ផឹកស្រា៣កន្លែង ចប់ត្រឹមមកលោតទឹកលេង

ផឹកស្រា៣កន្លែង ចប់ត្រឹមមកលោតទឹកលេង

កំពត ៖ បុរសជាភ្ញៀវទេសចរម្នាក់ឈ្មោះ NGUYEN THANH LONG អាយុ៣៤ឆ្នាំ រស់នៅទីក្រុងហូជីមិញ ផឹកស្រាថូជាមួយមិត្តភក្តិស្រី ជាជនបរទេសដូចគ្នា នៅក្នុងហាងមួយកន្លែង តាមបណ្តោយឆ្នេរព្រែកកំពត ។ ក្រោយពីផឹកមួយកែវហើយ បានលោតទឹកលេងក៏ស្រាប់តែ គេឃើញងើបក្បាលឡើងមានក្អួតចង្អោរ រួចលិចទៅក្នុងទឹកវិញបាត់ បង្កឱ្យឆោឡោឡើងឡើង ដោយរត់ទៅរាយការណ៍ជូនសមត្ថកិច្ចជួយអន្តរាគមន៍ទាំងយប់ ។

ហេតុការណ៍នេះ កើតឡើងកាលពីវេលាម៉ោង១២ និង៣០នាទីរំលងអធ្រាត្រ ឈានចូលថ្ងៃទី១០ ឧសភា ២០១៦ ដោយត្រូវម្ចាស់ហាងទូរស័ព្ទ រាយការណ៍ឱ្យសមត្ថកិច្ចចុះមកអន្តរាគមរកសាកសព ។ លុះដល់ម៉ោង៥ទៀបភ្លឺនាទីថ្ងៃទី១០ថ្ងៃដដែល ទើបរកសពឃើញ នៅអោបជាប់សសរកន្លែង លោតទឹកលេងដោយ ស្លាប់បាត់ទៅហើយ ក៏ស្រង់សាកសពឡើងលើគោក ។

ប្រភពីមិត្តស្រី ដែលអង្គុយលេងជាមួយគ្នាថា ជនរងគ្រោះមុនមកអង្គុយផឹកនៅកន្លែងកើតហេតុ គឺបានចេញពីកន្លែងផឹក២កន្លែងផ្សេងទៀត រហូតដល់ម៉ោង១២ ទើបចេញមកអង្គុយផឹកស្រាថូនៅកន្លែងកើតហេតុ ។ ពេលមកអង្គុយកន្លែងកើតហេតុនេះ ជនរងគ្រោះ ទើបតែផឹកបានមួយកែវ ក៏លោតទឹកលេង ហើយក៏ជួបហេតុការណ៍នេះតែម្តងទៅ។

ក្រោយពីពិនិត្យ និងធ្វើកោសល្យវិច័យរបស់គ្រូពេទ្យ និងសមត្ថកិច្ចរួច បានសន្និដ្ឋានថា ជនរងគ្រោះដោយសារ មានជាតិស្រវឹងខ្លាំងរួចលោតទឹកលេង ត្រូវស្ទះខ្យល់ រួចបណ្តាលឲ្យលង់ទឹកស្លាប់ក្នុងទឹកតែម្តង ។ ដោយសពឃើញដៃនៅខ្វេរជាប់និងសសរកន្លែងលោតទឹក ៕

ប្រភព ៖ កោះសន្តិភាព

កំណត់ហេតុខ្មែរឡូត៖

គួររំលឹកដែរថា ទាក់ទងនិងករណីស្រដៀងគ្នានេះដែរ នារីវ័យក្មេងអាយុ ប្រមាណ២០ឆ្នាំ បានអង្គុយយំនៅកន្លែង ហាត់ប្រាណ មាត់ទន្លេ ខាងមុខព្រះបរមរាជវាំង ហើយស្រាប់តែ រត់ទៅលោតទឹកសម្លាប់ខ្លួន នៅម៉ោងប្រមាណ ៨យប់ថ្ងៃទី១ ខែមេសា ឆ្នាំ២០១៦ នេះ តែសំណាងល្អ ត្រូវបានប្រជាពលរដ្ឋ នាំគ្នាជួយសង្គ្រោះទាន់។ បើតាមប្រជាពលរដ្ឋដែលហាត់នៅ ម្តុំមុខព្រះបរមរាជវាំង បានឲ្យដឹងថា នារីវ័យក្មេងនេះ ត្រូវបានប្រជាពលរដ្ឋ ជួយសង្គ្រោះទាន់ ពេលវេលា ហើយកំពុងតែសន្លប់បាត់ស្មារតី ពេលនេះប្រជាពលរដ្ឋកំពុងតែ ជួយសង្គ្រោះបឋម៕