ពិភពលោកទាំងមូលនឹងផ្តោតលើ World Cup វគ្គផ្តាច់ព្រ័ត្រ ឯនៅភ្នំពេញក៏នឹងកក្រើកពេញមួយយប់នៅមុខវត្តឧណ្ណាលោមដែរ

ពិភពលោកទាំងមូលនឹងផ្តោតលើ World Cup វគ្គផ្តាច់ព្រ័ត្រ ឯនៅភ្នំពេញក៏នឹងកក្រើកពេញមួយយប់នៅមុខវត្តឧណ្ណាលោមដែរ

សាលាក្រុងភ្នំពេញបានអនុញ្ញាតឲ្យមានការរៀបចំពិធីអធិកអធមមួយនៅមុខវត្តឧណ្ណាលោមដើម្បីឲ្យអ្នកភ្នំពេញចូលរួមទស្សនាការប្រកួតបាល់ទាត់ពិភពលោកវគ្គផ្តាច់ព្រ័ត្ររវាងក្រុមអាហ្សង់ទីន និងអាល្លឺម៉ង់នៅរាត្រីថ្ងៃអាទិត្យ ទី១៣ ខែកក្កដា ចុងសប្ដាហ៍នេះ។

លោក ឡុង ឌីម៉ង់ អ្នកនាំពាក្យសាលា រាជធានីភ្នំពេញបានប្រាប់ Sabay មុននេះបន្តិចថា សាលារាជធានភ្នំពេញបានអនុញ្ញាតឲ្យសហភាព សហព័ន្ធយុវជនរាជធានីរៀបចំពិធីមួយដើម្បីអបអរសាទរ និងទស្សនាការប្រកួតបាល់ទាត់ពិភពលោកក្នុងវគ្គផ្ដាច់ព្រ័ត្រ រវាងក្រុមអាហ្សង់ទីន និងអាល្លឺម៉ង់។

ពិធីទស្សនាការប្រកួតវគ្គផ្តាច់ព្រ័ត្រនេះមានឈ្មោះថា ៖«កម្មវិធីគ្រួសារបាល់ទាត់ពិភពលោក»ដែលនឹងត្រូវចាប់ផ្តើមពីម៉ោង៩យប់ដល់ម៉ោង៥ទៀបភ្លឺនៅសួនច្បារតេជោមាស តេជោយ៉ត មាត់ទន្លេ ខាងមុខវត្តឧណ្ណាលោម ។

អ្នកនាំពាក្យសាលាក្រុងបាននិយាយថា ៖«កម្មវិធីកម្សាន្តនារាត្រីថ្ងៃអាទិត្យនេះមានច្រើនមុននឹងការប្រកួតចូលមកដល់នៅវេលាម៉ោង២រំលងអាធ្រាត្រដូចជា ការប្រគំតន្ត្រី ការទាត់បាល់បញ្ចូលទីដើម្បីយករង្វាន់ ការលេងល្បែងកម្សាន្ត និងសកម្មភាពជាច្រើនទៀត»។ សាលាក្រុងអនុញ្ញាតឲ្យធ្វើនេះគឺដើម្បីចូលរួមអបអរសាទរការប្រកួតវគ្គផ្តាច់ព្រ័ត្រនៃព្រឹត្តិការណ៍បាល់ទាត់ពិភពលោកឆ្នាំ២០១៤។

ជុំវិញការអនុញ្ញាតឲ្យរៀបចំនៅខាងមុខវត្តឧណ្ណាលោមដែលជាអារាមសម្ដេចព្រះអគ្គមហាសង្ឃរាជ ទេព វង្ស គង់នៅ លោក ឡុង ឌីម៉ង់បានបញ្ជាក់ថា នៅសួនច្បារមាត់ទន្លេខាងមុខវត្តឧណ្ណាលោមជាកន្លែងសំបូរប្រជាពលរដ្ឋ និងភ្ញៀវទេសចរដើរឆ្លងកាត់ច្រើនដែលពួកគាត់ងាយចូលរួមទស្សនា។ លោកបញ្ជាក់ថា ៖«យើងទទួលបានព្រះរាជានុញ្ញាតពីសម្ដេចព្រះអគ្គមហាសង្ឃរាជរួចហើយ ដូច្នេះគ្មានអ្វីជាបញ្ហាទេ»។

ការប្រកួតវគ្គផ្តាច់ព្រ័ត្ររវាងក្រុមជម្រើសជាតិអាល្លឺម៉ង់ និងអាហ្សង់ទីនដើម្បីស្វែងរកម្ចាស់ជើងឯកបាល់ទាត់ពិភពលោកឆ្នាំ២០១៤នឹងចាប់ផ្តើមប្រកួតនៅវេលាម៉ោង២រំលងអាធ្រាត្រថ្ងៃអាទិត្យ ទី១៣ឈានចូលថ្ងៃទី១៤ ខែកក្កដា ឆ្នាំ២០១៤នៅកីឡដ្ឋានEstadio do Maracana នៅទីក្រុង Rio De Janeiro ប្រទេសប្រេស៊ីល៕

germany
ក្រុមអាល្លឺម៉ងកាលឈ្នះប្រេស៊ីល៧-១