មិត្តភាពជ្រាលជ្រៅ…លោក ហាក់ ធៀមុនី ទៅចូលរួមបុណ្យសពឪពុកមិត្តភ័ក្ដិដល់បាងកក

មិត្តភាពជ្រាលជ្រៅ…លោក ហាក់ ធៀមុនី ទៅចូលរួមបុណ្យសពឪពុកមិត្តភ័ក្ដិដល់បាងកក

តារាសម្ដែង និងជាពិធីករទូរទស្សន៍ លោក ហាក់ ធៀមុនី បានចាកចេញពីរាជធានីភ្នំពេញព្រឹកមិញនេះហើយ ដោយសំដៅទៅក្រុងបាងកក ជាទីដែលលោកត្រូវបង្ហាញវត្តមានជួយរំលែកទុក្ខមិត្តល្អមួយរូប ដែលទើបត្រូវលោកឪពុកស្លាប់ចោល។

លោក ហាក់ ធៀមុនី នឹងត្រូវឲ្យទាន់ពិធីបុណ្យដែលនឹងប្រារព្ធនៅថ្ងៃនេះតែម្ដង ដែលប្រារព្ធធ្វើឡើងនៅវត្តព្រះស្រីមហាធាតុក្នុងក្រុងបាងកក ដោយលោកបានជ្រើសយកការធ្វើដំណើរដោយជើងយន្តហោះ។ “និយាយពីចំណាយ គឺអស់ច្រើនហើយបង ប៉ុន្តែជាមិត្តភ័ក្ដិ បើគិតតែលើចំណុចនេះមិនកើតទេ យើងមិនមានអ្វីផ្ដល់ជូនទេ គឺមានតែទឹកចិត្តហ្នឹងហើយ…ហើយនេះជាវប្បធម៌របស់ខ្មែរយើងដូចនឹងពាក្យថា “ជួយគ្នាក្នុងគ្រាមានអាសន្ន” នេះឯង ” លោក ហាក់ ធៀមុនី បញ្ជាក់មុនចាកចេញ។

ក្នុងដំណើរប្រញាប់ប្រញាល់លោក មុនី មិនបានប្រាប់ថាលោកឪពុករបស់មិត្តល្អរបស់លោកនោះ ឈ្មោះអ្វី ស្លាប់នៅពេលណា និងដោយសារអ្វីឡើយ។ តែលោកប្រាប់ថាមិត្តល្អរបស់លោកឈ្មោះ ThodsaphonPhlayngam ដែលពួកលោកបានស្គាល់គ្នាយូរហើយ។

តារាសម្ដែង និងជាពិធីករទូរទស្សន៍ ដែលទើបប្រកាសមិនទទួលថតស្ប៉តពាណិជ្ជកម្មផ្តល់ផលប៉ះពាល់ដល់សុខភាពថ្មីនេះ ប្រាប់ថា លោកឲ្យតម្លៃខ្លាំងលើមិត្តភាព និងការរាប់អានព្រោះថាទាំងនេះវាសំខាន់ណាស់ក្នុងដំណើរជីវិតដ៏វែងឆ្ងាយរបស់មនុស្សម្នាក់ៗ។
“ការរាប់អាននាំឲ្យមនុស្សទទួលឱកាសផ្សេងៗក្នុងជីវិតការងារ ដូចខ្ញុំជាដើម បានលោកជំទាវ ចន្ធី លោកស្រី ថុង ស៊ីវទៀង លោក ស៊ុន សណ្ដោស លោកស្រី តាន់ សុវណ្ណឌី និងចុងក្រោយនេះ លោក កៅ សីហា បានផ្ដល់ឱកាសការងារមួយចំនួន ក៏ដោយសារការរាប់អាននេះហើយ អីចឹងហើយខ្ញុំសូមអរគុណជ្រាលជ្រៅដល់ពួកគាត់”។ លោក ហាក់ ធៀមុនី ថ្លែង។

លោក មុនី ប្រាប់ទៀតថា គិតដល់ចំណុចនេះ ទើបលោកខ្ញុំសុខចិត្តធ្វើដំណើរទៅចូលបុណ្យសពឪពុកមិត្តភ័ក្ដិដល់ប្រទេសថៃ បើទោះជាក់ស្ដែងលោកកំពុងមមាញឹកក្នុងការងារក៏ដោយ។

លោក ហាក់ ធៀមុនី ជាតារាសម្ដែងមកពីខេត្តកំពង់ចាម។ លោក ត្រូវបានគេស្គាល់ក្រោយបានសម្ដែងរឿង “សំឡាញ់” ក្រោយមកមានរឿង ”ទួលកម្មប្រចាំស្នេហ៍” និងរឿង “ជ្រលងភ្នំស្នេហ៍” ជាដើម។ ក្រៅពីលោក ក៏មានវត្តមានលើស្ប៉តពាណិជ្ជកម្មមួយចំនួនដែរ ដូចជាស្ប៉តទឹកសុទ្ធវីតាល់ E-nat400 និងទឹកសណ្ដែកហូមសយ និងស្រាផែនដីជាដើម។

តារាសម្ដែងរៀនចប់ថ្នាក់អនុបណ្ឌិតផ្នែកគ្រប់គ្រងពាណិជ្ជកម្មលោក ហាក់ ធៀមុនី ទើបប្រកាសឈប់ទទួលថតស្ប៉តពាណិជ្ជកម្មផលិតផលផ្ដល់ប៉ះពាល់សុខភាពថ្មីៗនេះ។ “ខ្ញុំជាបុគ្គលដែលបញ្ចេញការសម្ដែងផ្សព្វផ្សាយទៅគ្រប់ទីកន្លែង។ ដូច្នេះខ្ញុំ មិនចង់ផ្ដល់ផលប៉ះពាល់ណាមួយដល់សាធារណជនទេ”៕

ប្រភព: sabay

មុន បន្ទាប់

មតិយោបល់