កំពូលសិស្សសាវលីងទាំង២ ទៅដល់ណាហើយ?

កំពូលសិស្សសាវលីងទាំង២ ទៅដល់ណាហើយ?

ជឿជាក់ថាប្រិយមិត្តនៅចាំបានចំពោះតួអង្គកុមារទាំង២រូប ដែលសម្ដែងជាកូនសិស្សវត្តសាវលីងជាច្រើនរឿង ក្នុងអំឡុងទសវត្ស ៩០។ ថ្វីបើកាលនោះពួកគេមានវ័យក្មេង ប៉ុន្តែសមត្ថភាពសម្ដែងរបស់ពួកគេគឺមិនធម្មតាឡើយ ដែលធ្វើឲ្យអ្នកទស្សនាហើយកោតសរសើរគ្រប់ៗគ្នា។ ក្នុងនោះមានម្នាក់រាងធាត់ ឈ្មោះ Shao Wen (សៀវវិន) គឺជាតួអង្គកំប្លែងដែលពូកែបំផុតខាងលេងល្បិចបោកប្រាស់អ្នកដទៃ។ ចំណែកម្នាក់ទៀតឈ្មោះ Xiaolong (សៀវឡុង) មិនសូវកំប្លែងទេ ប៉ុន្តែពូកែខាងក្បាច់គុន វាយមិនចាញ់មនុស្សធំឡើយ។

ចុះឥលូវនេះពួកគេទៅណាហើយ? នៅបន្តអាជីពសម្ដែងទៀតឬយ៉ាងណា? តោះ! តាមដានជាមួយ Sabay ទាំងអស់គ្នា!

១. Hao Shao Wen (ឈ្មោះដើម Siu-Man Fok )

ថ្ងៃខែឆ្នាំកំណើត៖ ៤ មិថុនា ១៩៩០

ថ្វីបើ Shao Wen ទទួលបានការគាំទ្រខ្លាំងពេលនៅក្មេង ប៉ុន្តែគេមិនបានបន្តអាជីពសម្ដែងឡើយនៅពេលធំដឹងក្ដី។ Shao Wen ឬSiu Man Fok បានចាប់ផ្ដើមអាជីពសម្ដែងតាំងពីគេមានអាយុ ៣ឆ្នាំ ប៉ុន្តែក៏បានឈប់ទៅវិញនៅឆ្នាំ២០០៣ ដើម្បីទុកពេលសម្រាប់ការសិក្សា។ Fok រួមជាមួយដៃគូរបស់គេបានសម្ដែងក្នុងភាពយន្តល្បីៗជាច្រើនក្នុងអំឡុងទសវត្ស ៩០ដូចជា “Shaolin Popey”, “Super Mischievous”,”Dragon from Shaolin”, …។ នៅឆ្នាំ២០០៨ គេបានចូលរៀននៅសាកលវិទ្យាល័យ Tamkang របស់តៃវ៉ាន់។ ប៉ុន្តែដល់ឆ្នាំ២០១១ គេក៏បានបង្ហាញខ្លួនក្នុងភាពយន្តមនោសញ្ចេតនាបែបយុវវ័យមួយគឺរឿង “You Are the Apple of My Eye”។ នៅពេលនោះដែរ គេបានសម្រកទម្ងន់ដោយជោគជ័យ ពី ៩៨ មក ៧៨គីឡូក្រាម។ មកដល់ពេលនេះគេមិនមានឈ្មោះល្បី និងរូបរាងគួរឲ្យក្នាញ់ដូចមុនឡើយ ប៉ុន្តែកុមារភាពរបស់គេគឺជាការចងចាំមិនអាចបំភ្លេចបានសម្រាប់អ្នកទស្សនាជាពិសេសក្មេងៗសម័យនោះ។

២. Shi Xiaolong (ឈ្មោះដើម Ashton Chen និង Chen Xiaolong)

ថ្ងៃខែឆ្នាំកំណើត៖ ៦ មករា ១៩៨៨

ចំណែក សៀវឡុង គឺនៅតែបន្តអាជីពសម្ដែងជាធម្មតា។ Aston Chen ឬ Shi Xiaolong ដែលមានឈ្មោះដើមថា Chen Xiaolong មានកំណើតនៅខេត្ត Henan និងបានចាប់ផ្ដើមរៀនក្បាច់គុនតាំងពីមានអាយុ ២ឆ្នាំ ពីឪពុករបស់គេឈ្មោះ Shi Yongxin។ Chen បានសម្ដែងជាតួសង្ឃតូចក្នុងខ្សែភាពយន្តដំបូងរឿង “Shaolin Popey” ជាមួយតារាសម្ដែងតៃវ៉ាន់ Jimmy Lin និងដៃគូរបស់គេគឺ Siu-Man Fok នៅឆ្នាំ១៩៩៣។ លុះដល់ឆ្នាំ២០០៥ Chen បានទៅបន្តការសិក្សានៅសហរដ្ឋអាមេរិក និងបានត្រលប់មកវិញក្នុងឆ្នាំ២០០៨ ហើយក៏បានបន្តអាជីពសម្ដែងរបស់គេជាហូរហែបន្តទៀត ជាមួយតួល្បីៗដូចជា Ng Man Tat, Kenny Bee, Takeshi Kaneshiro និង Ha Ling Chunជាដើ។ នៅឆ្នាំ២០១០ គេបានចូលរួមសម្ដែងជាកូនសិស្សម្នាក់ក្នុងខ្សែភាពយន្ត “Ip Man 2”។ នៅឆ្នាំ២០១៤នេះ គេបានលេចមុខជាតួសំខាន់ម្នាក់ក្នុងខ្សែភាពយន្ត “Urban Games”។