ឪពុកម្តាយ រវល់ទៅថៃ ទុកកូនជាមួយជីដូន លង់ទឹកស្លាប់

ឪពុកម្តាយ រវល់ទៅថៃ ទុកកូនជាមួយជីដូន លង់ទឹកស្លាប់

ខេត្តបន្ទាយមានជ័យ ៖ ពិតជាគួរឲ្យអាណោចអធម្មមែន ក្មេងប្រុសស្រី2នាក់ស្លាប់ដោយលង់ទឹកក្នុងរណ្តៅដីតែមួយនៅពេលឪពុកម្តាយពួកគេរវល់ទៅរកស៊ីនៅឯក្រុងបាងកកប្រទេសថៃទុកកូនឲ្យនៅជាមួយជីដូន។

ហេតុការណ៍ភ្ញាក់ផ្អើល និងគួរឲ្យសង្វេគនេះ បានកើតឡើងនៅភូមិសិលាខ្មែរ ឃុំអូរបីជាន់ ស្រុកអូរជ្រៅកាលពីល្ងាចថ្ងៃទី5 ខែឧសភា ឆ្នាំ2016។

រូបភាព៖ កុមាររងគ្រោះ

ក្មេងរងគ្រោះទាំង2ម្នាក់ឈ្មោះ ឌីម ឌូណា ភេទស្រី អាយុ7ឆ្នាំ មានឪពុកឈ្មោះ ឡាច រិទ្ធី អាយុ36ឆ្នាំ ម្តាយឈ្មោះ លន់ ស្រីពៅ អាយុ28ឆ្នាំ ហើយរស់នៅជាមួយជីដូន ឈ្មោះ ជក់ វុន អាយុ59 ឆ្នាំនិងក្មេងរងគ្រោះម្នាក់ទៀត ឈ្មោះ ផល រ៉ាឆាន់ ភេទប្រុស អាយុ6ឆ្នាំ មានឪពុកឈ្មោះ ព្រឹម ព្រឿយ អាយុ34ឆ្នាំ ម្តាយឈ្មោះ រុំ សុភ័ក្រ អាយុ23ឆ្នាំ រស់នៅជាមួយជីដូនឈ្មោះ ឡុក រឿន អាយុ59ឆ្នាំ ដោយគ្រួសាររងគ្រោះទាំង2 មានទីលំនៅក្នុងភូមិកើតហេតុ។

តាមការឲ្យដឹងពីលោក យ៉ិម ពៅ មេភូមិសិលាខ្មែរ ប្រាប់កោះសន្តិភាពថា ក្មេងទាំង2បានបាត់ពីផ្ទះនៅម៉ោងប្រហែល4រសៀលថ្ងៃកើតហេតុលុះម៉ោងជិត6ល្ងាច ថ្ងៃដដែលមានក្មេងៗទៅលេងក្បែររណ្តៅដីដែលគេជីកយកអាចម៍ដីទៅធ្វើផ្លូវជាតិ58នៅបន្ទាត់ព្រំដែនក៏ប្រទះឃើញក្មេងដែលបាត់ហើយកំពុងតាមរកនោះអណ្តែតទឹក ទើបក្មេងៗនាំគ្នាទៅប្រាប់អ្នកស្រុកឲ្យមកជួយស្រង់។

លោកមេភូមិបន្តថាឪពុកម្តាយក្មេងទាំង2ទៅធ្វើការនៅក្រុងបាងកកដូចគ្នាយូរៗទើបមកម្តងដោយទុកកូនឲ្យនៅជាមួយជីដូនក្រីក្រដូចគ្នា។ លោកមេភូមិបញ្ជាក់ថាក្មេងរងគ្រោះទាំង2ដោយសារផ្ទះក្បែរគ្នាបានធ្វើបុណ្យក្នុងរោងតែមួយ ហើយបានបញ្ចុះសពក្បែរគ្នាទៀត ក្នុងបរិវេណវត្តសិលារុក្ខារាម ៕

