ចិន៖ ប៉ុន្មានថៃ្ងមុននេះ ក្រុមអ្នកគាំទ្រជាច្រើន មានការព្រួយបារម្ភ ពី Lay សមាជិកក្រុម Exo ជាខ្លាំង ពីព្រោះតែរូបគេស្រាប់តែដួលសន្លប់ភ្លាមៗ ក្នុងកំឡុងពេលកំពុងថតកម្មវីធីចិនមួយ ដោយមិនដឹងពីមូលហេតុ។

គួរឲ្យដឹងថា បន្ទាប់ពីកើតមានហេតុការណ៍ដួលសន្លប់ កាលពីថ្ងៃទី៨ ខែឧសភា រួចមក មានប្រព័ន្ធផ្សព្វផ្សាយចិនមួយ បានរាយការណ៍ថា សមាជិកក្រុម Exo លោក Lay បានដួលសន្លប់ភ្លាមៗ ដោយសារតែការពុលអាហារ។ ប៉ុន្តែមិនថាយ៉ាងណា របាយការណ៍ដែលបាន បញ្ជាក់នៅពេលក្រោយនេះ គឺវាមិនមែនដោយសារតែការពុលអាហារនោះទេ ប៉ុន្តែតាមពិតទៅ គឺដោយសារតែ ការអស់កម្លាំងខ្លាំងពេកទៅវិញទេ។

នេះបើយោងតាម ប្រភពរបស់ Sina កាលពីថ្ងៃទី៩ កន្លងទៅនេះ បានឲ្យដឹងថា Lay លោកបានដួលសន្លប់ ក្នុងអំឡុងពេលថត ឲ្យកម្មវិធីចិនមួយ ដែលមានឈ្មោះថា«Go Fighting»។ ទោះយ៉ាងណា អ្នកចាត់កម្មវិធីផ្ទាល់ ក៏បានចេញសេចក្តីថ្លែងការណ៍ បញ្ជាក់ពីមូលហេតុ ៖ «ការពិតនៃរឿងនេះ គឺមូលហេតុមកពី Lay លោកមានការហត់នឿយ និងអស់កម្លាំងខ្លាំងមែនទែន ពីព្រោះថា លោកត្រូវធ្វើការជាច្រើនជាន់ៗគ្នា ដោយអំឡុងពេល ដែលលោកថតរឿងផង និងរត់ទៅធ្វើការប្រគុំតន្ត្រីផង ក្នុងថ្ងៃតែមួយ ព្រមទាំងត្រូវ ទៅសន្និសីទកាសែត បង្ហាញមុខជាសាធារណៈដើម្បីជួបជាមួយនឹង ក្រុមអ្នកគាំទ្រថែមទៀតផង។ លើសពីនេះទៅទៀត បន្ទាប់ពីលោកបានមកដល់ Hainan ភ្លាម គឺនៅថ្ងៃដែលថតកម្មវិធី «Go Fighting» នេះ គឺលោកបរិភោគអាហារបានតិចតួចបំផុត មុនពេលថតនេះ ទើបធ្វើឲ្យលោកមានអារម្មណ៍ដូចជាមិនស្រួលខ្លួន រហូតដល់ពេលព្រឹកឡើង លោកមិនអាចគ្រប់គ្រងខ្លួនឯងបាន ក៏ដួលសន្លប់បែបនេះទៅ។

ជាការពិតណាស់ បន្ទាប់ពីត្រូវបញ្ចូន Lay ទៅកាន់បានមន្ទីរពេទ្យ លោកបានសម្រាកនៅទីនោះប្រហែលជា ពាក់កណ្តាលថ្ងៃ ស្រាប់តែលោកទាមទារទៅថតកម្មវីធីវិញនៅពេលថ្ងៃបន្តទៀត ។ ហើយអ្វីដែលធ្វើឲ្យអ្នកគាំទ្រ រឹតតែខ្លោចចិត្តអាណិតលោកថែមទៀតនោះ គឺលោកបាននិយាយសុំទោស ទៅកាន់ក្រុមការងារទាំងអស់ ទាំងដែលអាការៈរបស់លោក កំពុងតែធ្ងន់ធ្ងរ នៅក្នុងមន្ទីរពេទ្យនៅឡើយ។

