ចោទថាលួចទាក់ទងប្រពន្ធ ស្ទាក់វាយកណ្ដាលផ្លូវ

ចោទថាលួចទាក់ទងប្រពន្ធ ស្ទាក់វាយកណ្ដាលផ្លូវ

រាជធានីភ្នំពេញ ៖ បុរសម្នាក់បានជិះម៉ូតូមកស្ទាក់វាយប្រតាយប្រតប់គ្នាជាមួយបុរសម្នាក់ទៀតដោយចោទថា បានលួចទាក់ទងជាមួយប្រពន្ធរបស់ខ្លួន បង្កអោយមានការភ្ញាក់ផ្អើលដល់ប្រជាពលរដ្ឋជិតខាង និងអ្នកធ្វើដំណើរតាមផ្លូវ នាំគ្នាមកចោមរោមឈរមើលយ៉ាងច្រើនកុះករ ។ ហេតុការណ៍នេះបានកើតឡើងកាលពីវេលាម៉ោង១០ និង៣០នាទីព្រឹក ថ្ងៃទី៣១ ខែឧសភា ឆ្នាំ២០១៦ នៅចំណុចផ្លូវព្រះមុនីរេត កែងផ្លូវលេខ៤៣០ ស្ថិតក្នុងសង្កាត់ទំនប់ទឹក ខណ្ឌចំការមន ។

នគរបាលប៉ុស្តិ៍ទំនប់ទឹកបានប្រាប់ឱ្យដឹងថា មុនពេលកើតហេតុមានបុរសវ័យជាង២០ឆ្នាំមិនស្គាល់ឈ្មោះម្នាក់ (បុរសពាក់អាវក្រឡា ស្លៀកខោខូវប៊យខៀវ) ជិះម៉ូតូ១គ្រឿង២នាក់ប្អូនស្រីរបស់ខ្លួនក្នុងទិសដៅពីត្បូងទៅជើង ឆ្លងកាត់ក្រោមស្ពានអាកាសស្ទឹងមានជ័យ ។ លុះមកដល់កន្លែងកើតហេតុ ក៏បានប្រទះឃើញបុរសវ័យជាង២០ឆ្នាំម្នាក់ (ពាក់អាវយឺតស្រាបៀរកម្ពុជា ស្លៀកខោខូវប៊យខ្មៅ) ជិះម៉ូតូ១គ្រឿងតែម្នាក់ឯង ហើយក៏ត្រូវបុរសម្នាក់ដែលមានដឹកប្អូនស្រីរបស់ខ្លួនពីក្រោយនោះជិះម៉ូតូទៅស្ទាក់ខាងមុខ រួចហៅអោយឈប់ និងអោយប្អូនស្រីរបស់ខ្លួនជិះម៉ូតូបន្តដំណើរទៅទៀតបាត់មុន ។

ប្រភពដដែលបានប្រាប់បន្តទៀតថា គ្រាន់តែចុះពីលើម៉ូតូ និងអោយប្អូនស្រីរបស់ខ្លួនជិះម៉ូតូចេញទៅបាត់ បុរសរូបនោះក៏បានរត់ទៅស្រវាយកដុំថ្មមួយដំធំប៉ុនកដៃក្នុងបំណងវាយសំពងទៅលើបុរសរូបម្នាក់នោះ តែសំណាងល្អបុរសរូបនោះបានឃើញ និងគេចទាន់ ដោយមិនទាន់ទាំងបានចុះពីលើម៉ូតូផង ។ ដោយបានឃើញសកម្មភាពរបស់បុរសខាងលើធ្វើការព្យាយាមវាយមកលើខ្លួនដោយកំហឹងនោះ បុរសរូបនោះក៏បានស្ទុះចុះពីលើម៉ូតូ និងធ្វើការប្រតាយប្រតប់តបតគ្នាទៅវិញទៅមកតែម្តង ភ្លាមនោះកម្លាំងនគរបាលមូលដ្ឋានក៏បានចុះមកធ្វើអន្តរាគមន៍ទាន់ពេវេលាផងដែរ ។

ពេលកម្លាំងនគរបាលប៉ុស្តិ៍ទំនប់ទឹកចុះមកធ្វើការអន្តរាគមន៍ ហើយធ្វើការសួរនាំពួកគេទាំង២នាក់ទើបបានដឹងថា ជារឿងបុរសម្នាក់ពាក់អាវក្រឡា ស្លៀកខោខូវប៊យខៀវ ប្រចណ្ឌប្រពន្ធរបស់ខ្លួន ដោយចោទថា បុរសម្នាក់ពាក់អាវយឺតខ្មៅស្រាបៀរកម្ពុជា ស្លៀកខោខូវប៊យខ្មៅ បានលួចមានទំនាក់ទំនងស្នេហាជាមួយប្រពន្ធរបស់ខ្លួនដែលធ្វើការជាមួយគ្នានោះ ។

