ជួយបន្តផង! កំពុងរកសាច់ញាតិសពស្ត្រីខ្មែរម្នាក់

ជួយបន្តផង! កំពុងរកសាច់ញាតិសពស្ត្រីខ្មែរម្នាក់

ខេត្តបន្ទាយមានជ័យ ៖ មន្ត្រីកម្ពុជាបាននិងកំពុងប្រកាសរកសាច់ញាតិសពស្ត្រីខ្មែរបានប្តីជាជនជាតិថៃ ហើយត្រូវឃាតករបាញ់សម្លាប់លើទឹកដីថៃ កាលពីយប់ថ្ងៃទី០៧ ឧសភា ២០១៦ ស្ថិតក្នុងស្រុកវ៉ាត់ថាណាណាក់ខន ខេត្តស្រះកែវ ប្រទេសថៃ ព្រោះសពកំពុងតម្កល់នៅមន្ទីរពេទ្យនៅឡើយ ។

លោកយ៉ាល់ ប៊ុនពៅ មន្ត្រីការិយាល័យទំនាក់ទំនងព្រំដែនកម្ពុជា-ថៃប្រចាំច្រកទ្វារអន្តរជាតិប៉ោយប៉ែត បានប្រាប់កោះសន្តិភាពតាមទូរស័ព្ទថា សាកសពស្ត្រីរងគ្រោះឈ្មោះម៉ែន ម៉ាប់ អាយុ៤០ឆ្នាំ មានប្តីជនជាតិថៃឈ្មោះស៊ុម យុតអាក់ នុតតាក់ភីន អាយុ៥៦ ឆ្នាំ មានទីលំនៅភូមិណងរឿ ឃុំណងណាំសៃ ស្រុកវ៉ាត់ថាណាណាក់ខន ខេត្តស្រះកែវ ប្រទេសថៃហើយ ។

ស្ត្រីរងគ្រោះត្រូវឃាតករជាកូនចុង (កូនរបស់ប្តីជាជនជាតិថៃ) លបបាញ់សម្លាប់ដោយសារខឹងរអ៊ូររទាំ និងស្តីបន្ទោសច្រើន មកទល់និងថ្ងៃទី១០ ឧសភា ២០១៦ មិនទាន់ឃើញមានសាច់ញាតិ មកទំនាក់ទំនងយកសពនៅឡើយទេ ។ សពស្ត្រីរងគ្រោះកំពុងត្រូវបានភាគីថៃ តម្កល់នៅក្នុងមន្ទីរពេទ្យក្នុងខេត្តកើតហេតុ ។

មន្ត្រីខាងលើបញ្ជាក់ថា ពេលនេះមន្ត្រីកម្ពុជាប្រចាំនៅប្រទេសថៃ សូមអំពាវនាវរកសាច់ញាតិឱ្យទៅទទួលយកសព ៕

ប្រភព ៖ កោះសន្តិភាព

កំណត់ហេតុខ្មែរឡូត៖

គួររំលឹកដែរថា ផ្សាភ្ជាប់នឹងរឿងខាងលើនេះដែរ ទីបំផុត ឃាតករដែលបានបាញ់សម្លាប់ស្ត្រីខ្មែរកំពុងហូបបាយនៅភូមិណងរឿង ឃុំណងណាំសៃ ស្រុកវ៉ាត់ថាណាណាក់ខន ខេត្តស្រះកែវ ត្រូវបានសមត្ថកិច្ចចម្រុះថៃធ្វើការចាប់ខ្លួនបានហើយនៅព្រឹកថ្ងៃទី៨ ខែឧសភា ឆ្នាំ២០១៦ព្រឹកមិញនេះ ។

សេចក្តីរាយការណ៍បានឲ្យដឹងថា ជនសង្ស័យឈ្មោះ ស៊ុផាក់ឆៃ អាក់ណូតាក់ផាន់ ភេទប្រុស អាយុ១៩ឆ្នាំ ជាកូនចិញ្ចឹមរបស់ស្ត្រីរងគ្រោះ តែប្រភពមិនបានបញ្ជាក់ថាជនសង្ស័យជាកូនរបស់បុរសថៃដែលជាប្តីស្ត្រីរងគ្រោះឬយ៉ាងណានោះទេ ។

ប៉ុន្តែសេចក្តីរាយការណ៍បានឲ្យដឹងថា រឿងរ៉ាវបាញ់សម្លាប់ស្ត្រីខ្មែរនេះគឺបណ្តាលមកពីជនសង្ស័យខឹងនឹងម្តាយចិញ្ចឹម(ស្ត្រីរងគ្រោះ)ពូកែរអ៊ូរទាំ និងជេរ ធ្វើឲ្យទប់អារម្មណ៍មិនបានក៏លួចបាញ់សម្លាប់តែម្តង ។

ក្រោយសមត្ថកិច្ចចម្រុះ ទាហាន និងតម្រួតថៃ ចាប់ខ្លួនបាន ជនសង្ស័យត្រូវបាននាំយកទៅធ្វើត្រាប់កន្លែងកើតហេតុ បន្ទាប់មកនាំទៅសាកសួរបន្តដើម្បីចំណាត់ការតាមផ្លូវច្បាប់ ។

សូមបញ្ជាក់ថា ស្ត្រីខ្មែរម្នាក់ឈ្មោះ ម៉ាប់ អាយុ៤០ឆ្នាំ មានប្តីជាជនជាតិថៃឈ្មោះ ស៊ុមយុត អាក់នុតាក់ភីន អាយុ៥៦ឆ្នាំ ត្រូវឃាតករលបបាញ់ត្រូវចំនួន៨គ្រាប់ស្លាប់ភ្លាមៗពេលកំពុងអង្គុយហូបបាយកាលពីវេលាម៉ោងជាង៧យប់ ថ្ងៃទី៧ ខែឧសភា ឆ្នាំ២០១៦ នៅភូមិណងរឿង ឃុំណងណាំសៃ ស្រុកវ៉ាត់ថាណាណាក់ខន ខេត្តស្រះកែវ ប្រទេសថៃ ៕