feat Shakira ត្រៀមឡើងឆាកបិទកម្មវិធី World Cup

feat Shakira ត្រៀមឡើងឆាកបិទកម្មវិធី World Cup

តារាចម្រៀងកូឡុំប៊ី Shakira វ័យ ៣៧ឆ្នាំ ជាកំណាន់ចិត្តរបស់ ជាខ្សែការពារដ៏ល្អ វ័យត្រឹម ២៧ឆ្នាំ Gerard Pique របស់អតីតម្ចាស់ជើងឯកបាល់ទាត់ពិភពលោក កាលពី២០១០ ដែលត្រឡប់ទៅផ្ទះវិញតាំងពីវគ្គជម្រុះក្នុងពូល៣២ ក្រុម ត្រៀមខ្លួនរួចជាស្រេចហើយថានឹងទៅសម្ដែងក្នុងកម្មវិធីរបស់ការប្រកួត World Cup វគ្គផ្ដាច់ព្រ័ត្រ (បិទកម្មវិធី) នៅទីក្រុង Rio de Janeiro ប្រទេសប្រេស៊ីល នៅថ្ងៃទី១៣ ខែកក្កដា ជាមួយកំពូលអ្នកលេងហ្គីតា Carlos Santana និងតារាចម្រៀងរ៉េប Wyclef Jean។

ការសម្ដែងនៅ World Cup ឆ្នាំនេះ តារាចម្រៀង Shakira នឹងច្រៀងបទចម្រៀង “La La La” ជាភាសាប្រេស៊ីល ជាមួយតារាចម្រៀងប្រេស៊ីល Carlinhos Brown។ នេះបើយោងតាមការបញ្ជាក់របស់សហព័ន្ធកីឡាបាល់ទាត់អន្តរជាតិ FIFA កាលពីថ្ងៃពុធកន្លងទៅ។

តារាស្រីវ័យ ៣៧ឆ្នាំ ដ៏មានប្រជាប្រិយភាព Shakira ដែលមានសមត្ថភាពឆ្លើយតបទៅនឹងលក្ខខណ្ឌរបស់FIFA បានបង្ហាញក្ដីរំភើបបែបនេះ “ព្រឹត្តិការណ៍បាល់ទាត់ពិភពលោក ពិតជាបានផ្លាស់ប្ដូរជីវិតរបស់ខ្ញុំ”។ បើមិនមានWorld Cup ទេ នាងនិងកូនពិតជាមិនមានវត្តមាននៅប្រេស៊ីលទេ។ នាងបន្ថែម។

អាន៖ Shakira ច្រៀង World Cup ៣ ជំនាន់ តាំងពីនៅលីវ រហូតមានកូន១

តារាស្រីដែលជាសង្សារកីឡាករក្រុមអេស្ប៉ាញ Gerard Pique បាននិយាយដោយរំភើបថា “ខ្ញុំពិតជារំភើបណាស់ដែលមានឱកាសទៅច្រៀងបទ ‘La La La’ ក្នុងកម្មវិធីរបស់ World Cup ឆ្នាំ២០១៤នេះ។ ខ្ញុំពិតជាមាននិស្ស័យជាមួយបាល់ទាត់មែនទែន ហើយខ្ញុំដឹងថាបាល់ទាត់ពិតជាមានន័យសម្រាប់មនុស្សជាច្រើនលើពិភពលោក រួមទាំងខ្ញុំផងដែរ”។

បន្ទាប់ពីបញ្ជីឈ្មោះ៤ក្រុមជែងគ្នា ធ្វើជាម្ចាស់ពាន ជាក់ស្ដែងលទ្ធផលក្រោយ ហុល្លង់លត់ប្រេស៊ីលយប់មិញ ៣-០ បានញែកច្បាស់ហើយថា ម្ចាស់ផ្ទះប្រេស៊ីលដែលល្បីថាខ្លាំងៗនោះ បានត្រឹមលេខ៤ បន្ទាប់ពីពីរប្រកួតចុងក្រោយចាញ់អាល្លឺម៉ង់ក្នុងដីឯងយ៉ាងអាម៉ាស់រហូតដល់ ៧-១ មិនធ្លាប់មានក្នុងប្រវត្តិសាស្ត្រ។

ដោយឡែកសម្រាប់ជើងឯង និងជើងឯករង កំពុងស្ថិតក្នុងការព្យាការណ៍ពីសំណាក់ប្រិយមិត្តបាល់ទាត់រាប់លាននាក់ទូទាំងសាកលលោក រវាងជើងខ្លាំងក្នុងតំបន់ម្ចាស់ផ្ទះ គឺ អាហ្សង់ទីន និងមួយក្រុមទៀតមកពីអឺរ៉ុប ប៉ុន្តែយ៉ាងណាមិញ លទ្ធផលកាត់សេចក្ដីថាក្រុមណាខ្លាំងពិតប្រាកដនោះនឹងបង្ហាញក្នុងយប់រំលងអាធ្រាតនេះ។

តារាចម្រៀងជនជាតិកូឡុំប៊ី Shakira ដែលតែងតែកំដរអារម្មណ៍អ្នកគាំទ្របាល់ទាត់ជុំវិញពិភពលោក ៣ លើកជាប់គ្នាគឺ ឆ្នាំ ២០០៦ នៅអាល្លឺម៉ង, ២០១០ នៅអាហ្វ្រិចខាងត្បូង និង ២០១៤ (ប្រេស៊ីល)។