យកម៉ូតូមេជាង ទៅដឹកស្រីស្នេហ៍ ដើរលេង បាត់មួយថ្ងៃ

យកម៉ូតូមេជាង ទៅដឹកស្រីស្នេហ៍ ដើរលេង បាត់មួយថ្ងៃ

រាជធានីភ្នំពេញ ៖ ហេតុការណ៍មួយបានបង្កឲ្យមានការភ្ញាក់ផ្អើលយ៉ាងខ្លាំង ទៅដល់អ្នកដំណើរតាមផ្លូវ និងកម្លាំងមានសមត្ថកិច្ច ខណៈពេលដែលបុរសជាមេជាងពេទ្យធ្មេញម្នាក់បានជិះម៉ូតូមួយគ្រឿង ដេញតាមពីក្រោយម៉ូតូមួយគ្រឿងទៀត ដែលត្រូវជាកូនជាងរបស់ខ្លួនហើយស្រែកថា ចោរៗ ឲ្យគេឯងជួយដេញស្ទាក់ចាប់។

ហេតុការណ៍នេះដែរបានបង្កឲ្យមានការភ្ញាក់ផ្អើលកើតឡើងកាលពីវេលាម៉ោង២និង៤៥នាទីរសៀល ថ្ងៃទី០៦ ខែឧសភា ឆ្នាំ២០១៦ នៅតាមបណ្តោយផ្លូវលេខ១៤៣ ក្នុងសង្កាត់បឹងកេងកងទី៣ ខណ្ឌចំការមន។

រូបភាព៖ យកម៉ូតូមេជាង ទៅដឹកស្រីស្នេហ៍ ដើរលេង បាត់មួយថ្ងៃ

តាមប្រភពព័ត៌មានពីបុរសជាមេជាងបានប្រាប់ឱ្យដឹងថា យុវជនជាកូនជាងមានឈ្មោះ អយ សុលីម អាយុ១៨ឆ្នាំ ជាកូនជាងធ្វើធ្មេញ នៅក្នុងសង្កាត់បឹងទំពុន ខណ្ឌមានជ័យ ត្រូវបានឃាត់ខ្លួន ខណៈពេលដែលកំពុងតែជិះម៉ូតូម៉ាក ZOOMER ពណ៌ខ្មៅ ពាក់ស្លាកលេខភ្នំពេញ1FE-0905 មួយគ្រឿងបាត់ពីផ្ទះមួយថ្ងៃ។

កាលពីម្សិលមិញថ្ងៃទី០៥ ខែឧសភា នោះយុវជនជាកូនជាងធ្វើធ្មេញរូបនេះ បានយកម៉ូតូរបស់គាត់មួយគ្រឿង និងប្រាក់ចំនួន៣០០ដុល្លា ចេញបាត់ មិនឃើញចូលផ្ទះវិញ ទូរស័ព្ទក៏តេមិនចូលក៏នាំគ្នាដើររក។

តាមប្រភពដដែលក៏បានប្រាប់បន្តទៀតថា លុះមកដល់ថ្ងៃនេះក៏បានរកឃើញរូបគេកំពុងតែជិះម៉ូតូ ហើយរូបគាត់ក៏ហៅអោយឈប់តែរូបគេមិនព្រមឈប់ម៉ូតូឡើយ ហើយក៏បានព្យាយាមបន្ថែមល្បឿនជិះរត់គេចបន្តទៅទៀត រូបគាត់ក៏បានស្រែកថា ចោរៗ ពេលនោះស្របពេលដែលកម្លាំងនគរបាលដើរល្បាត ក៏បានជួយដេញចាប់បានតែម្តង និងធ្វើឲ្យមានការភ្ញាក់ផ្អើលយ៉ាងខ្លាំងផងដែរ ។

ក្រោយពេលឃាត់ខ្លួនជនសង្ស័យបានក៏បញ្ជូនទៅធ្វើការសាកសួរនៅប៉ុស្តិ៍នគរបាលបឹងកេងកងទី៣ ទើបត្រូវយុវជនរូបនោះសារភាពថា បានជាខ្លួនយកម៉ូតូចេញពីផ្ទះបែបនេះគឺដើម្បីយកទៅដឹកស្រីស្នេហ៍របស់ខ្លួនដើរលេងតែប៉ុណ្ណោះ ។ បន្ទាប់មកខាងសមត្ថកិច្ចក៏បានសម្របសម្រួលឲ្យអ្នកទាំងពីរធ្វើការដោះស្រាយគ្នាដោយសន្តិវិធី ៕

