មេតុងទីនបោកលុយ ជាង៤០ម៉ឺនដុល្លារត់បាត់

មេតុងទីនបោកលុយ ជាង៤០ម៉ឺនដុល្លារត់បាត់

រាជធានីភ្នំពេញ ៖ ក្រុមអ្នកលេងតុងទីនចំនួន៣០នាក់ក្នុងចំណោមគ្នា៣០០នាក់ ដែលមេតុងទីនបោកយកលុយជាង៤០ម៉ឺនដុល្លា កាលពី៦ខែមុននោះ នៅមិនទាន់មានដំណោះស្រាយនៅឡើយទេ ។ ហើយពួកគាត់បានបន្តលើកគ្នា ទៅកាន់សាលាសង្កាត់ចោមចៅ ដើម្បីសុំអន្តរាគមន៍ពីសំណាក់អាជ្ញាធរបន្តទៀត កាលពីវេលាម៉ោង៣រសៀលថ្ងៃទី៦ ខែមិថុនា ឆ្នាំ២០១៦ ។

សមាជិកតុងទីនបាននិយាយថា ពួកគាត់ភាគច្រើនគឺជាអាជីវករ លក់ដូរនៅក្នុងផ្សារឯករាជ្យ២ ភូមិព្រៃព្រីង សង្កាត់ចោមចៅ ខណ្ឌពោធិ៍សែនជ័យ បានលេងតុងទីនម្នាក់ៗមចាប់ពី៥ក្បាលឡើងទៅ ដែលក្នុង១ក្បាលៗ ចាប់ពី១ម៉ឺនរៀល ដល់២០០ដុល្លារហើយសរុប ទាំងអស់ជាង៤០ម៉ឺនដុល្លារឯណោះ និងត្រូវបានមេប្រមូលយក រត់ចោលបាត់ស្រមោល។

ប្រភពដដែលបន្តថា មេតុងទីននោះឈ្មោះ ទឹម ស្រីនាង អាយុប្រហែល៤២ឆ្នាំ មានទីលំនៅ ក្នុងភូមិត្រពាំងធ្នង់ សង្កាត់សំរោងក្រោម បានវេចបង្វិចទៅចោលពួកគាត់រយៈពេល៦ខែមកហើយ និងបានយកលុយទៅឲ្យក្រុមគ្រួសារធ្វើផ្ទះវីឡាយ៉ាងស្កឹមស្កៃ នៅក្នុងភូមិត្រពាំងធ្នង់នោះ។

បន្ទាប់ពីមេតុងទីនរត់ចោល ពួកគាត់បាននាំគ្នា ទៅប្ដឹងអាជ្ញាធរឲ្យជួយដោះស្រាយ ចំនួន៣លើកមកហើយ ប៉ុន្តែដោះមិនចេញមិនតែប៉ុណ្ណោះ នៅរាល់ពេលដោះស្រាយនោះ ឪពុកមេតុងទីនម្នាក់នោះ ក៏បានទៅជួបអាជ្ញាធរជំនួសកូនស្រី របស់ខ្លួនដែរប៉ុន្តែគាត់បាន បដិសេធថាអត់ដឹងថាកូនគាត់ទៅណាទេ និងបានប្រកាសកាត់កាល់កូនស្រីម្នាក់នោះចោលនៅនឹងមុខអាជ្ញាធរថែមទៀតផង។

ប្រភពខាងលើបានបន្តថា មេតុងទីនម្នាក់នោះមានតូបលក់ដូរនៅក្នុងផ្សារដែរ ពួកគាត់បានលើកគ្នា ទៅកាន់សាលាសង្កាត់នាពេលនេះ គឺដើម្បីឲ្យអាជ្ញាធរជួយដោះស្រាយទៀត តើត្រូវរឹបអូសតូបលក់ដូរ លក់យកលុយចែលចាយគ្នាឬបែបណា ប៉ុន្តែពេលទៅដល់អាជ្ញាធរនៅតែមិនអាចដោះស្រាយចេញដដែល៕