ចិន៖ បុរសម្នាក់ បានប្រទះឃើញ លុយជាង ១៥០០ដុល្លារអាមេរិក នៅក្រោមខ្នើយកើយ ខណៈដែលគាត់ចូលទៅស្នាក់នៅ ក្នុងសណ្ឋាគារមួយកន្លែងក្នុងប្រទេសចិន តែបែរជាមិនសប្បាយចិត្តទៅវិញ។

បើតាមប្រភពសារព័ត៌មានបានដឹងដែរថា បុរសខាងលើមានឈ្មោះថា Lu Gang បានចូលទៅស្នាក់នៅក្នុងសណ្ឋាគារ Shangdu ស្ថិតក្នុងទីក្រុង Chongqing ប្រទេសចិន កាលពីថ្ងៃទី២៨ មីនា អំឡុងពេលដែលគាត់ទៅឆេងម៉េង និងធ្វើការបោសសម្អាតផ្នូរកុងម៉ារបស់គាត់ នៅទីតាំងក្បែរសណ្ឋាគារនោះ។

ក្រោយមករូបគាត់ រួមនឹងក្រុមគ្រួសារបានចូលសម្រាក ក្នុងសណ្ឋាគាររយៈពេលមួយយប់ ហើយក៏ប្រទះឃើញលុយ ១០,០០០យ័ន (ប្រហែលជា១,៥០០ដុល្លារអាមេរិក) នៅខាងក្រោមខ្នើយកើយគាត់តែម្តង។ ប្រភពបន្តថា លោក Lu បានទៅប្រាប់បុគ្គលិកសណ្ឋាគារថា គាត់ពិតជាមិនពេញចិត្តសោះឡើយ ដែលបុគ្គលិកធ្វើការនៅទីនេះមិនបានយកចិត្តទុកដាក់ សម្អាតបន្ទប់របស់គាត់ឲ្យបានស្អាតបាត។  

បើតាមសេចក្តីរាយការណ៍ លោក Lu បានប្រាប់ថា «លុយទាំងអស់នោះ មិនមែនជារបស់ខ្ញុំទេ ប៉ុន្តែខ្ញុំបានប្រទះឃើញវា​​ នៅក្រោមខ្នើយកើយ ក្នុងបន្ទប់ស្នាក់នៅរបស់ខ្ញុំ។ ប្រាកដណាស់ ដែលបុគ្គលិកផ្នែកសម្អាតរៀបចំបន្ទប់នេះ ច្បាស់ជាមិនបានយកចិត្តធ្វើការងាររបស់ពួកគេនោះទេ។ ព្រោះថាពួកគេ មិនបានប្តូរស្រោមខ្នើយថ្មីឲ្យខ្ញុំ ទុកឲ្យខ្ញុំគេងខ្នើយដដែលគេ»។

លោក Lu បន្តថា «ស្រោមខ្នើយ ស្រោមពូកអស់ហ្នឹង មើលពីក្រៅទៅ វាមិនអីនោះទេ ប៉ុន្តែនរណាអាចធានាបានថា វាមានស្តង់ដាអនាម័យនោះ? ឬមួយក៏មិនមែនជាទម្លាប់ដែលខាងសណ្ឋាគារ ត្រូវផ្លាស់ប្តូរពូកគេងរាល់ថ្ងៃ? ខ្ញុំពិតជាមិនអាចទទួលយកបានដែលត្រូវមកគេង នៅកន្លែងស្មោគគ្រោកបែបនេះទេ» ។ យ៉ាងណាមិញ លុយទាំងអស់នោះ ក៏ត្រូវបានគេខលហៅ ប៉ូលិសមកធ្វើអន្តរាគមន៍ ហើយលោក Lu ក៏បានប្រគល់លុយទាំងអស់ ដែលលោករើសបាន ទៅឲ្យប៉ូលិសចូលជាថវិការដ្ឋផងដែរ។ 

គួរបញ្ជាក់ដែរថា សណ្ឋាគារ Shangdu គឺជាសណ្ឋាគារលំដាប់ផ្កាយបី។ បើតាមច្បាប់របស់ប្រទេសចិន បានចែងថា សម្រាប់សណ្ឋាគារផ្កាយមួយ ឬលើសហ្នឹង ត្រូវតម្រូវឲ្យផ្លាស់ប្តូរកម្រាលពូក និងស្រោមខ្នើយជានិច្ច៕

ប្រភព៖ បរទេស

ខ្មែរឡូត