កាប់ចាក់ប្រហារ ដោយសាររាំធុងបាស់

កាប់ចាក់ប្រហារ ដោយសាររាំធុងបាស់

ខេត្តកំពង់ធំ ៖ ជនសង្ស័យចំនួន៤នាក់ត្រូវបានកម្លាំងសមត្ថកិច្ច នគរបាលស្រុកកំពង់ស្វាយសហការណ៍ ជាមួយនឹងកម្លាំងនគរបាលប៉ុស្តិ៍ធ្វើការឃាត់បានពីបទបង្កអំពើហិង្សាទៅលើយុវជនម្នាក់បណ្តាលឲ្យរងរបួសធ្ងន់។ លោកវរសេនីយ៍ត្រី ខេន ឈុនគ័រ អធិការនគរបាលស្រុកកំពង់ស្វាយ ខេត្តកំពង់ធំ បានប្រាប់ឲ្យដឹងនៅល្ងាចថ្ងៃទី១៩ ខែមិថុនា ឆ្នាំ២០១៦នេះថា ករណីអំពើហិង្សាទៅលើយុវជនម្នាក់បណ្តាលឲ្យរងរបួសធ្ងន់ខាងលើនេះបានកើតឡើងកាលពីវេលាម៉ោង១១និង៣០នាទីយប់ ថ្ងៃទី១៨ ខែមិថុនា ឆ្នាំ២០១៦ ស្ថិតនៅក្នុងភូមិតៀមចាស់ ឃុំកំពង់ស្វាយ ។

ជនដៃដល់ត្រូវបាន កម្លាំងសមត្ថកិច្ចនគរបាល យើងធ្វើការឃាត់ខ្លួនបានជនសង្ស័យចំនួន៤នាក់ ពីបទបង្ករអំពើហិង្សា នៅចំណុចភូមិឃុំកើតហេតុខាងលើ ខណៈពេលរាំធុងបាសក្នុងកម្មវិធីបុណ្យ១ក្នុងភូមិ ទៅលើជនរងគ្រោះឈ្មោះ ឃឹម សុហៀង ភេទប្រុស អាយុ២១ឆ្នាំ រស់នៅភូមិកើតហេតុបណ្តាលឲ្យ រងរបួសជាទម្ងន់ដោយសារជនសង្ស័យព្រួតគ្នាវាយ និងចាក់ទៅលើជនរងគ្រោះត្រូវចំបំពង់ក វាយចំក្បាល ដងខ្លួន និងចំច្រមុះរបួសធ្ងន់ ហើយជនសង្ស័យត្រូវបានកម្លាំងសមត្ថកិច្ច សហការណ៍ជាមួយប្រជាការពារ និងប្រជាពលរដ្ឋចាប់ខ្លួនបានបន្ទាប់ពីបង្កហេតុរួច។

ជនសង្ស័យជាក្មេងស្ទាវទាំង៤នាក់រួមមានទី១.ឈ្មោះ ឈឿន ឈាត ភេទប្រុស អាយុ១៨ឆ្នាំ មានទីលំនៅភូមិថ្ម ឃុំជៃពក ស្រុកព្រះស្តេច ខេត្តព្រៃវែង ទី២.ឈ្មោះ ធា សុថុង ភេទប្រុស អាយុ១៩ឆ្នាំ រស់នៅភូមិស្ទឹង ឃុំសំរោងធំ ស្រុកកៀនស្វាយ ខេត្តកណ្តាល ទី៣.ឈ្មោះ សំ បែន ភេទប្រុស អាយុ១៨ឆ្នាំ រស់នៅភូមិព្រែកសំរោង សង្កាត់តាខ្មៅ ក្រុងតាខ្មៅ ខេត្តកណ្តាល និងទី៤. ឈ្មោះ ឆុន ចាន់ ភេទប្រុស អាយុ២២ឆ្នាំ រស់នៅភូមិស្ទឹង ឃុំសំរោងធំ ស្រុកកៀនស្វាយ ខេត្តកណ្តាល ។ នៅចំពោះមុខសមត្ថកិច្ចជនសង្ស័យបានសារភាពថា ពួកគេពិតជាបានប្រព្រឹត្តនូវអំពើហិង្សា ដោយបានយកដំបងឬស្សី និងកូនកាំបិតទៅចាក់ ហើយវាយទៅលើជនរងគ្រោះខាងលើ ពិតប្រាកដមែន ខណៈនៅពេលរាំធុងបាស់មានការកាច់កុង និងឌឺដងដាក់គ្នា។ ជនសង្ស័យទាំង៤នាក់ ត្រូវបានសមត្ថកិច្ចចងក្រងសំណុំរឿងចាត់ការបន្តតាមនិតិវិធីច្បាប់៕

ប្រភព ៖ កោះសន្តិភាព

កំណត់ហេតុខ្មែរឡូត៖

គួររំលឹកដែរថា សមត្ថកិច្ចបានឲ្យដឹងថា ក្មេងប្រុសអាយុ១៤ឆ្នាំម្នាក់បានរងរបូសធ្ងន់ ដោយសារត្រូវបុរសម្នាក់ដែលគេសង្ស័យថា ជាមនុស្សបែកថ្នាំផង បានប្រើពូថៅកាប់ទាំងកំរោង កាលពីវេលាម៉ោង៨និង៣០នាទីព្រឹក ថ្ងៃទី១៦មិថុនា កន្លងទៅ នៅក្នុងភូមិតាង៉ែន ឃុំតាគ្រាម ស្រុកបាណន់ ហើយជនដៃដលបានរត់គេចខ្លួនបាត់ភ្លាមៗដែរ។ សមត្ថកិច្ចបានប្រាប់ថា ក្មេងប្រុសរងគ្រោះឈ្មោះ តូ មៀវ អាយុ១៤ឆ្នាំ នៅភូមិឃុំខាងលើ រីឯជនបង្កឈ្មោះ សិខ ឬទ្ធី អាយុ៣៦ឆ្នាំ នៅភូមិឃុំជាមួយគ្នា។ ជនរងគ្រោះត្រូវជនបង្កកាប់ចំនួន២ពូថៅ ត្រូវចំផ្ទៃមុខនិងលើក្បាល បណ្ដាលឲ្យរងរបួសធ្ងន់ ហើយក្រោយពីមានការភ្ញាក់ផ្អើល ជនដៃដល់បានរត់គេចខ្លួនបាត់ភ្លាមៗដែរ។

បើតាមអ្នកភូមិនិយាយថាឈ្មោះ សុខ ឬទ្ធី ជាមនុស្សញៀនថ្នាំដល់កម្រិត ហើយមិនដែលឃើញដេកផ្ទះទេ។ គេតែងឃើញជននេះសៀតពូថៅជាប់ខ្លួនរហូត និងធ្លាប់ដេញកាប់ភូមិជាញឹកញាប់ទៀតផង នៅពេលសុំអ្វីៗពីអ្នកភូមិមិនបាន។ គេនៅមិនទាន់ដឹងអំពីមូលហេតុដែលនាំឲ្យបុរសបែកថ្នាំនោះកាប់ក្មេងប្រុសនោះទេ តែពេលនេះសមត្ថកិច្ចកំពុងតាមស្វែងរកចាប់ខ្លួនបុរសញៀនថ្នាំនោះហើយ៕