រាយខ្សែលួសឆក់កណ្តុរ ភ្លាត់ស្នៀតឆក់ខ្លួនឯងស្លាប់

រាយខ្សែលួសឆក់កណ្តុរ ភ្លាត់ស្នៀតឆក់ខ្លួនឯងស្លាប់

ខេត្តកណ្តាល ៖ បុរសម្នាក់បានបាត់បង់ជីវិត ខណៈដើរមើលខ្សែលួសដែលខ្លួនភ្ជាប់ចរន្តអគ្គិសនី ដាក់ឆក់កណ្តុរកុំឲ្យចូលស៊ីស្រូវ ក៍ភ្លាត់ស្នៀត រអិលជើងដួលទៅលើខ្សែលួស បណ្តាលឲ្យឆក់ស្លាប់តែម្តង។ ហេតុការនេះបង្កឲ្យមានការ ភ្ញាក់ផ្អើលនៅវេលាម៉ោង៨និង៣០នាទីយប់ ថ្ងៃទី០៩ ខែមិថុនា ត្រង់ចំណុចកែងទំនប់តាម៉ូវស្ថិតក្នុងភូមិបឹងគ្រំក្រោម ឃុំបឹងគ្រំ ស្រុកល្វាឯម ខេត្តកណ្តាល។

ជនរងគ្រោះឈ្មោះ នុត ថន ភេទប្រុស អាយុ៥៣ឆ្នាំ ជនជាតិខ្មែរ មុខរបរកសិកររស់នៅភូមិឃុំកើតហេតុខាងលើ។ តាមប្រភពនិយាយថា នៅវេលាម៉ោង៥ល្ងាច ថ្ងៃដដែលជនរងគ្រោះបានយកអាគុយដែលមានកម្លាំង៤០អំពែមួយគ្រឿងដុំឆក់ឆ្នៃ១ និងខ្សែលួសប្រវែង ៣៤០ម៉ែត្រ ចេញពីផ្ទះទៅរាយតចរន្តភ្លើងអាគុយពទ្ធ័ជុំវិញដីស្រែរបស់ខ្លួននៅខាងក្រោយផ្ទះដូចសព្វដង ដើម្បីការពារឆក់កណ្តុរកុំឲ្យចូលស៊ីស្រូវ។

លុះដល់វេលាម៉ោង៨និង៣០នាទីយប់ ថ្ងៃដដែលជនរងគ្រោះបានដើរមើល ស្រាប់តែដើរបានប្រហែល ២០ម៉ែត្រចម្ងាយពីរោង ក៏រអិលជើងដួលផ្កាប់មុខទៅលើខ្សែលួសបណ្តាលឲ្យឆក់ស្លាប់នៅនឹងកន្លែងគ្មានអ្នកណាដឹង។ លុះក្រោយមក ប្អូនប្រុសបង្កើតរបស់ជនរងគ្រោះ ឈ្មោះ នុត ថា យាមដីស្រូវប្រាំងក្បែរនោះមើលមកឃើញភ្លើងពិលរបស់ជនរងគ្រោះចាញ់បំភ្លឺឡើងទៅលើ ក៏រត់មកស្រែកហៅបងមិនឮឆ្លើយ ពេលមកដល់ស្រាប់តែឃើញបងប្រុស ដួលផ្កាប់មុខដោយដៃកាន់ខ្សែលួសក៍រត់ទៅដោះអាគុយចាប់លើកបងឡើងតែហួសពេលព្រោះ ជនរងគ្រោះបានដាច់ខ្យល់ស្លាប់ទៅហើយ។

ក្រោយទទួលបានព័ត៌មាននេះភ្លាមសមត្ថកិច្ចជំនាញសហការណ៍ជាមួយគ្រូពេទ្យ និងនគរមូលដ្ឋានចុះទៅ ធ្វើកោសល្យវិច័យលើសាកសព។ បន្ទាប់ពិនិត្យរួចបញ្ជាក់ថាជនរងគ្រោះពិតជាស្លាប់ក្នុងករណី រអិលដួលទៅលើខ្សែលួសឆក់ ខ្លួនឯកប្រាកដមែនមិនមានពាក់ពន្ធករណីឃាតកម្មទេ ហើយសាច់ញាតិក្រុមគ្រួសារ ក៏ទទួលស្គាល់ ទើបសមត្ថកិច្ចធ្វើកំណត់ហេតុប្រគល់ សាកសពជូនក្រុមគ្រួសាររៀបចំ ធ្វើបុណ្យតាមប្រពៃណី៕

ប្រភព ៖ កោះសន្តិភាព

កំណត់ហេតុខ្មែរឡូត៖

គួររំលឹកដែរថា បុរសម្នាក់ទៅនេសាទត្រីពេលយប់ ដើរកាត់តាមដីចម្ការគេ ហើយជាន់ខ្សែលួស ដែលម្ចាស់ចម្ការរាយតចរន្តអគ្គិសនី ឆក់កណ្តុរការពារ កុំឱ្យចូលស៊ីបន្លែ បណ្តាលឱ្យឆក់ស្លាប់ កាលពីវេលាម៉ោង០៣ និង៣០នាទីទៀបភ្លឺ ឈានចូលថ្ងៃទី០១ មីនា ២០១៦ ស្ថិតនៅចំណុច ចម្ការខាត់ណា ក្នុងភូមិដីឥដ្ឋកោះផុស២ ឃុំដីឥដ្ឋ ស្រុកកៀនស្វាយ ខេត្តកណ្តាល ។

ជនរងគ្រោះឈ្មោះហ៊ិន វិចិត្រ ភេទប្រុស អាយុ៣៥ឆ្នាំ មានទីលំនៅភូមិ-ឃុំកើតហេតុ ។ ចំណែកម្ចាស់ចម្ការ ដែលជាអ្នករាយខ្សែលួសតចរន្តអគ្គិសនីឆក់កណ្តុរឈ្មោះឌី ដឹប ភេទប្រុស អាយុ៥០ឆ្នាំ មានទីលំនៅភូមិ-ឃុំជាមួយគ្នា បានរត់គេចខ្លួនបាត់ ។

ប្រភពនិយាយថា កាលពីយប់ថ្ងៃទី២៩ កុម្ភៈ ២០១៦ មិនដឹងម៉ោង ម្ចាស់ចម្ការឈ្មោះឌី ដឹប បានទៅរាយខ្សែលួសតចរន្តអគ្គិនី ដើម្បីឆក់កណ្តុរ កុំឱ្យចូលស៊ីបន្លែរបស់ខ្លួន ហើយដើរមកដេកនៅផ្ទះដោយមិនបានចាំមើលទេ ។ លុះដល់ម៉ោងជាង៣ទៀបភ្លឺ ទើបមានការភ្ញាក់ផ្អើលថា ជនរងគ្រោះឈ្មោះហ៊ិន វិចិត្រ ទៅឆក់ត្រីនៅអូរក្រោយផ្ទះ ហើយបានដើរកាត់ដីចម្ការរបស់ឈ្មោះឌី ដឹប ក៏ជាន់ខ្សែលួស ដែលម្ចាស់ចម្ការតចរន្តអគ្គិសនីឆក់កណ្តុរនោះ បណ្តាលឱ្យឆក់ស្លាប់ ។ លុះដល់វេលាម៉ោងខាងលើ ម្ចាស់ចម្ការមកមើលបន្លែ ទើបដឹងថា មានមនុស្សឆក់ស្លាប់ ក៏រត់គេចខ្លួនបាត់តែម្តង ៕