លោកកូនថ្លើមពាសមេឃ ឪពុកស្ដីប្រដៅ គំរាមដុតខ្លួនឯង

លោកកូនថ្លើមពាសមេឃ ឪពុកស្ដីប្រដៅ គំរាមដុតខ្លួនឯង

កំពង់ស្ពឺ ៖ កាលពីវេលាម៉ោង៩និង៣០នាទីព្រឹក ថ្ងៃទី២៨ ខែមេសា ឆ្នាំ២០១៦ មានករណីអំពើហិង្សាក្នុងគ្រួសាររបស់ឈ្មោះ ភឿង លន់ ភេទប្រុស អាយុ៦៥ឆ្នាំ ស្ថិតនៅក្នុងភូមិដំណាក់ត្រាច ឃុំ ក្សេមក្សាន្ត ស្រុកឧដុង្គ ខេត្តកំពង់ស្ពឺ ដែលបង្កដោយឈ្មោះ លន់ សុផាត ភេទប្រុស អាយុ២៧ឆ្នាំ ត្រូវជាកូន រស់នៅភូមិ ឃុំកើតហេតុខាងលើ បានធ្វើសកម្មភាពយកប្រេងសាំងចំនួន៣០លីត្រ និងដែកកេះ ចាក់គំរាមដុតសំលាប់ខ្លួន និងផ្ទះ ។

ប្រភពពីឪពុកជនបង្កបានឲ្យដឹងថា មុនពេលកើតហេតុ ក្នុងនាមគាត់ជាឪពុកបានស្ដីប្រដៅកូន ដែលជាជនបង្ក ថាកុំឲ្យដើរលេងផ្ដេសផ្ដាស កុំសេពគប់មិត្តភក្ដិបនភឿនមិនល្អ កុំដើរស៊ីផឹក ត្រូវជួយធ្វើការងារផ្ទះសម្បែង ។

គ្រាន់តែប៉ុណ្ណឹង លោកកូនថ្លើមធំពាសមេឃ ទៅទិញប្រេងសាំង៣០លីត្រ គំរាមដុតខ្លួនឯង ដុតផ្ទះជាដើម ហើយបានដុតកន្ទេលខ្នើយ ឆេះអស់មួយចំនួន ។

រហូតដល់វេលាម៉ោង៣និង៣០នាទី កម្លាំងអន្តរាគមន៍អគ្គីភ័យខេត្ត សហការជាមួយកម្លាំងអធិការដ្ឋាននគរបាលស្រុកឧដុង្គ បានឃាត់មុខសញ្ញាខាងលើទាន់ពេលវេលា និងបំពេញកំណត់ហេតុតាមនីតិវិធីបញ្ជូនទៅស្នងការដ្ឋាននគរបាលខេត្តកំពង់ស្ពឺ ៕

រូបភាព៖ លោកកូនថ្លើមពាសមេឃ ឪពុកស្ដីប្រដៅ គំរាមដុតខ្លួនឯង

ប្រភព ៖ កោះសន្តិភាព

កំណត់ហេតុខ្មែរឡូត

គួររំលឹកផងដែរថា កាលពីវេលម៉ោង៩ និង៣០នាទីព្រឹក ថ្ងៃទី២០ ខែមេសា ឆ្នាំ២០១៦ ស្ថិតនៅភូមិនរាយណ៍ ឃុំនរាយណ៍ ស្រុកឈូក ខេត្តកំពត បុរសម្នាក់បានប្រើអំពើហិង្សាលើប្រពន្ឋដោយសារពេលស្រវឹងស្រាមកដល់ផ្ទះមិនឃើញប្រពន្ឋ ហើយពេលឃើញប្រពន្ឋមកដល់ផ្ទះក៏បានឈ្លោះប្រកែកគ្នា រួចវាយប្រពន្ឋឲ្យរងរបួស ក្រោយមកប្រពន្ឋបានរត់គេចចេញពីបុរសជាប្តីដោយខ្លាចប្តីវាយទៀត ស្រាប់តែបុរសជាប្តីបានយកដែកកេះទៅដុតផ្ទះចោលតែម្តង ។

ស្ត្រីរងគ្រោះជាប្រពន្ធឈ្មោះ ជួន ចន្នី អាយុ២៨ឆ្នាំ បានប្រាប់សមត្ថកិច្ចថា នៅវេលាម៉ោងប្រហែល៩ និង៣០នាទីព្រឹក ថ្ងៃទី២០មេសា ប្តីរបស់នាងឈ្មោះ អេង សុដា អាយុ២៨ឆ្នាំ បានស្រវឹងស្រានៅក្រៅផ្ទះ រួចមកដល់ផ្ទះវិញបានរករឿងវាយតប់នាងខ្ញុំត្រូវកណ្តាលខ្នងមួយដៃបណ្តាលឲ្យរងរបួស ពេលនោះដោយខ្លាចប្តីវាយបន្តជ្រុលដៃរហូតដល់ស្លាប់ ក៏រត់គេចចេញពីប្តី ។

នៅពេលឃើញខ្លួនរត់គេចចេញ ប្តីរបស់នាងក៏បានយកដៃកកេះទៅដុតផ្ទះខ្លួនឯងដែលមានទំហំបណ្តោយ៥ម៉ែត្រទទឹង៤ម៉ែត្រធ្វើអំពីឈើប្រក់ស័ង្កសី ជញ្ជាំងស័ង្កសី បណ្តាលឲ្យឆេះអស់មួយចំហៀង ដោយសារបងប្អូនអ្នកស្រុកជួយពន្លត់ទាន់ ។

ក្រោយពីសមត្ថកិច្ចនគរបាលស្រុកឈូកទទួលពាក្យបណ្តឹងពីស្ត្រីរងគ្រោះជាប្រពន្ឋ លោកឧត្តមសេនីយត្រី ម៉ៅ ចន្ទ័មធុរិទ្ឋ ស្នងការនគរបាលខេត្ត បានបញ្ជាឲ្យនាំខ្លួនជនសង្ស័យឡើងមកកាន់ស្នងការខេត្តដើម្បីធ្វើការសាកសួរ ។

ក្រោយពីសមត្ថកិច្ចនគរបាលការិយាលយ័ព្រហ្មទណ្ឌកម្រិតស្រាលស្នងការខេត្តធ្វើការសាកសួរ ជនសង្ស័យឈ្មោះ អេង សុដា បានសារភាពប្រាប់សមត្ថកិច្ចថា ខ្លួនពិតជាស្រវឹងស្រា ហើយបានប្រើអំពើហិង្សាវាយតប់ទៅលើប្រពន្ឋរបស់ខ្លួន ព្រមទាំងដុតផ្ទះខ្លួនឯងពិតប្រាកដមែន (១លីត្រផឹកតែម្នាក់ឯង) ។

ក្រោយពីស្តាប់សម្តីសារភាពរបស់ប្តីនៅចំពោះមុខសមត្ថកិច្ចរួចហើយ ស្ត្រីជាប្រពន្ធក៏មានចិត្តអាណិតអាសូរប្តីវិញ ដោយសំណូមពរឲ្យសមត្ថកិច្ចកុំដាក់ទោសប្តីរបស់ខ្លួន គ្រាន់តែធ្វើការអប់រំ និងធ្វើកិច្ចសន្យាបញ្ឈប់ការប្រើអំពើហិង្សាតទៅទៀតបានហើយ ៕

រូបភាព៖ ជនសង្ស័យត្រូវប៉ូលិសឃាត់ខ្លួន