ខេត្តមណ្ឌលគិរី ៖ ស្នែង​សត្វ​ខ្ទីង ២​ក្បាល និង​ស្នែងទន្សោង ៣​ក្បាល ត្រូវ​បាន​សមត្ថកិច្ច​រឹបអូស​ចេញពី​លំនៅ ស្ថាន​មួយ​កន្លែង​ដែល​ស្ថិត​នៅ​ក្នុងភូមិ​រង្សី ឃុំ​ស្រែ​សង្គម ស្រុក​កោះ​ញែក ខេត្តមណ្ឌលគិរី​។​ប្រតិបត្តិ​ការណ៍​នេះ បាន​ធ្វើ​ឡើង​នៅ​ម៉ោង​ប្រមាណ​ជា​៨​និង​១០​នាទី​ព្រឹក ថ្ងៃ​០៩ ខែឧសភា ឆ្នាំ​២០១៦​នេះ​។

ក្នុង​ប្រតិបត្តិការ​ដែល​ធ្វើ​ឡើង​ដោយ​ក្រុម​សមត្ថកិច្ច​ចម្រុះ​រួម​មាន នគរបាល អាវុធហត្ថ មន្ត្រី​ព្រៃឈើ ព្រមទាំង​មន្ត្រី​គាំពារ​សត្វព្រៃ បាន​ធ្វើការ​ឃាត់ខ្លួន​ម្ចាស់ផ្ទះ​ម្នាក់ ដើម្បី​សាកសួរ​ផង​ដែរ ក្រោយ​ពេល​រក​ឃើញ ក្បាលសត្វ​ដែល​មាន​ស្នែង​ជាក់ស្តែង​នៅ​ក្នុង​លំនៅ​ស្ថាន​នោះ​។

លំនៅ​ស្ថាន​ដែល​ក្រុម​សមត្ថកិច្ច​ឆ្មក់​ចូល និង​ឆែកឆេរ​នោះ​ជា​កម្ម​សិទ្ធ​របស់​ឈ្មោះ អ៊ុ​ន សា​វុ​ធ ភេទ​ប្រុស អាយុ​៥៩​ឆ្នាំ ជា​ជនជាតិ​ខ្មែរ ស្នាក់​នៅ​ក្នុងភូមិ​ឃុំ​ខាងលើ​។ បច្ចុប្បន្ន​ឈ្មោះ អ៊ុ​ន សា​វុ​ធ កំពុង​ស្ថិត​នៅ​ផ្នែក​រដ្ឋបាល​ព្រៃឈើ​កោះ​ញែក ក្រោម​ការ​សួរនាំ​ពី​មន្ត្រី​ព្រៃឈើ​។

ដោយឡែក វត្ថុ​តាង ក៏​ត្រូវ​បា​នប​ញ្ជួ​ន​ទៅ​កាន់​ស្នាក់​ការ​របស់​អង្គការ​វាយ​អេ​ត ដើម្បី​រក្សា​ទុក​បណ្តោះអាសន្ន​ផង​ដែរ​។ ទោះជា​យ៉ាងណា​នៅ​ម៉ោង​ប្រមាណ​ជា​២​រសៀល​ថ្ងៃ​ដដែល​នេះ គេ​នៅ​មិន​ទាន់​ទ​ទូល​ព័ត៌មាន បន្ថែម​ណាមួយ​ពី​មន្ត្រី​ជំនាញ​នៅឡើយ ពាក់ព័ន្ធ​នឹង​ករណី​មួយ​នេះ​៕

ប្រភព ៖ កោះសន្តិភាព

កំណត់ហេតុខ្មែរឡូត៖

គួររំលឹកដែរថា ទាក់ទងនឹងករណីយស្រដៀងគ្នានេះដែរ មន្រ្តីយោធាគ៣ ចំនួន៣នាក់ រួមនិងមេគ៣ នៅស្រុកកោះញែក សង្ស័យមានការ ជាប់ពាក់ព័ន្ធ ករណី សម្លាប់សត្វខ្ទីង ក្នុងស្រុកកោះញែក កាលពីព្រឹកថ្ងៃទី១០ ខែមីនា ឆ្នាំ២០១៦ កន្លងទៅនេះ ។ លោក យិន ចន្ទី មេបញ្ជាការយោធាព្រំដែនលេខ១០៣ និងធ្វើការកោះហៅមន្រ្តីពាក់ព័ន្ធ៣រូប ដើម្បីសួរនាំ រីឯមេគ៣ ឈ្មោះ ហ៊ឹម សុផាត អាចលោក សុំគោលការណ៍ថ្នាក់លើ ដកតំណែង គ្រាដែលមេគ៣រូបនេះ សំបូរដោយរឿងរ៉ាវច្រើន ។ 

