ភ័យស្ទើរលស់ព្រលឹង ពេលទៅភ្ជួរស្រែលើដីទុកចោលយូរឆ្នាំ

ភ័យស្ទើរលស់ព្រលឹង ពេលទៅភ្ជួរស្រែលើដីទុកចោលយូរឆ្នាំ

ខេត្តសៀមរាប ៖ ប្រជាពលរដ្ឋមួយគ្រួសារ បានទៅភ្ជួរដីស្រែរបស់គាត់ដែលទុកចោលជាយូរឆ្នាំមកហើយ ស្រាប់តែប្រទះឃើញគ្រាប់មិនទាន់ផ្ទុះ ជាច្រើនគ្រាប់ធ្វើឲ្យរូបគាត់ភ័យស្ទើរលស់ព្រលឹង ហើយក៏រត់ទៅរាយការណ៍ប្រាប់ សមត្ថកិច្ចឲ្យជួយអន្តរាគមន៍ហៅខាងអ្នកឯកទេសរាវមីន CMAC មកយកចេញ ដើម្បីឱ្យពួកគាត់បានធ្វើស្រែស្រួលបួលផង ។ ហេតុការណ៍ភ្ញាក់ផ្អើលនេះកើតឡើង កាលពីវេលាម៉ោង៨ និង៣០នាទីព្រឹក ថ្ងៃទី០២ ខែមិថុនា ឆ្នាំ២០១៦ ស្ថិតនៅចំណុចខាងជើងឆៀងខាងកើតអណ្តូងសក្រម ភ្នំខ្សាក ស្ថិតក្នុងភូមិខ្វាវ ឃុំខ្វាវ ស្រុកជីក្រែង ខេត្តសៀមរាប ។

តាមសម្តីរបស់លោកវរសេនីយ៍ត្រី ហង្ស វិចិត្រ មេបញ្ជាការមូលដ្ឋាននៃកងរាជអាវុធហត្ថស្រុកជីក្រែង បានប្រាប់«កោះសន្តិភាព» ឲ្យដឹងថា បន្ទាប់ពីមានប្រជាពលរដ្ឋរាយការណ៍មកថា មានមួយគ្រួសារបានទៅភ្ជួរស្រែ ហើយប្រទះឃើញគ្រាប់មិនទាន់ផ្ទុះនោះ លោកក៏បានឱ្យកម្លាំងទៅដល់ទីនោះ រួចក៏ឃើញដូចការរាយការណ៍របស់ប្រជាពលរដ្ឋពិតមែន។

លោកបន្តថា ក្រោយពីឃើញគ្រាប់មិនទាន់ផ្ទុះ លោកក៏បានឱ្យពួកគាត់ឈប់ភ្ជួរសិន រួចរាយការណ៍ទៅឱ្យមន្ត្រីជំនាញរបស់ CMAC មកជួយយកចេញ ដើម្បីឱ្យពួកគាត់បានធ្វើស្រែ ។ លោកបានបញ្ជាក់ថា ពលរដ្ឋដែលប្រទះឃើញគ្រាប់មិនទាន់ផ្ទុះនៅវាលស្រែរបស់គាត់នោះ ឈ្មោះ ញ៉ូវ ព្រិច ភេទប្រុស អាយុ២៥ឆ្នាំ មានមុខរបរកសិករ រស់នៅភូមិខ្វាវ ឃុំខ្វាវ ស្រុកជីក្រែង ខេត្តសៀមរាប។

លោកបានបញ្ជាក់បន្ថែមថា បន្ទាប់ពីសាកសួរពលរដ្ឋនោះមក គាត់បានប្រាប់ថា ដីស្រែរបស់គាត់មិនដែលបានធ្វើនោះទេ ពួកគាត់ទុកចោលតាំងពីសម័យសង្គ្រាមមកម្ល៉េះ ហើយនៅពេលដែលចាប់ផ្តើមភ្ជួរដីធ្វើស្រែ ក៏ប្រទះឃើញគ្រាប់យុទ្ធភណ្ឌមិនទាន់ផ្ទុះនោះតែម្តង ដែលមានចំនួន៣០គ្រាប់ ក្នុងនោះមាន គ្រាប់ B40.5 ចំនួន២១គ្រាប់ និងគ្រាប់៦២មីលីម៉ែត្រ ចំនួន៩គ្រាប់ ៕

ប្រភព ៖ កោះសន្តិភាព

កំណត់ហេតុខ្មែរឡូត៖

គួររំលឹកដែរថា ដោយឡែកករណីយមួយវិញទៀត គួរឲ្យអាណិតណាស់សម្រាប់ពលករខ្មែរម្នាក់ ពេលកំពុងដើរឆ្លងពីធ្វើការនៅ ប្រទេសថៃ មកដីខ្មែរវិញស្រាប់តែជាន់មីន បណ្តាលឲ្យខ្ទេចជើងម្ខាងមើលលែងយល់ គឺឈឺចាប់ខ្លាំងណាស់។

ហេតុការណ៍ជាន់មីននេះ បានកើតឡើងកាលពីរសៀលថ្ងៃទី១៤ ខែឧសភា ឆ្នាំ២០១៦ កន្លងទៅ ស្ថិតនៅនៅចំណុច ច្រករបៀងព្រៃគប់ (ព្រុំដែនកម្ពុជា-ថៃ) ស្ថិតក្នងភូមិព្រៃគប់ សង្កាត់ផ្សាកណ្តាល ក្រុងប៉ោយប៉ែត ខេត្តបន្ទាយមានជ័យ។

មន្រ្តីអាវុធហត្ថក្រុងប៉ោយប៉ែត បានឲ្យដឹងថា ជនរងគ្រោះឈ្មោះ សែត អាយុ ១៨ឆ្នាំ រស់នៅភូមិ គោកកក់ ឃុំស្វសាយចេក ស្រុកអង្គធំ ខេត្តសៀមរាប មុខរបរកម្មករ។ បច្ចុប្បន្នជនរងគ្រោះកំពុងសំរាកព្យាបាលនៅក្នុងមន្ទីរពេទ្យ បង្អែកក្រុងប៉ោយប៉ែត៕