សំណុំរឿង ធ្លាក់រថយន្ត ចូលទឹកទន្លេ ស្លាប់៧នាក់ នៅស្រុកស្អាង តុលាការសម្រេចឃុំខ្លួន

សំណុំរឿង ធ្លាក់រថយន្ត ចូលទឹកទន្លេ ស្លាប់៧នាក់ នៅស្រុកស្អាង តុលាការសម្រេចឃុំខ្លួន

កណ្តាល៖ សំណុំរឿងធ្លាក់រថយន្ត ចូលទឹកទន្លេ បណ្ដាលឲ្យមនុស្សចាស់-ក្មេង ៧នាក់ស្លាប់ យ៉ាងអាណោចអាធ័ម នៅស្រុកស្អាង ខេត្តកណ្ដាល នៅរសៀលថ្ងៃទី៥ ខែមេសា ឆ្នាំ២០១៦នេះ ចៅក្រមសាលាដំបូង បានម្រេចឃុំខ្លួនអ្នកបើកបររថយន្ត RX300។ បើតាមមន្ត្រីមន្រ្តីសាលាដំបូងខេត្តកណ្តាល បានឲ្យដឹងថា អ្នកបើកបររថយន្តឡិចស៊ីស RX300 ឈ្មោះ ពន់ ពេក ហៅ សាក់ សារ៉ាក់ អាយុ៣៣ឆ្នាំ ត្រូវបានលោក គឹម ម៉េង ចៅក្រមស៊ើបសួរសាលាដំបូងខេត្តកណ្ដាល នៅសៀលថ្ងៃទី៥ ខែមេសា ឆ្នាំ២០១៦ សម្រេច ឃុំខ្លួនដាក់ពន្ធនាគារ ដើម្បីរង់ចាំការស៊ើបអង្កេតបន្ត ពីបទពីបទបើកបរធ្វេសប្រហែស បណ្ដាលឲ្យស្លាប់អ្នកដទៃ តាមមាត្រា៨៥ ច្បាប់ស្ដីពីចរាចរណ៍ផ្លូវគោក ដែលកំណត់ការផ្តន្ទាទោសពី២ឆ្នាំទៅ៥ឆ្នាំ និង ពិន័យជាប្រាក់ពី១០លានរៀលទៅ២៥លានរៀល ។

មន្រ្តីដដែល បានបន្តថា ដោយឡែក ឈ្មោះ ស៊ិន រតនា ហៅខុង អាយុ២៤ឆ្នាំ ជាអ្នកបើកទូកដ ដែលត្រូវបានលោក លឹម សុគន្ថា ព្រះរាជអាជ្ញាអមសាលាដំបូងខេត្តកណ្ដាល បញ្ជាឲ្យនគរបាលស្រុកស្អាង ដោះលែងកាលពីព្រឹកថ្ងៃទី៥ ខែមេសា ឆ្នាំ២០១៦ ក៏ត្រូវបានលោកព្រះរាជអាជ្ញារង សេង ឬទ្ធី ចោទប្រកាន់ពីបទមនុស្សឃាតដោយអចេតនា តាមមាត្រា២០៧ នៃក្រមព្រហ្មទណ្ឌ ផងដែរ រួចបញ្ចូនសំណុំរឿងទៅចៅក្រមស៊ើបសួរចាត់ការបន្តតាមនីតិវិធី តាមរូបភាពជនត្រូវចោទនៅក្រៅឃុំ។ សូមបញ្ជាក់ថា ហេតុការណ៍ដ៏គួរឲ្យរន្ធត់ និងសង្វេគនេះ បានកើតឡើង នៅវេលាម៉ោងប្រមាណ៧៖១៥នាទីយប់ថ្ងៃទី៣ ខែមេសា ឆ្នាំ២០១៦ ស្ថិតនៅចំណុចកំពង់ចម្លងអុងប៉ាង ត្រើយខាងកើតទន្លេបាសាក់ ស្ថិតក្នុងភូមិបារ៉ែនលើ ឃុំស្វាយប្រទាល ស្រុកស្អាង ខេត្តកណ្ដាល៕