លោកកែវ សុ ភគ៌ អនុប្រធានព្រៃការពារមណ្ឌលគិរី បានថ្លែងប្រាប់អ្នកឆ្លើយ ឆ្លងព័ត៌មាននៅព្រឹកថ្ងៃទី១០ខែមីនា ឆ្នាំ២០១៦នេះថា តាមការស្រាវជ្រាវរបស់លោកផ្ទាល់ និងមន្រ្តីរបស់លោកទាក់ទង ករណីនេះឈាន ទៅរកការ កំណត់មុខសញ្ញា អ្នកប្រព្រឹត្តរហូតមានពន្លឺ ៩០% ហើយព្រោះសាក្សីដែលបាន ឃើញហេតុការណ៍ក្នុងរឿងនេះ យ៉ាងពិតប្រាកដ ។ លោកបានប្រាប់ថា មន្រ្តីយោធាគ៣ ដែលជាប់សង្ស័យចំនួន៣នាក់ នោះទីមួយឈ្មោះ អ៊ុក សារុន ទីពីរ ឈ្មោះ ឯក សំពៅ ទីបី ឈ្មោះ សុខ មករា នៅមានប្រជាជនចំនួន២នាក់ទៀត ជាប់ពាក់ព័ន្ធ ទីមួយឈ្មោះ យ៉ើល ចេក ទីពីរ ឈ្មោះលាង ។

លោក​ កែវ សុភគ៌ នៅតែអះអាងជំហររបស់ខ្លួនថា លោកនិងបន្តការស៊ើបអង្កេតករណីនេះ រហូតចប់ចុង ចប់ដើម និងឈានទៅរកការឃាត់ខ្លួន ដើម្បីប្រគល់ជូនតុលាការ ចាត់ការតាមផ្លូវច្បាប់ ។ លោក ឃិន ម៉េងស្រេង មេយោធា ខេត្តមណ្ឌលគិរី នៅព្រឹកថ្ងៃទី១០ ខែមីនា ឆ្នាំ២០១៦នេះ លោកបានថ្លែងប្រាប់ថា ជុំវិញករណីសម្លាប់ សត្វខ្ទីងនៅស្រុកកោះញែកខាងលើនេះ បើសិនជាខាងជំនាញឬ អយ្យកាស្រាវជ្រាវឃើញថា មន្រ្តីយោធានោះ ជាប់ពាក់ព័ន្ធក្នុងការបាញ់សម្លាប់មែន គឺទុកឱ្យច្បាប់ចាត់ការតាមនិតិវិធីច្បាប់ ។

ស្របពេលនេះដែរលោក មូល ផាតប្រធានអង្គការ wwf ប្រចាំខេត្តមណ្ឌលគិរី បានថ្លែងប្រាប់អ្នកឆ្លើយឆ្លងព័ត៌មាន កាលពីម្សិលម៉ិញថា លោកស្នើរឱ្យអាជ្ញាធរខេត្ត មន្រ្តីជំនាញពាក់ព័ន្ធរួមទាំងអង្គភាព កងកំលាំប្រដាប់អាវុធគ្រប់ប្រភេទ នៅក្នុងតំបន់នេះ ជួយជំរុញ និងបង្កើនវិធានការ ក្នុងការជួយទប់ស្កាត់ និងធ្វើការបង្រ្កាប ចំពោះការបរបាញ់សត្វព្រៃ គ្រប់ប្រភេទ ក៍ដូចជាការជួញដូរសត្វព្រៃ ប្រកបដោយប្រសិទ្ធភាពខ្ពស់ ដើម្បីថែរក្សានិងធ្វើការ អភិរក្សធនធានធម្មជាតិ ដូចជាសត្វព្រៃនិង ព្រៃឈើឱ្យបាននៅគង់វង្ស ៕

ខ្មែរឡូត