CNN៖ យន្តហោះមួយគ្រឿង របស់ក្រុមហ៊ុន អាកាសចរណ៍ឌែលតា (Delta) បានជ្រុះបាត់ បំណែកមួយនៃស្លាបមួយចំហៀង របស់វា ពេលកំពុងធ្វើដំណើរពី អ័រឡេនដូ ទៅកាន់ អាត្លង់តា កាលពីថ្ងៃ អាទិត្យ ទី១៦ ខែមីនា ប៉ុន្តែវាបានចុះចត ប្រកបដោយសុវត្ថិភាព។

អ្នកនាំពាក្យក្រុមហ៊ុន ឌែលតា លោក អាន់ថូនី ប្លេក បាននិយាយថា “ក្រុមអាកាសយានិកនៅ លើជើងហោះហើយ ២៤១២ បានរាយការណ៍ថា ផ្នែកនៃស្លាបមួយ ក្នុងចំណោមស្លាបទាំងពីរ របស់យន្តហោះបានរបូតចេញ ស្របពេលដែលវាកំពុង ហោះហើរ។”

គួរបញ្ជាក់ថា យន្តហោះខាងលើនេះ មានមនុស្សជិះសរុប ១៨៥ នាក់ដោយក្នុងនោះ ១៧៩នាក់ ជាអ្នកដំណើរ និង ៦នាក់ ទៀតជាអ្នកបម្រើការងារលើយន្តហោះ។ យន្តហោះបានចុះចត ដោយសុវត្ថិភាព នៅព្រលានយន្តហោះអន្តរជាតិ ហាតស៍ ហ្វៀល ចេកសុន នៃរដ្ឋអាត្លង់តា ប្រកបដោយសុវត្ថិភាព។

ចំពោះមូលហេតុ នៃការជ្រុះផ្នែកមួយនៃស្លាបយ្តហោះ មិនត្រូវបានក្រុមជំនាញ បញ្ជាក់ឲ្យដឹង នោះទេ តែវាអាចបណ្តាលមក ពីភាពចាស់នៃយន្តហោះ ប៊ូអ៊ីង ៧៥៧ នោះ។ ទោះបីជាយ៉ាង ណាក៏ដោយ ការជ្រុះផ្នែកមួយស្លាប មិនបាននាំឲ្យប៉ះពាល់ដល់ ការហោះហើរ របស់យន្តហោះ នោះឡើយ៕