អំពើហិង្សារវាងពួកអ្នកកាន់ពុទ្ធសាសនានិងពួកអ៊ិស្លាមនៅភូមាស្លាប់2នាក់

អំពើហិង្សារវាងពួកអ្នកកាន់ពុទ្ធសាសនានិងពួកអ៊ិស្លាមនៅភូមាស្លាប់2នាក់

ក្រុមមនុស្សដែលមានកំហឹងលើកគ្នាទៅវាយប្រហារ

ប្រភពព័ត៌មានប៉ូលិសរាយការណ៍កាលពីថ្ងៃទី៣ កក្កដា ថា មនុស្ស២នាក់បានត្រូវស្លាប់នៅភូមាដោយសារអំពើហិង្សាថ្មីៗរវាងពួកអ្នកកាន់ពុទ្ធសាសនានិងពួកអ៊ិស្លាមនៅទីក្រុងម៉ាន់ដាឡៃភាគកណ្តាលប្រទេស ។ក្នុងអំពើហិង្សាទាំងនេះដែលកើតមានក្រោយការវាយប្រហារហាងអ៊ិស្លាមមួយដែលម្ចាស់ហាងទទួលការចោទប្រកាន់ថាចាប់រំលោភ បណ្តាលឱ្យមនុស្សស្លាប់២នាក់ ។

គេពុំបានផ្តល់ភាពលម្អិតពីអត្តសញ្ញាណជនរងគ្រោះ ឬថាតើពួកគេស្លាប់បែបណានោះឡើយ ។ ការសម្លាប់មនុស្សនោះកើតមានកាលពីយប់ថ្ងៃទី១ កក្កដា ពេលដែលមនុស្សជាច្រើនរយនាក់ ភាគច្រើនកាន់ដុំថ្មវាយប្រហារលើហាងនោះរបស់ពួកអ៊ិស្លាម លើអគារឯទៀតៗ ព្រមទាំងដុតរថយន្ត១គ្រឿងផងដែរ ។ ប៉ូលិសបានប្រើគ្រាប់កៅស៊ូដើម្បីបំបែកមនុស្សទាំងនេះដែលកាន់ដុំថ្ម ដំបង និងកាំបិត ។

ប្រមុខប៉ូលិសក្រុងម៉ានដាឡៃជាទីក្រុងធំទី២របស់ប្រទេសលោក ZAW WIN AUNG ដកស្រង់សម្តីដោយកាសែតរដ្ឋ NEW LIGHT OF MYANMAR អះអាងថា យើងស៊ើបអង្កេតលើការសម្លាប់មនុស្សនោះ ហើយយើងនឹងចាត់វិធានការនានាប្រឆាំងពួកអ្នកដែលជាប់ទាក់ទិន ។ប្រទេសភូមាចាប់តាំងពីឆ្នាំ២០១២មកជួបប្រទះនឹងរលកនៃអំពើហិង្សារវាងពួកអ្នកកាន់ពុទ្ធសាសនា និងពួកអ៊ិស្លាម ដែលបណ្តាលឱ្យមនុស្សស្លាប់ជាង២៥០នាក់ ហើយមនុស្ស១៤០.០០០នាក់រត់ភៀសខ្លួនពិសេសពួកអ៊ិស្លាម ។

ការបះបោរនានាចាប់ផ្តើមដំបូងនៅរដ្ឋរ៉ាឃីនភាគខាងលិចប្រទេសរវាងពួកអ្នកកាន់ពុទ្ធសាសនានៃជនជាតិភាគតិចរ៉ាឃីន និងពួកអ៊ិស្លាមនៃជនជាតិភាគតិចរ៉ូហ៊ីញយ៉ា បណ្តាលឱ្យមនុស្សស្លាប់យ៉ាងតិច២០០នាក់ ក្នុងរលកនៃការវាយប្រហារ២កាលពីឆ្នាំ២០១២ ។
អំពើហិង្សាប្រឆាំងពួកអ៊ិស្លាមបន្ទាប់មកផ្ទុះនៅក្នុងតំបន់ជាច្រើនរបស់ប្រទេសបណ្តាលឱ្យមានមនុស្សរត់ភៀសខ្លួនយ៉ាងច្រើន រួចមនុស្សជាច្រើនសិបនាក់ស្លាប់កាលពីខែមីនាឆ្នាំ២០១៣ នៅទីក្រុង MEIKTILA ចម្ងាយ១០០គីឡូម៉ែត្រពីទីក្រុងម៉ាន់ដាឡៃ ៕

ប្រភព: កោះសន្តិភាព

មុន បន្ទាប់

មតិយោបល់