ផឹកស៊ីស្រវឹង ជិះម៉ូតូធ្លាក់ស្រះទឹកបណ្ដាលឲ្យរងរបួសធ្ងន់

ផឹកស៊ីស្រវឹង ជិះម៉ូតូធ្លាក់ស្រះទឹកបណ្ដាលឲ្យរងរបួសធ្ងន់

រាជធានីភ្នំពេញ ៖ នៅវេលាម៉ោង៩យប់ថ្ងៃទី០៦ ខែមិថុនានេះ តាមបណ្តោយផ្លូវបេតុង ភូមិក្រាំងដូនតី សង្កាត់ចោមចៅ ខណ្ឌពោធិ៍សែនជ័យ នៅជិតទីស្នាក់ការភូមិត្រពាំងដូនតី មានករណីបុរសម្នាក់បើកបរក្នុងស្ថានភាពស្រវឹង ដួលម៉ូតូធ្លាក់ចូលស្រះទឹកបណ្ដាលឲ្យរងរបួសធ្ងន់ ។ តាមប្រភពព័ត៌មានពីបុរសម្នាក់ដែលជាមិត្តរួមការងារជាមួយជនរងគ្រោះ បានឲ្យដឹងថា នៅមុនពេលកើតហេតុ ពួកគេបាននាំគ្នាផឹកស៊ី នៅភូមិព្រៃល្ង សង្កាត់ចោមចៅ ខណ្ឌពោសែនជ័យ ។

នៅពេលចប់កម្មវិធីសព្វគ្រប់ ជនរងគ្រោះបានជិះម៉ូតូរបស់ខ្លួនម៉ាកឌូក ពណ៌ស ពាក់ស្លាកលេខ ភ្នំពេញ 1AC-7978 ក្នុងស្ថានភាពស្រវឹងឌុបជូនមិត្តភក្តិម្នាក់ទៀតទៅផ្ទះ នៅពេលត្រឡប់មកវិញ ដល់ត្រង់ចំណុចកើតហេតុ ក៏បានដួលម៉ូតូធ្លាក់ចូលស្រះទឹក បណ្ដាលឲ្យរងរបួសធ្ងន់ ។ ក្រោយពេលកើតហេតុ ជនរងគ្រោះត្រូវបានរថយន្តសង្គ្រោះ៧១១ ដឹកទៅព្យាបាលនៅមន្ទីពេទ្យបង្អែក ពោធិចិនតុង ។ ចំណែកឯម៉ូតូត្រូវបានសមត្ថកិច្ច យកទៅរក្សាទុកនៅប៉ុស្ដិ៍នគរបាល សង្កាត់ចោមចៅ ដើម្បីរង់ចាំក្រុមគ្រួសារមកទទួលយក ៕

ប្រភព ៖ កោះសន្តិភាព

កំណត់ហេតុខ្មែរឡូត៖

គួររំលឹកដែរថា ទាក់ទងនឹងករណីយស្រដៀងគ្នានេះដែរ បុរសម្នាក់ស្រវឹងស្រាជោគជាំ បើករថយន្ដរកកន្លែងដេកមិនទាន់ បុកចូលគ្លីនិកលក់ថ្នាំពេទ្យ បង្កឱ្យមានភាពភ្ញាក់ផ្អើលដល់ប្រជាពលរដ្ឋ នៅក្រុងខេមរភូមិន្ទខេត្តកោះកុង។

ហេតុការណ៍គ្រោះថ្នាក់ចរាចរណ៍នេះ កើតឡើងនៅយប់រំលងអាធ្រាត្រឈានចូលថ្ងៃទី២៨ ខែឧសភា ឆ្នាំ២០១៦ កន្លងទៅ ស្ថិតក្នុងភូមិ២ សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង។

សមត្ថកិច្ចមូលដ្ឋាន បានឱ្យដឹងថា មុនពេលកើតហេតុបុរសម្នាក់ឈ្មោះ ឃុន សៅរិទ្ធ អាយុ២៧ឆ្នាំ បំរើការនៅក្រុមហ៊ុនស្រាបៀរ បើករថយន្ដហ៊ីយ៉ានដាយ ពាក់ស្លាកលេខបន្ទាយមានជ័យ2A-5836 រួមជាមួយអ្នករួមដំណើរបីនាក់មិនស្គាល់ឈ្មោះ បានបុកចូលគ្លីនិកលក់ថ្នាំពេទ្យ១កន្លែង ស្ថិតជិតរង្វង់មូលយាយរែល សំណាងគ្មានអ្នករងគ្រោះធ្ងន់ធ្ងរ តែបណ្ដាលឲ្យគ្លីនិច និងរថយន្ដខូចខាតយ៉ាងដំណំ។

ក្រោយពេលកើតហេតុ រថយន្ដត្រូវបានសមត្ថកិច្ចយកទៅរក្សាទុក នៅអធិការដ្ឋាននគរបាលក្រុងខេមរភូមិន្ទ ដើម្បីរង់ចាំការដោះស្រាយ៕