ផ្អើលទាំងព្រឹក ស្នេហានារីស្រឡាញ់ ភេទដូចគ្នា

ផ្អើលទាំងព្រឹក ស្នេហានារីស្រឡាញ់ ភេទដូចគ្នា

រាជធានីភ្នំពេញ ៖ មានការភ្ញាក់ផ្អើលមួយ បន្ទាប់ពីនារី២នាក់ជាគូស្នេហ៍ស្រឡាញ់ភេទដូចគ្នា បានសម្រេចចិត្តបបួលគ្នាផឹកថ្នាំបំពុលសត្វល្អិត ដើម្បីសម្លាប់ខ្លួន ហើយត្រូវខាងភាគីនារីជាតួបុរសបានស្លាប់មុន និងនារីជាស្រីស្នេហ៍ ត្រូវក្រុមគ្រួសារបញ្ជូនទៅសង្គ្រោះនៅឯមន្ទីរពេទ្យ ។

ដែលហេតុការណ៍នេះ បង្កឱ្យភ្ញាក់ផ្អើលកាលពីវេលាម៉ោង០៤ និង៣០នាទីទៀបភ្លឺថ្ងៃទី២៥ មីនា ២០១៦ ស្ថិតនៅផ្ទះជួលក្នុងភូមិទួលគោក សង្កាត់ទួលសង្កែ ខណ្ឌប្ញស្សកែវ បន្ទាប់ពីត្រូវបងប្រុសនារីជាស្រីស្នេហ៍ប្រទះឃើញ ។ ប្រភពឱ្យដឹងថា នារីដែលស្លាប់ឈ្មោះស្រី លីន (ជាតួប្រុស) មានទីលំនៅក្នុងភូមិទម្លាប់ ឃុំសោម ខេត្តតាកែវ ។ រីឯនារីជាស្រីស្នេហ៍ឈ្មោះវ៉ាន ស៊ីវម៉ី អាយុ១៦ឆ្នាំ ជាអ្នកលក់ដូរ ទីលំនៅផ្ទះជួលក្នុងភូមិកើតហេតុខាងលើ មានស្រុកកំណើតនៅភូមិក្បាលក្រពើ ឃុំអង្គស្រែ ស្រុករមាសហែក ខេត្តស្វាយរៀង ។

ប្រភពបន្តថា នារីរងគ្រោះទាំង២នាក់នេះ បានស្រឡាញ់គ្នារយៈពេលជិត៣ខែមកហើយ គឺតាមរយៈទូរស័ព្ទច្រឡំលេខ ហើយនារីដែលជាតួប្រុសនោះ តែងតែមកដេកជាមួយនារីជាគូស្នេហ៍នៅក្នុងផ្ទះជួលខាងលើជាញឹកញាប់ ។

ក្នុងការទំនាក់ទំនងគ្នា ក៏មានការជំទាស់ពីក្រុមគ្រួសារខាងនារីជាគូស្នេហ៍ដែរ ដោយត្រូវពួកគាត់បានណែនាំថា កុំឱ្យគិតតែរឿងស្នេហាបែបនេះអី ត្រូវគិតពីការរកស៊ី ដើម្បីចិញ្ចឹមជីវិតវិញទៅ ។ ប្រភពខ្លះបាននិយាយថា ដោយសារតែបញ្ហានេះហើយ ទើបនារីរងគ្រោះទាំង២នាក់តូចចិត្ត ដែលគ្មានអ្នកគាំទ្រឱ្យស្រឡាញ់គ្នានោះ ទើបបបួលគ្នាបញ្ចប់ជីវិតតែម្តង ។