ភ្នំពេញ​៖ ក្រោយ​បង្កគ្រោះថ្នាក់នៅ​ខណ្ឌ​ឬស្ស៊ីកែវ កាលពីថ្ងៃទី​១៨ខែឧសភា ឆ្នាំ​២០១៦ ​តារាចម្រៀងខេម បានបង្កគ្រោះថ្នាក់ចរាចរណ៍ បណ្តាល​ឲ្យ បុរស​ម្នាក់ស្លាប់ ប៉ុន្តែ​ក្រោយកើតហេតុ គេមិនដឹងថា រឿងនេះ បញ្ចប់យ៉ាងណានោះទេ ទើបតែ​ថ្ងៃទី ២៤ឧសភា នេះ លឺថា ខេម សម្រេច បញ្ចប់រឿងនេះ កុំឲ្យសៅហ្មងចិត្ត ដោយបង់ប្រាក់ ២៥​ពាន់ដុល្លារ​អាម៉េរិក​។ ប្រភព​ព័ត៌មាន​ បញ្ជាក់​ថា​ គ្រួសារ​ជនរងគ្រោះ​បាន ​ទាមទារ​សំណង​ចំនួន ​២៥០០០ដុល្លារ​ ជា​ថ្នូរ​នឹង​ការ​ដក​ពាក្យ​បណ្ដឹង​ ។

ប៉ុន្តែ​តម្លៃ​នេះ​ ភាគី​លោក​ ខេម​ ពុំ​ទាន់​យល់​ព្រម​នៅ​ឡើយ​ទេ​ ព្រោះ​លោក​អះអាង​ថា​ លោក​ពុំ​មែន​ជា ​អ្នក​ខុស​ឡើយ​ ។ បញ្ហា​នេះ​ ត្រូវបាន​អ្នក​ច្បាប់​អះអាងថា​ ទោះបី​​ ការ​សង​សំណង​បាន​បញ្ចប់​ បណ្តឹង​រដ្ឋប្បវេណី​ក៏ដោយ​ តែ​បណ្តឹង​អាជ្ញា​ ពោលគឺ​បទល្មើស​ព្រហ្មទណ្ឌ ​បុក​មនុស្ស​ស្លាប់​ ពុំ​អាច​បញ្ចប់​បាន​ទេ​ ។

មាត្រា​៨៥ ច្បាប់​ស្ដីពី ​ចរាចរណ៍​ផ្លូវ​គោក​ ចែង​ថា​ "​ ជនណា​បើកបរ ​ដោយ​ធ្វេសប្រហែស​ ខ្ជីខ្ជា​ មិន​ប្រុង​ប្រយ័ត្ន​ ឬ​ មិន​គោរព​កាតព្វកិច្ច​ដែល​ច្បាប់​ប្បញ្ញត្តិ​ស្តីពី​ចរាចរណ៍ ​ផ្លូវ​គោក​តម្រូវ​បណ្តាល ​ឲ្យ​ស្លាប់​អ្នក​ដទៃ​ ត្រូវ​ផ្តន្ទា​ទោស​ដាក់​ពន្ធនាគារ​ ពី​១ឆ្នាំ​ទៅ​៣ឆ្នាំ​ និង​ ពិន័យ​ជា​ប្រាក់​ពី​៤លាន​រៀល​ ទៅ​១៥លាន​រៀល​ និង​អាច​ផ្តន្ទា​ទោស​ដោយ ​ទោស​បន្ថែម​មួយ​ ឬ​ ច្រើន​ ដូច​មាន​ចែង​ក្នុង​មាត្រា​៥៣​ (ប្រភេទ​នៃ​ទោស​បន្ថែម​ )​ នៃ​ក្រម​ព្រហ្មទណ្ឌ​ "​ ។

ក្នុង​មាត្រា​៨៥​ ដដែល​នេះ​ ចែង​បន្ត​ថា​ "​ អំពើ​ល្មើស​ខាងលើ​នេះ​ ត្រូវ​ផ្តន្ទា​ទោស​ដាក់​ពន្ធនាគារ​ ពី​២ឆ្នាំ​ទៅ​៥ឆ្នាំ ​និង​ពិន័យ​ជា​ប្រាក់​ពី​១០លាន​រៀល​ទៅ ២៥លាន​រៀល​ កាលបើ​អំពើ​នេះ​បាន​ប្រព្រឹត្ត​ ៖​ ចំណុច​ "ឃ"​រត់​គេច​ខ្លួន​ពី​កន្លែង​កើត​ហេតុ ​ក្នុង​គោល​បំណង​គេច​វេស​ពី​ការ​ទទួល​ខុស​ត្រូវ​ ៕

ប្រភព ៖ ដើមអម្ពិល

ចំណាប់អារម្មណ៍ខ្មែរឡូត៖

គួររំលឹកផងដែរថា លោក លី ម៉ាត់លី ថ្លែងប្រាប់អ្នកយកព័ត៌មាន តាមទូរស័ព្ទនាថ្ងៃទី២១ ខែឧសភានេះថា រហូតមកដល់ពេលនេះ លោកមិនទាន់បានឃើញក្រុមគ្រួសារ របស់តារាចម្រៀង ខេម ចូលខ្លួនមករកដំណោះស្រាយ ករណីស្លាប់ប្អូនប្រុសរបស់លោកនៅឡើយទេ ខណៈដែលលោកបានផ្ញើសារទៅ និងទូរស័ព្ទ ប៉ុន្តែគ្មានការឆ្លើយតប។

