ខេត្តសៀមរាប ៖ ផ្ទះ​អ្នកលក់​ត្រី​នៅ​ស្រុក​ក្រឡាញ់​មួយ​រូប​ត្រូវ​បាន​ក្រុម​ចោរ​អាកា​បាញ់​​ប្លន់​យក​គ្រឿងអលង្ការ និង​លុយ​សរុប​ជាង​៦​ពាន់​ដុល្លារ រួច​រត់គេច​ខ្លួន​បាត់​ដោយ​សុវត្ថិភាព ។ ហេតុការណ៍​នេះ​បាន​កើតឡើង​កាលពី​វេលា​ម៉ោង​៧​យប់ ថ្ងៃ​ទី​២៣ ខែឧសភា ឆ្នាំ​២០១៦ ស្ថិត​នៅ​ចំណុច​ភូមិ​ត្រពាំង​ច្រាំង ឃុំ​ក្រឡាញ់ ស្រុក​ក្រឡាញ់ ខេត្ត​សៀមរាប ចម្ងាយ​ប្រមាណ​១​គីឡូម៉ែត្រ​ពី​អធិការដ្ឋាន​នគរបាល​ស្រុក​ក្រឡាញ់ ។

លោក​វរសេនីយ៍ទោ ចាន់ សា​រ៉េ​ន អធិការ​នគរបាល​ស្រុក​ក្រឡាញ់ បាន​ប្រាប់​«​កោះសន្តិភាព​»​នៅ​រសៀល​ថ្ងៃ​ទី​២៤​ឧសភា​នេះ​ថា មុន​កើតហេតុ​មាន​ពលរដ្ឋ​រាយការណ៍​មក​ថា មាន​ករណី​ចោរប្លន់​ផ្ទះ​អ្នកលក់​ត្រី​ក្នុងភូមិ​កើតហេតុ​ខាងលើ ។ លោក​បន្ត​ថា បន្ទាប់​ពី​បាន​ព័ត៌មាន​ភ្លាម​ៗ​កម្លាំង​ជំនាញ​បាន​សហការ​ជាមួយ​កងរាជអាវុធហត្ថ​ក្រុង​-​ខេត្ត ចុះ​ទៅ​ដល់ទី​តាំង​កើតហេតុ រួច​ហៅ​ម្ចាស់ផ្ទះ​មក​ធ្វើការ​សួរនាំ ។

តាម​ការ​សាកសួរ ជន​រង​គ្រោះ​បាន​ប្រាប់​សមត្ថកិច្ច​ថា ក្រុម​ជនសង្ស័យ​មាន​គ្នា​៣​នាក់ ស្លៀកពាក់​ស៊ី​វិល​១​នាក់ ស្លៀកពាក់​ខោអាវ​ទាហាន​២​នាក់ ប្រដាប់​ដោយ​កាំភ្លើង​អាកា​២​ដើម បាន​ធ្វើ​សកម្មភាព​ភ្ជង់​ប្លន់ ។ ជន​រង​គ្រោះ​ឈ្មោះ ពរ រិ​ទ្ធ ភេទ​ប្រុស អាយុ​៤៦​ឆ្នាំ នៅ​ភូមិ​ត្រពាំង​ច្រាំង ឃុំ​ក្រឡាញ់ ស្រុក​ក្រឡាញ់ ខេត្តសៀមរាប ។

លោក​អធិការ​បន្ត​ទៀត​ថា ក្នុង​អំពើ​ប្លន់​នេះ​ជនល្មើស​បាន​បាញ់​១​គ្រាប់​គម្រាម​ជន​រង​គ្រោះ តែ​មិន​បណ្តាល​ឱ្យ​រង​របួស​ទេ ។ លោក​បញ្ជាក់​ថា ចំពោះ​ទ្រព្យ​សប្ប​ត្តិ​ដែល​ក្រុម​ចោរប្លន់​ពី​ជន​រង​គ្រោះ​មាន ខ្សែដៃ​មាស​៥​ជី ខ្សែ​ក​មាស​១​តម្លឹង ប្រាក់​ថៃ​៥​ម៉ឺន​បាត ប្រាក់​ដុល្លារ​៥០០​ដុល្លារ ប្រាក់​រៀល​៦​លាន​រៀល ។

លោក​អធិការ​នគរបាល​ស្រុក​ក្រឡាញ់ បាន​បញ្ជាក់​បន្ថែម​ទៀត​ថា ពេល​នេះ​កម្លាំង​របស់​អធិការ និង​កម្លាំង​កងរាជអាវុធហត្ថ​ស្រុក ខេត្តសៀមរាប កំពុង​ដុត​ដៃ ដុត​ជើង ស្វែងរក​មុខសញ្ញា​ជនល្មើស​យក​មក​ផ្តន្ទាទោស​តាម​ច្បាប់​ឱ្យ​ខាង​តែ​បាន ៕

ប្រភព ៖ កោះសន្តិភាព

កំណត់ហេតុខ្មែរឡូត៖

គួររំលឹកដែរថា ករណីស្រដៀងគ្នានេះដែរ មន្រ្តីនគរបាលអន្តោប្រវេសន៍ ក្រសួងមហាផ្ទៃម្នាក់ ត្រូវបានកម្លាំងអាវុធហត្ថស្រុកកៀនស្វាយ ខេត្តកណ្តាលចាប់ខ្លួន ក្រោយពីមន្រ្តីនគរបាលរូបនេះ បានបាញ់បោះសេរី នៅល្ងាចថ្ងៃទី២១ ខែឧសភា ឆ្នាំ២០១៦ ស្ថិតនៅចំការស្វាយភូមិកំពង់ស្វាយ ឃុំកំពង់ស្វាយ ស្រុកកៀនស្វាយ ខេត្តកណ្តាល។ មន្រ្តីអាវុធហត្ថខេត្តកណ្តាល បានឲ្យដឹងថា ជនបាញ់បោះរូបនេះមានឈ្មោះ ឡេង សុជាតិ អាយុ ៣៣ ឆ្នាំ ជាមន្ត្រីនគរបាលមានឋានន្តរស័ក្តិថ្នាក់អនុសេនីយ៍ឯក អត្តលេខ71985 បំរើការនៅអង្គភាព នាយកដ្ឋានរដ្ឋបាលសរុប នៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ។

ក្រោយការចាប់ខ្លួនកម្លាំងអាវុធហត្ថ បានដកហូត អាវុធខ្លីម៉ាក BERTTA លេខ PX5341M ផលិតនៅប្រទេសអុីតាលី បង់មួយមានគ្រាប់១៥គ្រាប់ និងសំបកកាទុសបាញ់រួចអស់ចំនួន៩គ្រាប់ លិខិតបេសកកម្ម 000454 ប័ណ្ណប្រើប្រាស់លេខ ខ អ 9 04365 និងអត្តសញ្ញាណប័ណ្ណ នគរបាលជាតិ១សន្លឹក។

យ៉ាងណាក៏ដោយ មិនទាន់មានការបញ្ជាក់ពីមន្រ្តីអាវុធហត្ថ ថា ការបាញ់បោះនេះ បណ្តាលមកពីមូលហេតុ អ្វីនោះទេ តែបើតាមប្រភពខ្លះអះអាងថា អាចបណ្តាលមកស្រវឹង។ បច្ចុប្បន្នខាងកំលាំងជំនាញកងរាជអាវុធហត្ថស្រុក កំពុងបន្តនីតិវិធី ដើម្បីចាត់ការតាមច្បាប់៕ 

ខ្មែរឡូត