ផែនទីបង្ហាញស្ថានភាពគ្រោះថ្នាក់ នៅតាមតំបន់ប្រាសាទ

ផែនទីបង្ហាញស្ថានភាពគ្រោះថ្នាក់ នៅតាមតំបន់ប្រាសាទ

រាជធានីភ្នំពេញ ៖ អាជ្ញាធរជាតិអប្សរាបានបង្ហាញនូវស្ថានភាពគ្រោះថ្នាក់នៅតាមប្រាសាទ និងតាមរចនាសម្ព័ន្ធបុរាណដ្ឋាននានា ក្នុងគោលដៅធ្វើយ៉ាងណា រកឱ្យឃើញថា តើចំណុចណាមួយ ដែលកំពុងមានគ្រោះថ្នាក់ខ្លាំងមធ្យម ឬតិចតួច ។

ផែនទីនេះ មានឈ្មោះថាផែនទីហានិភ័យ (Risk Map) ជាផែនទីចាត់ចំណាត់ថ្នាក់គ្រោះថ្នាក់ ងាយស្រួលឱ្យសម្រាប់អ្នកអភិរក្ស ងាយកំណត់ថា តើចំណុចគ្រោះថ្នាក់ណាគួរសង្គ្រោះបន្ទាន់ ហើយចំណុចណាដែលអាចទុកជួសជុលនៅពេលក្រោយ ។

ក្នុងបទបង្ហាញទៅកាន់គណៈកម្មាធិការអាយស៊ីស៊ី-អង្គរ កាលពីថ្ងៃទី២២ មិថុនា ឆ្នាំ២០១៦ នេះ លោកហង់ ពៅ អគ្គនាយករង ទទួលបន្ទុកនាយកដ្ឋានគ្រប់គ្រងទឹកនៃអាជ្ញាធរជាតិអប្សរាបានលើកឡើងថា នៅតំបន់អង្គរមានប្រាង្គប្រាសាទធំៗជាច្រើន ដែលរងគ្រោះថ្នាក់ទ្រុឌទ្រោម ដោយសារកត្តាផ្សេងៗ មានអាយុកាលនៃការសាងសង់យូរ មានសង្គ្រាមស៊ីវិល អាកាស ធាតុ ប្រជាពលរដ្ឋនិងកំណើនភ្ញៀវទេសចរជាដើម ។

នៅឆ្នាំ២០១២ យើងបានបង្កើតគម្រោងហានិភ័យនៃបេតិកភណ្ឌ ដែលមានគោលដៅសិក្សាពីហានិភ័យនៃប្រាង្គប្រាសាទ អាកាស ធាតុប្រព័ន្ធធារាសាស្ត្រ ប្រជាពលរដ្ឋ និងភ្ញៀវទេសចរ ព្រោះកត្តាទាំងអស់នេះ វាជាចង្កោមមួយមានទំនាក់ទំនងគ្នាទាំងអស់ ។

លោកបន្តថា បើមានដើមឈើមួយដួល ឬទ្រេត តើដើមឈើហ្នឹង វាមានទីតាំងនៅកន្លែងណា?

អ៊ីចឹង អ្នកជំនាញអាចប្រាប់ថា ដើមឈើនេះ នៅខាងក្នុងវាមានលក្ខណៈមិនល្អវាពុក ហើយក្នុងករណីធម្មតាដើមឈើ វាមិនដួល ឬទ្រេតទេ វាអាចនៅរស់បាន ប៉ុន្តែបើចៃដន្យមានខ្យល់បក់បោកខ្លាំង ឬមានទឹកហូរបុកខ្លាំង វាធ្វើឲ្យដើមឈើដួលទៅទិសណា ហើយវាប៉ះពាល់ទៅដល់អ្វីខ្លះ?

ប្រភព ៖ កោះសន្ដិភាព

ការកត់សម្គាល់ខ្មែរឡូត៖

គួររំលឹកថា កាលពីពេលកន្លងទៅនេះ មានការប្រើប្រាស់បច្ចេកវិទ្យាឡាស៊ែបានពិនិត្យទៅលើស្ថានភាពផ្ទៃដី ក៏បានរកឃើញអាណាចក្រទីក្រុងបុរាណដ៏ស្កឹមស្កៃ ដែលបង្កប់ក្នុងព្រៃអង្គរវត្តនៃព្រះរាជាណាចក្រកម្ពុជា ដែលទីក្រុងបុរាណទាំងនោះ ត្រូវគេដឹងថា បានកសាងតាំងពីសតវត្សន៍ទី១២មកម្ល៉េះ ។

បុរាណវិទូបានរកឃើញទីក្រុងជាច្រើន ដែលមិនបានមានកំណត់ត្រាពីមុនមក នៅក្នុងឯកសារ និងមានអាយុកាលចន្លោះពី៩០០ឆ្នាំ ទៅ១៤០០ឆ្នាំ នៅទីក្រុងអង្គរ ។ ទីក្រុងបុរាណទាំងនោះ ខ្លះ មានទំហំធំជាងទីក្រុងបច្ចុប្បន្នទៅទៀត ។

ការស្រាវជ្រាវរកគឺដឹកនាំដោយលោកដុកទ័រ Damian Evans រួមជាមួយសាកលវិទ្យាល័យនៃទីក្រុងស៊ីដនីនេះ បានធ្វើនៅឆ្នាំ២០១៥ ដោយប្រើប្រាស់បច្ចេកវិទ្យាឡាស៊ែពិនិត្យមើល ស្ថានភាពផ្ទៃដី ដែលអាចឱ្យយើងឃើញសភាពគ្រប់យ៉ាងនៅលើផ្ទៃផែនដី ។ គេបានឃើញមានប្រាសាទផ្លូវ និងប្រព័ន្ធទឹកខ្វាត់ខ្វែងនៅក្នុងព្រៃក្បែរអង្គរវត្ត ។

លោកដុកទ័រ Damian Evans បានប្រាប់ឲ្យដឹងថា ការរកឃើញនេះ គឺអាចទាញសេចក្តីសន្និដ្ឋានថា យើងមិនដែលធ្លាប់គិតដល់ថា មនុស្សបានផ្លាស់ប្តូរអ្វីៗ ដែលនៅជុំវិញគេដល់ថ្នាក់នេះសោះ។អ្នកជំនាញផែ្នកបុរាណវិទ្យាលោក David Chandler ជឿថា របកគំហើញនេះ ជាជំហានមួយយ៉ាងសំខាន់ ដែលអាចឱ្យយើងដឹងពីការរីកចម្រើន និងការថយចុះឥទ្ធិពលរបស់សម័យអង្គរឱ្យកាន់តែច្បាស់លាស់ ។