រូបភាព៖ កន្លែងកើតហេតុ

ប្រភព ៖ កោះសន្តិភាព

កំណត់ហេតុខ្មែរឡូត

គួររំលឹកផងដែរថា កាលពីម៉ោង១ និង១៥នាទីរសៀល ថ្ងៃទី១៧ ខែមេសានៅចំណុចច្រាំងស្រុត ស្ថិតក្នុងភូមិព្រែកតាទន់ ឃុំព្រះប្រសប់ ស្រុកខ្សាច់កណ្ដាល ក្មេងប្រុសស្រីបីនាក់ ជាបងប្អូន និងបងប្អូនជីដូនមួយគ្នា បានលង់ទឹកទន្លេស្លាប់ទាំងបីនាក់ ពេលដែលទៅលេងផ្ទះ ជីតា ថ្ងៃបុណ្យចូលឆ្នាំ ហើយនាំគ្នាទៅលេងទឹកទន្លេ។

មន្ត្រីនគរបាល ស្រុកខ្សាច់កណ្ដាលបាន ឱ្យដឹងថាជនរងគ្រោះ មានបីនាក់ ទី១.ឈ្មោះ ភាព ឈាវលី ភេទប្រុស អាយុ12ឆ្នាំ រស់នៅភូមិស្វាយអាត់ ឃុំព្រែកតាមាក់ ស្រុកច់កណ្ដាល ទី២. ឈ្មោះ ភាព ឈូឡុង ភេទប្រុស អាយុ 8ឆ្នាំ រស់នៅភូមិឃុំ ជាមួយគ្នា ទី៣.ឈ្មោះ យី ដារិទ្ធ ភេទប្រុស អាយុ9ឆ្នាំ រស់នៅភូមិឃុំកើតហេតុ ខាងលើ។

មន្ត្រីនគរបាលបានឲ្យដឹងទៀតថាមុនពេលកើតហេតុ ឱពុកម្ដាយ ក្មេងរងគ្រោះបាននាំទៅលេងផ្ទះជីតា ក្នុងថ្ងៃបុណ្យចូលឆ្នាំ នៅភូមិឃុំកើតហេតុខាងលើ ។

នៅវេលាកើតហេតុខាងលើនោះ ជនរងគ្រោះទាំងបីនាក់ជាបងប្អូន និងបងប្អូនជីដូនមួយ បាននាំគ្នាទៅ លេងទឹកទន្លខាងក្រោយផ្ទះ ក៏បាន រអិលជើងចូលទៅក្នុងទឹកជ្រៅ តោងគ្នាលិចបាត់លង់ស្លាប់ទាំងបីនាក់។

ពេលនោះមានក្មេងដែល ទៅជាមួយបានឃើញ រត់មកប្រាប់ចាស់ៗនៅផ្ទះក៏ផ្អើលឆោឡោនាំគ្នា ទៅមុជទឹករាវរកតែរកមិន ឃើញភ្លាមៗទេ ។

ក្រោយមក ទើបគេង់សំណាញ់រកឃើញ ជាប់ក្នុងសំណាញ់ ស្លាប់អោបគ្នាទាំងបីនាក់ ។

ក្រោយពី អាជ្ញាធរ និងសមត្ថកិច្ច ពិនិត្យសពសន្និដ្ឋានថា ជនរងគ្រោះពិតជាស្លាប់ដោយសារលង់ទឹកពិតប្រាកដមែន ហើយបានប្រគល់សាកសព ឱ្យក្រុមគ្រួសារយកធ្វើបុណ្យតាមប្រពៃណី៕

រូបភាព៖ ក្មេងប្រុសស្រីបីនាក់ ជាបងប្អូន និងបងប្អូនជីដូនមួយគ្នា បានលង់ទឹកទន្លេស្លាប់ទាំងបីនាក់