រូបភាព៖ យកម៉ូតូមេជាង ទៅដឹកស្រីស្នេហ៍ ដើរលេង បាត់មួយថ្ងៃ

ប្រភព ៖ កោះសន្តិភាព

កំណត់ហេតុខ្មែរឡូត

គួររំលឹកផងដែរថា កាលពីវេលាម៉ោង៤ និង១៥នាទីល្ងាច ថ្ងៃទី០១ ខែឧសភា ឆ្នាំ២០១៦ នៅខាងមុខផ្ទះលេខ២០៣ ផ្លូវលេខ១៣ (ក្បែរវត្តឧណ្ណាលោម) ក្នុងសង្កាត់ជ័យជំនះ ខណ្ឌដូនពេញ មានការផ្ទុះអាវុធមួយគ្រាប់ និងវាយក្បាលមួយស្នាប់កាំភ្លើងបណ្តាលឲ្យបុរសម្នាក់បែកក្បាលហូរឈាមស្រោចពេញខ្លួន និងរងរបួសយ៉ាងធ្ងន់ធ្ងរ អំពីសំណាក់មន្ត្រីនគរបាលអន្តោប្រវេសន៍ម្នាក់ជាម្ចាស់ផ្ទះ ខណៈដែលធ្វើការឃាត់ខ្លួនបុរសរូបនោះចូលទៅលួចកង់មួយគ្រឿងនៅខាងមុខផ្ទះរបស់ខ្លួននោះ។

តាមប្រភពព័ត៌មានពីមន្ត្រីនគរបាលម្នាក់បានប្រាប់ឱ្យដឹងថា បុរសជាជនសង្ស័យមានឈ្មោះ ងួន វិចិត្រ អាយុ២៧ឆ្នាំ មានមុខរបរ និងទីលំនៅពិតប្រាកដ ត្រូវបានម្ចាស់ផ្ទះវាយមួយស្នាប់កាំភ្លើងបណ្តាលឲ្យរងរបួសបែកក្បាលឈាមហូរស្រោចពេញខ្លួនយ៉ាងធ្ងន់ធ្ងរ។

បុរសជាម្ចាស់កង់មានឈ្មោះ មាស ម៉ាដែន អាយុ៣៧ឆ្នាំ មុខរបរជាមន្ត្រីនគរបាលអន្តោប្រវេសន៍ ស្នាក់នៅផ្ទះកើតហេតុខាងលើ ត្រូវបានប្រើអាវុធម៉ាកឡុក បាញ់មួយគ្រាប់ឡើងលើ និងវាយទៅលើក្បាលរបស់បុរសជាជនសង្ស័យមួយស្នាប់កាំភ្លើងនៅក្នុងការចាប់ខ្លួននោះ។

តាមប្រភពដដែលបានប្រាប់បន្តទៀតថា មុនពេលកើតហេតុបុរសជាម្ចាស់កង់បានបញ្ឈរកង់មួយគ្រឿងរបស់ខ្លួននៅខាងមុខផ្ទះ បានបន្តិចក៏បានឃើញបុរសជាជនសង្ស័យចូលមកលួចបណ្តើរកង់របស់ខ្លួនចេញតាមរយៈកាមេរ៉ាសុវត្ថិភាព។

ភា្លមនោះបុរសជាម្ចាស់កង់ក៏បានស្ទុះរត់ចេញមកពីក្នុងផ្ទះ និងដកកាំភ្លើងខ្លីបាញ់ឡើងលើមួយគ្រាប់ និងចាប់បុរសជាជនសង្ស័យរូបនោះបាន ហើយក៏វាយបន្ថែមមួយស្នាប់កាំភ្លើងបណ្តាលឲ្យបែកក្បាលរយះចេញឈាមហូរស្រោចពេញខ្លួន រងរបួសធ្ងន់ និងប្រគល់ខ្លួនទៅឲ្យកម្លាំងមានសម្ថកិច្ចតែម្តង។

មតិខ្លះក៏បានធ្វើការរិះគន់ទៅដល់មន្ត្រីនគរបាលអន្តោប្រវេសន៍រូបនោះផងដែរ ដោយគ្រាន់តែសម្បត្តិត្រឹមចោរលួចកង់កញ្ចាស់មួយគ្រឿងប៉ុណ្ណោះ បង្កឲ្យមានការផ្ទុះអាវុធ និងមានការភ្ញាក់ផ្អើលយ៉ាងខ្លាំងបែបនេះទាល់តែសោះ។

ក្រោយពេលកើតហេតុបុរសជនសង្ស័យជាចោរលួចកង់ត្រូវបានប្រគល់ទៅឲ្យកម្លាំងនគរបាលប៉ុស្តិ៍ជ័យជំនះ ដើម្បីកសាងសំណុំរឿងបញ្ជូនទៅកាន់អធិការដ្ឋានខណ្ឌដូនពេញចាត់ការទោសតាមផ្លូវច្បាប់ ចំណែកឯកង់នោះត្រូវបានប្រគល់ទៅអោយម្ចាស់វិញផងដែរ ៕

រូបភាព៖ ជនសង្ស័យ