លោក លី ម៉ាត់លី បាននិយាយថា «បាទ..! អត់ទេបង..! នៅទេ នៅមិនទាន់មានអ្នកមកដោះស្រាយទេ រហូតមកដល់ថ្ងៃនេះ ខ្ញុំកំពុងនៅមន្ទីរពេទ្យមើលកូនខ្ញុំឈឺ នៅឡើយ..! ហើយក៏អត់ទាន់មានខាងហ្នុង (គ្រួសារ ខេម) ទាក់ទងមកដែរ»។

លោក លី ម៉ាត់លី បានបន្តទៀតថា រយៈពេល២ ឬ៣ថ្ងៃនេះ ក្រុមគ្រួសាររបស់លោក បានរង់ចាំក្រុមគ្រួសារ របស់តារាចម្រៀង ខេម ចូលខ្លួនមក ដោះស្រាយគ្នាឲ្យបានចប់សព្វគ្រប់ លោកក៏មិនចង់វែងឆ្ងាយអ្វីដែរ ព្រោះបើបន្តឲ្យវែងឆ្ងាយ នាំឲ្យខាតពេលវេលា ហើយប្អូនប្រុសរបស់លោក ក៏មិនអាចមានជីវិតឡើងវិញដែរ។ ប៉ុន្តែប្រសិនបើក្រុមគ្រួសារ របស់តារាចម្រៀង ខេម នៅតែពន្យាពេល មិនព្រមចូលខ្លួនមកដោះស្រាយទេនោះ លោកនឹងមានវិធានការតាមច្បាប់ ពោលលោកនឹងប្ដឹងឡើងតុលាការតែម្ដង។

សូមបញ្ជាក់ថា ក្រុមគ្រួសារជនរងគ្រោះ ដែលបានស្លាប់នៅក្នុងហេតុការណ៍ គ្រោះថ្នាក់ចរាចរណ៍ រវាងរថយន្ត RANGE ROVER ពាក់ស្លាកលេខ 2X-9987 ដោយជួបគ្រោះថ្នាក់ចរាចរណ៍ជាមួយរថយន្ត ម៉ាក Celica ពណ៌ខ្មៅ ពាក់ស្លាកលេខ ភ្នំពេញ 2M-5575 នៅចំណុចមុខឃ្លាំង ស្ថាននីយប្រេងសូគីម៉ិច តាមបណ្តោយផ្លូវជាតិលេខ៥ ស្ថិតក្នុងសង្កាត់ឫស្សីកែវ ខណ្ឌឫស្សីកែវ បានអះអាងប្រាប់ Khmer Talking កាលពីរសៀលថ្ងៃទី១៨ ខែឧសភាកន្លងទៅថា តារាចម្រៀង ខេម របស់ផលិតកម្មថោន គឺជាអ្នកបើកបររថយន្ត RANGE ROVER និងស្ថិតនៅក្នុងហេតុការណ៍ គ្រោះថ្នាក់នេះ ហើយបានរត់គេចខ្លួនជាមួយស្រ្តីម្នាក់ ក្រោយកើតហេតុ។

សាច់ញាតិជនរងគ្រោះ បានបញ្ជាក់ប្រាប់ទៀតថា បងប្អូនគ្រួសារ តារាចម្រៀង ខេម រួមនឹងខាងផលិតកម្មផង បានសុំចូលខ្លួនមកចរចារដោះស្រាយ បញ្ហាគ្រោះថ្នាក់ចរាចរណ៍។ ពាក់ព័ន្ធនឹងចំនួនទឹកប្រាក់ នៃការសងសំណង មិនទាន់ត្រូវបានបង្ហើបឲ្យដឹង នៅឡើយនោះទេ។ ប៉ុន្តែរហូតមកដល់ពេលនេះ គឺមិនទាន់មានជាលទ្ធផលផ្លែផ្កាអ្វីឡើយ ខណៈដែលដំណោះស្រាយ គឺមិនទាន់មាននោះទេ។

យ៉ាងណាមិញប្រពភព័ត៌មាន ពីក្រុមគ្រួសារជនរងគ្រោះ បានបង្ហើបឲ្យដឹងថា ខ្លួនក៏មិនចង់វែងឆ្ងាយអ្វីតទៅទៀតដែរ ព្រោះបើវែងឆ្ងាយ ក៏មិនអាចឲ្យជីវិត មនុស្សដែលស្លាប់ទៅហើយ រស់មកវិញដែរ ប៉ុន្តែពាក់ព័ន្ធនឹងសំណង ក៏ត្រូវពិចារណាឲ្យបានសមរម្យដែរ ព្រោះជីវិតមនុស្ស មិនអាចកាត់ថ្លៃបានទេ ។ តែយ៉ាងណា ក៏គ្រួសារជនរងគ្រោះ មានការយោគយល់ ចំពោះការចូលខ្លួនមកដោះស្រាយ ពីសំណាក់គ្រួសារ ខេម នៅពេលនេះ ព្រោះសំខាន់ស្ថិតនៅលើការជជែកគ្នា ដើម្បីទទួលយកបានទាំសងខាង តែប៉ុណ្ណោះ៕ 

ខ្មែរឡូត