មេខ្លោងជួញដូរគ្រឿងញៀន ត្រូវPMបាញ់ស្លាប់ក្នុងផ្ទះ និងចាប់ខ្លួន៥នាក់ (មានវីដេអូ)

មេខ្លោងជួញដូរគ្រឿងញៀន ត្រូវPMបាញ់ស្លាប់ក្នុងផ្ទះ និងចាប់ខ្លួន៥នាក់ (មានវីដេអូ)

រាជធានីភ្នំពេញ ៖ បើតាមអ្នកឆ្លើយឆ្លងព័ត៌មានកោះសន្តិភាពបានឲ្យដឹងជំហានដំបូងមកថា មេខ្លោងជួញដូរគ្រឿងញៀនដែលបើកការបាញ់តដៃជាមួយសមត្ថកិច្ចនោះ បានត្រូវPM បាញ់ស្លាប់នៅក្នុងផ្ទះ និងជនសង្ស័យ៥នាក់ទៀតបានត្រូវចាប់ខ្លួន ក្នុងប្រតិបត្តិការដែលទើបបិទបញ្ចប់នៅប៉ុន្មាននាទីមុននេះ នៅទីតាំងបង្ក្រាបគ្រឿងញៀន ស្ថិតនៅខាងត្បូងរង្វង់មូលកាំកូស៊ីធី ផ្ទះលេខ ៣៧ ផ្លូវលេខ៣៥១ ក្នុងសង្កាត់បឹងកក់១ ខណ្ឌទួលគោក ដោយសមត្ថកិច្ចចាប់បានជនល្មើស២នាក់បន្ថែមទៀត និងកំពុងចូលទៅខាងក្នុងផ្ទះ ។

ប្រភព ៖ កោះសន្តិភាព

ហេតុការណ៍មុននេះ... ស្នូរគ្រាប់កាំភ្លើងបានបញ្ចប់ហើយ ខណៈសមត្ថកិច្ចគ្រប់គ្រងស្ថានការណ៍ទាំងស្រុង

រាជធានីភ្នំពេញ ៖ បើតាមអ្នកឆ្លើយឆ្លងព័ត៌មានកោះសន្តិភាពបានឲ្យដឹងជំហានដំបូងមកថា មកដល់វេលាម៉ោង៥និង៤៧នាទីល្ងាចថ្ងៃទី២៧ មេសានេះ កងកម្លាំងសមត្ថកិច្ចបានគ្រប់គ្រងស្ថានការណ៍បានទាំងស្រុងហើយនៅទីតាំងបង្ក្រាបគ្រឿងញៀន ស្ថិតនៅខាងត្បូងរង្វង់មូលកាំកូស៊ីធី ផ្លូវលេខ៣៥១ ក្នុងសង្កាត់បឹងកក់១ ខណ្ឌទួលគោក ដោយសមត្ថកិច្ចចាប់បានជនល្មើស២នាក់បន្ថែមទៀត និងកំពុងចូលទៅខាងក្នុងផ្ទះ ។

យ៉ាងណាក៍ដោយ មិនទាន់មានរបាយការណ៍ច្បាស់លាស់ពីករណីមនុស្សស្លាប់និងរបួសនៅឡើយទេ ខណៈមន្ត្រីកងរាជអាវុធហត្ថរហស្សនាមនិម្មិត៣៣ បានទទួលមរណភាពនៅមន្ទីរពេទ្យកាល់ម៉ែត្រ ក្រោយបញ្ជូនទៅសង្គ្រោះ បន្ទាប់ពីបាញ់តដៃគ្នាជាមួយក្រុមជួញដូរគ្រឿងញៀននៅទីតាំងខាងលើ ។

ហេតុការណ៍មុននេះ... ក្រុមជនល្មើសបាញ់តដៃជាមួយសមត្ថកិច្ចកាន់តែខ្លាំង

រាជធានីភ្នំពេញ ៖ ប្រភពពីប្រជាពលរដ្ឋនៅជិតកន្លែងកើតហេតុបានឲ្យកោះសន្តិភាពដឹងនៅមុននេះបន្តិចថា ក្រុមជនល្មើសកំពុងបាញ់តដៃជាមួយសមត្ថកិច្ចកាន់តែខ្លាំង គិតមកត្រឹមវេលាម៉ោង៥ និង៣០នាទីល្ងាចថ្ងៃទី២៧ មេសា ២០១៦នេះ កម្លាំងអាវុធហត្ថរាជធានី និងអាវុធហត្ថខណ្ឌទួលគោក រួមសមត្ថកិច្ច កំពុងធ្វើការឡោមព័ទ្ធផ្ទះជនសង្ស័យក្នុងករណីបង្ក្រាបគ្រឿងញៀន ដោយត្រូវជនសង្ស័យ កំពុងលាក់ខ្លួននៅក្នុងផ្ទះ ។

សូមបញ្ជាក់ថា ហេតុការណ៍នេះ កើតឡើងក្នុងពេលចុះទៅបង្ក្រាបគ្រឿងញៀន ដោយឃាត់ខ្លួនជនសង្ស័យបាន២នាក់ ហើយត្រូវក្រុមនោះបាញ់តែម្តង បង្កឱ្យភ្ញាក់ផ្អើលនារសៀលថ្ងៃទី២៧ មេសា ២០១៦ ស្ថិតនៅខាងត្បូងរង្វង់មូលកាំកូស៊ីធី ផ្លូវលេខ៣៥១ ក្នុងសង្កាត់បឹងកក់១ ខណ្ឌទួលគោក ។