រឿងតិចតួច តែចង់បង្កជារឿងធំ

រឿងតិចតួច តែចង់បង្កជារឿងធំ

រាជធានីភ្នំពេញ ៖ ម៉ូតូនិងរថយន្តប៉ះគ្នាឆ្កូតថ្នាំបន្តិច ស្រាប់តែបុរសជាអ្នកបើករថយន្តខឹងសម្បារដោយស្តីបន្ទោសឱ្យនារីជាអ្នកជិះម៉ូតូរហូតដល់យំ បង្កឱ្យមានការភ្ញាក់ផ្អើលដល់អ្នកយកព័ត៌មានទូរទស្សន៍ទៅថតផ្សាយ ហើយត្រូវបុរសនោះរត់ទៅចាប់យកទូរស័ព្ទច្របាច់ធ្វើស្រាំអេក្រង់ ហេតុការណ៍នេះកើតឡើង កាលពីវេលាម៉ោង០៩ និង១៥នាទីយប់ថ្ងៃទី១៩ ឧសភា ២០១៦ ស្ថិតនៅតាមបណ្តោយផ្លូវ២៦៥ កែងផ្លូវ១៨៤ ត្រង់ចំណុចស្តុបខារ៉ាអូខេ «នគរសំរិទ្ធ» ក្នុងសង្កាត់ទឹកល្អក់៣ ខណ្ឌទួលគោក ។

សាក្សីឃើញហេតុការណ៍ឱ្យដឹងថា មុនពេលកើតហេតុ គេឃើញនារីម្នាក់ជិះម៉ូតូម៉ាកអាយខន ពណ៌ឈាមជ្រូកលាយខ្មៅ ពាក់ស្លាកលេខភ្នំពេញ 2AE-1904 បើកបរតាមបណ្តោយផ្លូវ២៦៥ ក្នុងទិសដៅពីត្បូងទៅជើង ។ រីឯរថយន្តម៉ាកកាមរីហាយប្រ៊ីត ពណ៌ស្ករ ពាក់ស្លាកលេខភ្នំពេញ2AB-7799 បើកបរដោយបុរសម្នាក់ តាមបណ្តោយផ្លូវ២៦៥ដូចគ្នា ក្នុងទិសដៅពីជើងទៅត្បូង ។

លុះមកដល់ចំណុចកើតហេតុ ម៉ូតូអាយខុនគាត់បានស៊ីញ៉ូបត់ឆ្វេង ស្រាប់តែរថយន្តខាងលើបានជាន់ហ្គែរបន្ថែមល្បឿន ធ្វើឱ្យនារីវ័យក្មេងភ័យស្លន់ស្លោ បានចាប់ហ្វ្រាំងដួលទៅលើទ្វារខាងឆ្វេងរថយន្តឆ្កូតថ្នាំបន្តិច ។

បើតាមសម្តីរបស់នារីជាអ្នកបើកម៉ូតូអាយខនបានឱ្យដឹងថា មុនពេលកើតហេតុ គាត់ជិះម៉ូតូមកដល់ចំណុចផ្លូវកែង បានបត់ស៊ីញ៉ូឆ្វេង ហើយអកហ្សឺនឹងរថយន្តបើកលឿនបានចាប់ហ្វ្រាំងដួលបោកលើរថយន្តបន្តិច ។ ភ្លាមៗនោះ រូបនាងបានសួរថា ហេតុអីបានជាបើករថយន្តអ៊ីចឹង ស្រាប់តែបុរសនោះខឹងច្រឡោត ហើយបានស្តីបន្ទោសឱ្យនាងតែម្តង ។

ចំណែកបុរសជាអ្នកបើករថយន្តបានប្រាប់ថា ដោយសារតែគាត់មិនចង់ឱ្យម៉ូតូបត់កាត់មុខរថយន្តរបស់គាត់ ទើបគាត់បន្ថែមល្បឿនឱ្យទៅមុន បែរជានារីជាអ្នកបើកម៉ូតូចាប់ហ្វ្រាំងដួលបោកលើរថយន្តរបស់គាត់ ហើយស្រែកឡូឡាថាឱ្យគាត់ទៀត ។

សាក្សីនៅកន្លែងកើតហេតុបានឱ្យដឹងថា ក្រោយពេលកើតហេតុ បុរសជាអ្នកបើករថយន្តបានស្តីបន្ទោសនារីជាអ្នកបើកម៉ូតូរហូតនាងយំ ។ ហើយបុរសជាអ្នកបើករថយន្តអាងមានខ្សែស្គាល់អ្នកធំ មិនព្រមឱ្យសមត្ថកិច្ចមូលដ្ឋានវាស់វែងយកទៅដោះស្រាយទេ ដោយគាត់ចង់ឲ្យយកទៅដោះស្រាយនៅការិយាល័យនគរបាលចរាចរណ៍ផ្លូវគោក ។

ខណៈពេលកំពុងតែស្រែកឡូឡាអាងខ្សែនោះ ស្រាប់តែឃើញអ្នកយកព័ត៌មានទូរទស្សន៍ចុះទៅថតយករូបភាព បែរជាបុរសនោះកាន់តែខឹងច្រឡោតច្រង៉េងច្រង៉ាង មិនឱ្យអ្នកយកព័ត៌មានថតរូបភាពទេ បានចាប់យកទូរស័ព្ទរបស់អ្នកយកព័ត៌មាន ទៅច្របាច់រហូតប្រេះអេក្រង់ រួចទើបយកទៅឱ្យសមត្ថកិច្ចវិញ ។

ក្រោយពេលកើតហេតុ អ្នកបើករថយន្តខាងលើ បានទូរស័ព្ទសាច់ញាតិមកជួយដោះស្រាយ ចំណែកនារីដែលគិតតែពីយំ បានទូរស័ព្ទសាច់ញាតិមកដល់ធ្វើការចរចាជាមួយខាងរថយន្ត ទើបម្ចាស់រថយន្តយល់ព្រមឱ្យយសុំទោសបញ្ចប់រឿង ៕