចូលទៅជួយសង្គ្រោះបឋម តែក៏បន្លំលួចយកទូរស័ព្ទអាយហ្វូនមួយគ្រឿងបាត់ដែរ ចំណែកអ្នកមិនរងរបួស បានជិះម៉ូតូគេចខ្លួនបាត់ ដែលហេតុការណ៍នេះកើតឡើង កាលពីវេលាម៉ោង១០ និង២០នាទីយប់ថ្ងៃទី៧ កក្កដា កន្លងទៅ តាមបណ្តោយផ្លូវ២៧១ ស្ថិតក្នុងសង្កាត់ទឹកថ្លា ខណ្ឌសែនសុខ ។

ប្រភពពីសន្តិសុខយាមមុខខារ៉ាអូខេម្នាក់ឱ្យដឹងថា មុនពេលកើតហេតុ គេឃើញបុរសម្នាក់ជិះម៉ូតូធំម៉ាក XR ពណ៌ក្រហម ពាក់ស្លាកលេខភ្នំពេញ1FX-2321 ក្នុងទិសដៅពីជើងទៅត្បូង ។ លុះមកដល់ចំណុចកើតហេតុ ស្រាប់តែមានម៉ូតូមួយគ្រឿងទៀត មិនចាំម៉ាក បើកយ៉ាងលឿនហើយវ៉ាម៉ូតូរងគ្រោះ ធ្វើឱ្យទាក់ដៃចង្កូតម៉ូតូ បណ្តាលឱ្យដួលបោកទៅទ្រូងផ្លូវរងរបួសធ្ងន់ ។ ចំណែកម៉ូតូបង្កបានបើកគេចខ្លួនបាត់។ ភ្លាមៗនោះដែរ មានបុរសម្នាក់ធ្វើជាជួយសង្គ្រោះ ប៉ុន្តែបន្លំលូកយកទូរស័ព្ទដៃរបស់ជនរងគ្រោះម៉ាកiPhone6 យកទៅបាត់។

ក្រោយពេលកើតហេតុ រថយន្តសង្គ្រោះបានមកដល់ដឹកយកជនរងគ្រោះយកទៅព្យាបាលនៅមន្ទីរពេទ្យព្រះកុសុមៈ ចំណែកឯម៉ូតូវិញ ត្រូវសមត្ថកិច្ចយកទៅរក្សាទុកអោយនៅប៉ុស្តិ៍រដ្ឋបាលនគរបាលទឹកថ្លា ។