រឿងពិត! តារាស្រីម្នាក់ទម្លាយរឿងធ្លាប់លោតទឹកសម្លាប់ខ្លួន ពីលើស្ពានជ្រោយចង្វា

រឿងពិត! តារាស្រីម្នាក់ទម្លាយរឿងធ្លាប់លោតទឹកសម្លាប់ខ្លួន ពីលើស្ពានជ្រោយចង្វា

តារាសម្ដែង កញ្ញា ហេង ស្រីពេជ្រ បានទម្លាយអាថ៌កំបាំងរបស់ខ្លួនឲ្យដឹងថា នាងធ្លាប់ទៅលោតទឹកសម្លាប់ខ្លួនលើស្ពានជ្រោយចង្វាម្ដង កាលពី ៤ ឆ្នាំ មុន ប៉ុន្តែ មិនស្លាប់។

ក្នុងបទសម្ភាសន៍មួយជាមួយ Sabay កាលពីពេលកន្លងទៅ កញ្ញា ហេង ស្រីពេជ្រ បានរៀបឲ្យដឹងថា នៅចុងឆ្នាំ ២០១០ នាងពិបាកចិត្ត និង បានសម្រេចលោតទឺកសម្លាប់ខ្លួននៅស្ពានជ្រោយចង្វា បន្ទាប់ពីត្រឡប់មកពីសហរដ្ឋអាមេរិក ខណៈដែលបានរស់នៅទីនោះអស់រយៈពេល ២ ឆ្នាំ ជាមួយសង្សាររបស់នាង។

ស្រី ពេជ្រ បានបន្តឲ្យដឹងទៀតថា ការចែកផ្លូវគ្នាបានធ្វើឡើងក្រោមហេតុផល សង្សាររបស់នាង មានស្រីថ្មី ហើយថែមទាំងបានទៅរៀបការជាមួយនារីនោះទៀត ដោយមិនអាចទ្រាំ នាងក៏សម្រេចវេចបង្វេចមកស្រុកកំណើតវិញ។ មកដល់ស្រុកកំណើតវិញនៅចុងឆ្នាំ ២០១០ តារាសម្ដែងស្រីម្នាក់នេះមានអារម្មណ៍ខ្មាសមិត្តភ័ក្ដិ និង ញាតិមិត្តជាខ្លាំង។

ដោយមិនអាចទ្រាំទទួលអារម្មណ៍បែបនេះបាន ស្រីពេជ្រ មានគំនិតចង់សម្លាប់ខ្លួន។ នៅអំឡុងខែ ១១ ឆ្នាំ ២០១០ នាងបានសម្រេចចិត្តមកលោតទឹកលើស្ពានជ្រោយចង្វា ដើម្បីឲ្យស្លាប់ ប៉ុន្តែ នាងចេះហែលទឹក ការប៉ងសម្លាប់ខ្លួនរបស់នាង មិនបានសម្រេចឡើយ។

ស្រីពេជ្រ បានរៀបរាប់ទាំងទឹកមុខស្ងួតថា គ្រាន់តែធ្លាក់ចូលទឹកភ្លាម នាង ឈ្លក់ទឹកជាខ្លាំង ដោយមិនអាចទ្រាំបាន នាងប្រឹងស្រវេស្រវាងើបហែល ឡើងវិញ ហើយត្រូវបានគេយកទៅសង្គ្រោះ នៅគ្លីនិកមួយក្បែរនោះ និង ក្រុមគ្រួសារបានដឹងពីរឿងនេះ ក៏នាំទៅផ្ទះវិញ។

ឪពុកម្ដាយ បងប្អូន មិត្តភ័ក្ដិ បានព្យាយាមផ្ដល់កម្លាំងចិត្តដល់ ស្រីពេជ្រ ជាខ្លាំង ដើម្បីកុំឲ្យនាងគិតខ្លី ម្ដងទៀត។ ទោះបីមានការផ្ដល់កម្លាំងចិត្តបែបណាក្ដី ក៏ស្រីពេជ្រ នៅតែមានបំណងចង់សម្លាប់ខ្លួនម្ដងទៀត។ ៣ ខែ ក្រោយពីលោតទឹកសម្លាប់ខ្លួនលើស្ពាន ជ្រោយចង្វា តារាស្រីម្នាក់នេះ បានលួចលេបថ្នាំសម្លាប់ខ្លួនម្ដងទៀត ដោយនាងបានលេបឆ្នាំសម្លាប់សត្វល្អិត អស់ ១ កំប៉ុង ឯណោះ។ ម្ដងនេះ បើមិនមានអ្នកដឹងទេ ស្រីពេជ្រ ច្បាស់ជាស្លាប់ដូចបំណងជាក់ជាមិនខាន ប៉ុន្តែ ការប៉ងរបស់នាងនៅតែមិនអាចបានសម្រេចដដែល ឪពុកបានដឹង ហើយក៏បាននាំទៅសង្គ្រោះនៅមន្ទីរពេទ្យ ទាន់ពេលវេលា រួចផុតជីវិត ម្ដងទៀត។