ជារួមមក បន្ទាប់ពីកើតឡើង ហេតុការណ៍នេះរួចមក ទើបធ្វើឲ្យអ្នកគាំទ្រជាច្រើន រឹតតែព្រួយបារម្ភ ពីសុខភាពរបស់ Lay ខ្លាំងជាមុនទៅទៀត ពីព្រោះថានេះមិនមែន ជាលើកទីមួយទេ ដែលលោកដួលសន្លប់ភ្លាមៗបែបនេះ។ ប៉ុន្តែទោះជាយ៉ាងណា ក្រុមអ្នកគាំទ្រជាច្រើន ពួកគេបានបញ្ចេញអារម្មណ៍របស់ពួកគេ ដោយបានសរសេរថា ៖ «សុខភាពគឺពិតជាសំខាន់ជាងអ្វីៗទាំងអស់» «ក្នុងនាមខ្ញុំជាអ្នកគាំទ្រម្នាក់ ពេលដែលខ្ញុំឃើញបែបនេះ បេះដូងខ្ញុំពិតជាឈឺខ្លាំងណាស់» «សព្វថ្ងៃនេះ មើលទៅគាត់ពិតជារវល់ខ្លាំងណាស់ ខ្ញុំសង្ឃឹមថាគាត់ នឹងមានពេលសំរាកខ្លះ»។

គួររំលឹកថា កាលពីឆ្នាំមុន Lay លោកបានចុះកុងត្រាជាមួយស្ទូឌីយូ ឯកជនមួយ បន្ទាប់ពីនោះមក លោកចាប់ផ្តើមមានសកម្មភាពជាច្រើន នៅក្នុងប្រទេសចិនយ៉ាងពេញលេញ ដូចជាចូលរួមសម្តែងខ្សែភាពយន្ត និងអ្វីផ្សេងជាច្រើនទៀត រហូតដល់បច្ចុប្បន្ននេះ គឺលោកកំពុងមានឈ្មោះ បោះសំលេងយ៉ាងខ្លាំងនៅឯប្រទេសចិន៕

ប្រភព៖ koreaboo

ចំណាប់អារម្មណ៍ខ្មែរឡូត៖

គួររំលឹកថា កន្លងទៅនេះខ្មែរឡូតក៏ធ្លាប់ លើកឡើងនូវវីដេអូគួរឲ្យរន្ធត់ នៅពេលតារា Kpop ជួបឧបទ្ទវហេតុដោយចៃដន្យ នៅលើឆាក ។ ប៉ុន្តែតារាKpopទាំងនេះ គឺពួកគេពិតជាមិនចង់មាន កំហុសឆ្គងពេលដែល ពួកគេសំដែងនោះទេ ប៉ុន្តែប្រហែលមកពីខុសបច្ចេកទេស ត្រង់ចំនុចកន្លែងណាមួយ ដូចជា ឆាករអិលពេក ធ្វើឲ្យអ្នកសំដែងងាយនឹងរអិលដួល ឬក៏​មកពីអ្នករៀបចំកម្មវិធី និងអ្នកសម្តែងដាក់មោគ្នា មិនត្រឹមត្រូវទើបធ្វើឲ្យខុសបច្ចេកទេសមួយចំនួនជាដើម។

ជាចុងក្រោយ ក្រោយពីបានមើលវីដេអូទាំងនេះហើយ យើងបានសង្គេតឃើញថា ពូកគេមាន ការឈឺចាប់យ៉ាងខ្លាំង ប៉ុន្តែពួកគេនៅប្រឹងទ្រាំ ដើម្បីសម្តែងជូនទស្សនិកជនដដែល៕

ខ្មែរឡូត