រថយន្តពន្លត់អគ្គិភ័យខណ្ឌទួលគោកខុសបច្ចេកទេស បូមទឹកអត់ចេញ ពលរដ្ឋឡើងដំបូងផ្ទះបាញ់ ពន្លត់ទុស្សេឆេះបង្គោលភ្លើងខ្លួនឯង

រថយន្តពន្លត់អគ្គិភ័យខណ្ឌទួលគោកខុសបច្ចេកទេស បូមទឹកអត់ចេញ ពលរដ្ឋឡើងដំបូងផ្ទះបាញ់ ពន្លត់ទុស្សេឆេះបង្គោលភ្លើងខ្លួនឯង

រាជធានីភ្នំពេញ ៖ ប្រជាពលរដ្ឋនៅម្តុំអគ្គនាយកដ្ឋានកសិកម្ម មានការមិនពេញចិត្តជាខ្លាំង ខណៈរថយន្តពន្លត់អគ្គិភ័យ របស់ខណ្ឌទួលគោក១គ្រឿង ដែលបានមកបាញ់ពន្លត់ ការទុស្សេចរន្តអគ្គិសនីឆេះ បង្គោលភ្លើង១នៅចំណុចនោះ តែរថយន្តពន្លត់អគ្គិភ័យបែរជា ខុសបច្ចេកទេសបូមទឹកអត់ចេញទៅវិញ ធ្វើឲ្យប្រជាពលរដ្ឋភ័យ ស្លន់ស្លោរនាំគ្នារត់ឡើងលើដំបូងផ្ទះប្រើ បំពង់ពន្លត់អគ្គិភ័យបាញ់ពន្លត់ រហូតរលត់ទៅវិញនៅម៉ោង៩យប់ថ្ងៃដដែល ដែលហេតុការណ៍ ទុស្សេចរន្តអគ្គិសនីបង្គោលភ្លើង រហូតបង្កជាអណ្ដាតភ្លើង នេះកើតឡើងកាល ពីវេលាម៉ោង៨ និង៣០នាទីយប់ថ្ងៃទី៧ ធ្នូ ២០១៥ នៅចំណុចបង្គោលភ្លើង មួយកន្លែង នៅផ្លូវបេតុងច្រកចូលអគ្គនាយកដ្ឋានកសិកម្ម ស្ថិតក្នុងសង្កាត់ទឹកល្អក់៣ ខណ្ឌទួលគោក ។

ប្រភពពីកន្លែងកើតហេតុបានឲ្យដឹងថា ខណៈពេលដែលទុស្សេចរន្តអគ្គិសនីបង្កជាអណ្ដាតភ្លើងឆាបឆេះបង្គោលភ្លើង ១កន្លែង ខាងលើនេះ គេឃើញរថយន្ត ពន្លត់អគ្គិភ័យរបស់ខណ្ឌ ទួលគោក១គ្រឿងមកជួយ បាញ់ពន្លត់ដែរ តែខណៈមកដល់ រថយន្តពន្លត់អគ្គិភ័យ នេះហាក់ខុសបច្ចេកទេសម៉េចមិនដឹងទេ បែរជាបូមទឹកមិនចេញ ធ្វើឲ្យមិនអាចបាញ់ទឹកពន្លត់បាន ជាហេតុធ្វើឲ្យប្រជាពលរដ្ឋ ដែលរស់នៅម្ដុំនោះមានការភ័យស្លន់ស្លោរខ្លាចអគ្គិភ័យ ឆេះកាន់តែខ្លាំង និងរាលដាលដល់ផ្ទះ ប្រជាពលរដ្ឋ ហើយក៏នាំគ្នារត់ឡើង លើដំបូលផ្ទះប្រើ បំពង់ពន្លត់អគ្គិភ័យបាញ់ពន្លត់រហូតរលត់ ទាំងស្រុងទៅវិញ ។

ប្រជាពលរដ្ឋបាននាំគ្នាធ្វើការរិះគន់ត្រង់ៗចំពោះក្រុមពន្លត់អគ្គិភ័យខណ្ឌទួលគោកថា ខ្វះសមត្ថកិច្ចក្នុងការជួយ សង្គ្រោះ ហេតុការណ៍អគ្គិភ័យ នេះឆេះបង្គោលភ្លើង បើសិនជាឆេះផ្ទះវិញ មិនដឹងជាអស់ ប៉ុន្មានខ្នងទេ បើឡានទឹកមកដល់ ហើយបែរជាខុសបច្ចេកទេស បូមទឹកអត់ចេញទៅវិញចឹងនោះ ៕