ជនប្លន់ហើយរំលោភនារីរងគ្រោះ លើម៉ូតូ ជាប់ពន្ធនាគារ៨ឆ្នាំ សងសំណង ៨លានរៀល

ជនប្លន់ហើយរំលោភនារីរងគ្រោះ លើម៉ូតូ ជាប់ពន្ធនាគារ៨ឆ្នាំ សងសំណង ៨លានរៀល

ភ្នំពេញ៖ ប្រធានក្រុមប្រឹក្សាជំនុំជម្រះ នៃសាលាដំបូងរាជធានីភ្នំពេញ លោក យិន សារឿន នៅព្រឹកថ្ងៃទី៥ ខែមេសា ឆ្នាំ២០១៦នេះ បានសម្រេចផ្តន្ទាទោស ឧក្រិដ្ឋជន ប្លន់រំលោភម្នាក់ ដាក់ពន្ធនាគារ ៨ឆ្នាំ និងពិន័យប្រាក់ ៨លានរៀល ក្រោយបានរកឃើញថា ពិតជាបានធ្វើសកម្មភាព ប្លន់គ្រឿងអលង្ការ រួចចាប់រំលោភសេពសន្ថវៈ នារីរងគ្រោះ។ បើតាមលោក ចៅក្រម យិន សារឿន បានឲ្យដឹងថា ជនសង្ស័យ ដែលត្រូវផ្តន្ទាទោសនោះ ឈ្មោះ ជៀង ថារ៉ូ អាយុ៣៣ឆ្នាំ ត្រូវបាននគរបាល ខណ្ឌជ្រោយចង្វា ឃាត់ខ្លួនភ្លាមៗ កាលពីថ្ងៃទី១២ ខែធ្នូ ឆ្នាំ២០១៥ បន្ទាប់ពីធ្វើសកម្មភាពល្មើស នៅចំណុចស្ពានលីយ៉ុងផាត់ ភូមិព្រែកតារដ្ឋ សង្កាត់ព្រែកតាសេក ខណ្ឌជ្រោយចង្វារ។

ពាក់ព័ន្ធនិងការសម្រេចផ្តន្ទាទោសនេះ ជនជាប់ចោទ ជៀង ថារ៉ូ នៅក្នុងសវនាការ បានសារភាពថា ពិតជាបានយកកាំភ្លើង ភ្ជង់គំរាម យកគ្រឿងអលង្ការ និងទូរស័ព្ទដៃ ម៉ាកអាយហ្វូន ពីនារីរងគ្រោះ ប្រាកដមែន តែមិនបានរំលោភ សេពសន្ថវៈនោះទេ។ ចំណែកជនរងគ្រោះ ឈ្មោះ ស.រ.ភ បានប្រាប់តុលាការថា ខ្លួនត្រូវជនល្មើសប្លន់ គំរាម យកគ្រឿងអលង្ការ ទូរស័ព្ទដៃម៉ាកអាយហ្វូន និងប្រាក់មួយចំនួន ហើយបង្ខំឲ្យស្រាត ខោ រំលោភលើម៉ូតូ រហូតបានសម្រេច ទើបភ្ជង់កាំភ្លើង ឲ្យនាងរត់ចេញ ពីកន្លែងរំលោភនោះ ហើយក៏ជិះម៉ូតូគេចខ្លួនបាត់ ៕