បង្ក្រាបបទល្មើសនេសាទ ក្នុងភូមិសាស្ត្រ៣គោលដៅ

បង្ក្រាបបទល្មើសនេសាទ ក្នុងភូមិសាស្ត្រ៣គោលដៅ

ខេត្តកំពង់ឆ្នាំង ៖ សមត្ថកិច្ចចម្រុះ ដឹកនាំដោយនាយរងខណ្ឌ រដ្ឋបាលជលផលកំពង់ឆ្នាំង នៅព្រឹកថ្ងៃទី០៤ ខែកក្កដា ឆ្នាំ២០១៦ បានចែកគ្នាជា៣គោលដៅ ដើម្បីទៅបង្ក្រាបបទល្មើសនេសាទ ក្នុងរដូវបិទ នេសាទ ដើម្បីរក្សាការពារ ក្នុងខែត្រីពង កូន។ លោក ម៉ុប សាម៉ុន នាយរងខណ្ឌរដ្ឋបាលជលផល កំពង់ឆ្នាំងបានឲ្យដឹងថា ក្នុងរដូវបិទនេសាទ ដែលហាមឃាត់ប្រជាពលរដ្ឋ នេសាទដោយខុសច្បាប់ នៅព្រឹកថ្ងៃទី៤ ខែកក្កដានេះ ។

សមត្ថកិច្ចចម្រុះ ដឹកនាំដោយនាយរងខណ្ឌរដ្ឋបាលជលផលកំពង់ឆ្នាំង ចែកចេញជា៣គោលដៅ ចេញបង្ក្រាបបទល្មើសនេសាទ ក្នុងនោះមានគោលដៅក្នុងភូមិសាស្ត្រស្រុកកំពង់លែង គោលដៅស្រុកកំពង់ត្រឡាច និងគោលដៅក្រុងកំពង់ឆ្នាំង បូកស្រុករលាប្អៀរ ។ ជាលទ្ធផលទាំង៣គោលដៅសរុបរួមបាន បំផ្លាញចោល របាំងស្បៃមុង របាំងរាំងផ្ជឹតព្រែក លបប្រើស១០០ និងលបលូ ជាដើម ដោយបានបំផ្លាញចោលរបាំងស្បៃមុង និងរបាំងរាំងកាត់ព្រែក ចំនួន៤៦កន្លែង ស្មើនឹប្រវែង១០១០ម៉ែត្រ លប,លូ ៦០មាត់ បង្គោល ៣៧០ដើម និងចាក់លែង ត្រីចម្រុះ ៥០គីឡូក្រាម ។

កិច្ចប្រតិបត្តិការខាងលើ បានប្រើប្រាស់កម្លាំងសរុប ៣០នាក់ មធ្យោបាយ និងកាណូតបាឡាស្មាច់ ៧គ្រឿង ។ លោកនាយរងខណ្ឌរដ្ឋបាល ជលផល បានអោយដឹងដែរថា ក្នុងការបង្ក្រាប បទល្មើសខាងលើ គឺបទល្មើសមិនសូវកើតឡើងនោះទេ ដោយមូលហេតុថា ទឹកទន្លេមិនទាន់ឡើងលិចខ្នងកោះខ្លាំងនៅឡើយទេ កន្លែងខ្លះលិចដែរ តែនៅតិចតួច ម្លោះហើយបទល្មើសក៏មិនទាន់កើតមានដែរ ចំណែកកន្លែងខ្លះទៀតដែលឆ្នាំកន្លងទៅ សំបូរបទល្មើស ទឹកមិនទាន់មាននៅឡើយ ទើបធ្វើឲ្យបទល្មើសគ្មាន។ លោកក៏បានបញ្ជាក់ដែរថា ប៉ុន្មានថ្ងៃ កន្លងទៅនេះ ទឹកទន្លេបានឡើងខ្លាំង តែពេលនេះបានស្រកទៅវិញប្រមាណជាង៣តឹក ហើយបើសិនមានភ្លៀងធ្លាក់ផ្ទួនគ្នាគ្រប់កន្លែងទៀត ទឹកនឹងឡើងលិចខ្នងកោះ គ្រប់កន្លែងតែម្តង ។

ដោយឡែកលោក សោម ភារុណ នាយខណ្ឌរដ្ឋបាលជលផល ដែលកំពុងមានភារកិច្ច នៅភ្នំពេញ ក៏បានប្រាប់តាមទូរសព្ទ័ថា លោកសូមអំពាវនាវ ឲ្យប្រជាពលរដ្ឋទាំងអស់ បញ្ឈប់ការនេសាទខុសច្បាប់ ក្នុងរដូវបិទនេសាទនេះ ដោយទុកឱកាសឲ្យត្រី ពងកូន និងម្យ៉ាងវិញទៀត សូមអំពាវនាវ ដល់ប្រជាពលរដ្ឋ សូមចូលរួមទាំងអស់គ្នា បើឃើញបទល្មើសកើតឡើងនៅកន្លែងណា សូមរាយការណ៍មកមន្ត្រីជំនាញ ឲ្យទាន់ពេលវេលា ៕