បន្ទាប់ពីកម្លាំងនគរបាលមូលដ្ឋានធ្វើការសម្របសម្រួលរវាងបុរសទាំង២នាក់ ដោយមិនចង់អោយមានរឿងវែងឆ្ងាយ បុរសដែលរងការចោទប្រកាន់មិនបានដាក់ពាក្យបណ្តឹងអ្វីឡើយ ដោយតម្រូវអោយតែបុរសជាជនបង្កធ្វើការសំពះសុំទោសខ្លួនតែប៉ុណ្ណោះ ហើយគេបានអះអាងថា កាលពីពេលកន្លងមកខ្លួនមិនធ្លាប់បានស្គាល់បុរសជនបង្កនោះឡើយ ៕

ប្រភព ៖ កោះសន្តិភាព

កំណត់ហេតុខ្មែរឡូត៖

គួររំលឹកដែរថា ដោយឡែកនៅចិនឯណោះវិញ បុរសម្នាក់ស្រាត ននលគកបានតោងចុះ តាមបំពង់លូ ទាំងភិតភ័យឥតឧបមា បន្ទាប់ពីរូបគេកំពុងតែ លួចបង្កាត់ភ្លើងស្នេហ៍ ជាមួយប្រពន្ធអ្នកដទៃ ហើយត្រូវប្តី របស់គេតាមទាន់។

យោងតាមប្រភពព័ត៌មាន បានឲ្យដឹងថា ហេតុការណ៍នេះកើតឡើង នៅតាមដងផ្លូវដ៏មមាញឹកមួយ ក្នុងប្រទេសចិន ហើយសកម្មភាពទាំងនោះ ត្រូវបានថតតាមរយៈ កាមេរ៉ាដោយអ្នកដំណើរ ដែលឆ្លងកាត់នោះ និងយកមកបង្ហោះនៅក្នុង YouTube ដែលបានធ្វើឲ្យមនុស្ស ជាច្រើនកំពុងមានការ ភ្ញាក់ផ្អើលនិង ចាប់អារម្មណ៍យ៉ាងខ្លាំង។

បុរសម្នាក់ តោងចុះតាមបំពង់លូ ទាំងអាក្រាតកាយ ក្រោយពីលួចសាហាយស្មន់ ជាមួយប្រពន្ធអ្នកដទៃ

បើតាមការបញ្ជាក់បន្ថែម របស់ប្រភពដដែលនេះ បានឲ្យដឹងថា ដើមហេតុគឺផ្តើមចេញ ពីបុរសម្នាក់នោះ លួចទាក់ទងសាហាយស្មន់ ជាមួយនឹងនារីម្នាក់ ដែលមានប្តីរួចទៅហើយ គាប់ជួនពេលនោះ ពួកគេកំពុងតែ ល្អូកល្អឺននឹងគ្នា ក៏ស្រាប់តែប្តីរបស់នាង បានមកដល់ជាហេតុ នាំឲ្យបុរសដែល លួចទាក់ទងប្រពន្ធគេនេះ រកផ្លូវគេចខ្លួនមិនឃើញ មានតែចុះតាម បំពង់លូនៅខាងមុខ អគារទាំងអាក្រាតកាយ ដោយមិនខ្វល់អ្វីទៀតឡើយ។

បើមើលតាមវីដេអូនោះ យើងនឹងឃើញថា បុរសកំហូចម្នាក់នោះ បានតោងបំពង់លូ បង្អូសខ្លួនចុះចេញ ពីបន្ទប់មួយនៅអគារទី៣ តែមិនបានប៉ុន្មានផង រូបគេក៏បាន របូតដៃហើយ ធ្លាក់ចុះមកដី ដេកនៅលើចិញ្ចើមផ្លូវ ទាំងអាក្រាតកាយ និងប្រកបដោយ ក្តីឈឺចាប់ផងដែរ។ យ៉ាងណាមិញ ផ្អែកលើរបាយការណ៍បញ្ជាក់ បុរសម្នាក់នេះ មិនមានជារបួសធ្ងន់ធ្ងរ ណាស់ណានោះទេ។

នេះគឺជាករណីថ្មីមួយទៀតហើយ ទាក់ទងទៅនឹង ការលួចលាក់សាហាយស្មន់ ជាមួយនឹងប្តីប្រពន្ធរបស់គេ ហើយរឿងពិបាកៗ និងអាក្រក់ច្បាស់ជាកើតឡើង នៅពេលដែលគេតាមទាន់៕