ស្រីពេជ្រ ប្រាប់ថា ទោះបីជា ការជួយសង្រ្គោះរបស់ក្រុមគ្រូពេទ្យ ធ្វើឲ្យនាងរស់រានមានជីវិតវិញបែបណាក្ដី ប៉ុន្តែបំពង់ក របស់នាងមិនអាចវិលមកសភាពដើមវិញឡើយ សម្លេងរបស់នាងបានប្រែមកជាសម្លេងដូចមនុស្សប្រុស រហូតមកដល់បច្ចុប្បន្ន។ ពេលនិយាយចេញម្ដង គ្រប់គ្នាដែលបានស្ដាប់ គិតថា នាង គឺជា ភេទទី ៣ ទើបតែកែភេទ។

ដោយមានការផ្ដល់កម្លាំងចិត្តពីក្រុមគ្រួសារកាន់តែខ្លាំងឡើងៗ ហើយគិតថា អ្វីគ្រប់យ៉ាងដែលនាងបាត់បង់ទៅហើយ មិនអាចត្រឡប់មកវិញ និង មិនចង់ធ្វើបាប ក្រុមគ្រួសារទៀត ស្រីពេជ្រ បានប្ដូរចិត្តឈប់សម្លាប់ខ្លួន ដោយគិតតែធ្វើរឿងសប្បាយៗដាក់ក្នុងខ្លួនតែប៉ុណ្ណោះ។

ចាប់ទាំងពីពេលនោះមក កញ្ញា ហេង ស្រីពេជ្រ ចាប់អាជីពជាអ្នកសិល្បៈសាជាថ្មី មុនចេញទៅអាមេរិក តារាស្រីម្នាក់នេះ ធ្លាប់បានថតរឿងច្រើនមកហើយ មានដូចជា រឿងទឹកចិត្តគ្រូបង្រៀន, ធ្វើអ្វីៗដើម្បីស្នេហ៍, រាត្រីរនោច ជាដើម។ ប៉ុន្តែ ក្រោយពីនាងមកចាប់អាជីពសិល្បៈជាថ្មីវិញ តារាស្រីសម្បូរស្នេហ៍ម្នាក់នេះ មានឱកាសបានថតរឿង ខារ៉ាអូខេ និង ស្ប៉តពាណិជ្ជកម្មជាបន្តបន្ទាប់។

កញ្ញា ហេង ស្រីពេជ្រ បានប្រាប់ឲ្យដឹងថា រឿងដែលនាងបានថត បន្ទាប់ពីចាប់អាជីពសិល្បៈវិញមាន ដូចជា ទឹកចិត្តបងស្រី, គូស្នេហ៍ចៃដន្យ, ផ្កាក្នុងផ្កា, ម្ដាយក្មេករើសកូនប្រសា, សន្យាស្នេហ៍, បេះដូងក្របី, ព្រហ្មលិខិត, នំត្នោតផ្ដើមស្នេហ៍, ទេវរូបចេះនិយាយ, ប្រាក់ក៏បាត់ជីវិតក៏បង់, ដងស្ទឹងទន្ទឹមចាំស្នេហ៍, មឺនុយធ្នាក់អន្ទាក់ស្នេហ៍, គំនុំស្នេហ៍អតីតជាតិ, ព្រហ្មចារី , សង្សារខ្មោច, និង រឿងស្នេហ៍ពនេចរ ជាដើម។ ផ្នែក ខារ៉ាអូខេ និង ស្ប៉តពាណិជ្ជកម្ម នាងក៏បានថតជាច្រើនផងដែរ។ ឆាប់ខាងមុខនេះ តារាស្រីដែលត្រូវប៉ាន់តែតួជំទាវ បងស្រី នឹង ម្ដាយនោះ កំពុងតែត្រៀមថត រឿង ២ ទៀត ឲ្យស្ថានីយទូរទស្សន៍ CTN ប៉ុន្តែ មិនទាន់ដឹងចំណងជើងនៅឡើយ។

ចំពោះរឿងចង់សម្លាប់ខ្លួន កញ្ញា ហេង ស្រីពេជ្រ មិនឲ្យមានជាលើកទី ៣ ទៀត ហើយ តារាស្រីម្នាក់នេះ បាននិយាយថា លើលោកនេះ គ្មានអ្នកណាល្អជាង ឪពុក-ម្ដាយ និង បងប្អូននាងឡើយ ចាប់ពីពេលនេះទៅ នាងខិតខំធ្វើអ្វីគ្រប់យ៉ាង ដើម្បីឲ្យក្រុមគ្រួសារនាងសប្បាយចិត្ត។ អ្វីគ្រប់យ៉ាង ដែលនាងបានបាត់បង់នោះ នាងគិតថា ជាការជំពាក់របស់នាងពីជាតិមុន និង គ្រាន់តែជាសុបិនអាក្រក់មួយ ប៉ុណ្ណោះ៕
ប្រភព: sabay

មុន បន្ទាប់

មតិយោបល់