ទឹម រដ្ឋា បើកចំហគូស្នេហ៍ឆ្លងសាសន៍ តែរឿងរៀបការនៅរារែក

ទឹម រដ្ឋា បើកចំហគូស្នេហ៍ឆ្លងសាសន៍ តែរឿងរៀបការនៅរារែក

រាជធានីភ្នំពេញ ៖ កន្លងមកតារាសម្តែង និងតារាម៉ូដែល ទឹម រដ្ឋា មិនហា៊នបើកចំហពីរចំណងស្នេហ៍ខុសសាសន៍រវាងនាង និងសង្សារជនជាតិបា៉គីស្ថានទេ ។ ទឹម រដ្ឋា បានធ្វើឱ្យគេយល់ច្រឡំដោយបង្វែងដានឱ្យសង្សារទៅស្និទ្ធស្នាលជាមួយប្អូនស្រី ទឹម វត្តី វិញ តែក្រោយមកទើបគេដឹង ។ កាន់តែច្បាស់លាស់ ព្រោះទីបំផុត រដ្ឋា បានទទួលស្គាល់ថា បុរសបា៉គីស្ថាននោះជាសង្សាររបស់នាងយូរមកហើយ ប៉ុន្តែអត់ទាន់សម្រេចចិត្តរៀបការទេ ព្រោះទើបតែយល់ចិត្តគ្នា៥០%ប៉ុណ្ណោះ ។

ក្នុងឱកាសបង្ហាញរោងភាពយន្ត Major Cineplex ក្នុងផ្សារទំនើបអីុនអន កាលពីរាត្រីថ្ងៃទី៣០ មិថុនា ២០១៤ នាងទឹម រដ្ឋា បានធ្វើឱ្យគេឯងចាប់អារម្មណ៍ដោយនាងគ្រងសម្លៀកបំពាក់សិចស៊ីអាវវាលក្លៀក និងចំហក្បាល ពោះ ។ លើសពីនោះនាងបណ្តើរគូស្នេហ៍បា៉គីស្ថាន ព្រមទាំងអនុញ្ញាតឱ្យអ្នកសារព័ត៌មានជាច្រើននាក់ថតរូបភាពពួកគេដោយមិនលាក់បាំងដូចមុនទៀតឡើយ ។ ស្រីស្អាតទឹម រដ្ឋា បញ្ជាក់ថា នាងនិងសង្សារជនជាតិបា៉គីស្ថានស្គាល់គ្នាជាង៤ឆ្នាំមកហើយទម្រាំសម្រេចចិត្តឱ្យគេដឹងជាសាធារណៈ ។ ពួកនាងស្រលាញ់គ្នាក្នុងនាមជាសង្សារនៅឡើយ មិនទាន់កំណត់ពេលចូលស្តីដណ្តឹង ឬរៀបមង្គលការទេ ដ្បិតស្គាល់គ្នាយូរឆ្នាំមែន តែសម្រាប់ភាគរយនៃការយល់ចិត្តគ្នាទើបតែបាន៥០% ប៉ុណ្ណោះ ។
រីឯសង្សាររបស់រដ្ឋា បញ្ជាក់ថា លោកមិនទាន់ហា៊នកំណត់ពេលចូលរោងការទេ ។

បើពួកគេដឹកដៃគ្នាចូលរោងការជាគូអនាគតមែននោះអាជីពសិល្បៈរបស់ទឹម រដ្ឋា គឺលោកនៅតែផ្តល់ឱកាសជូននាងដដែល ប៉ុន្តែមានកម្រិត អត់ដូចពេលនៅខ្លួនមួយទេ ព្រោះលោកយល់ពីទឹកចិត្តស្រលាញ់សិល្បៈរបស់នាង ។ សម្រាប់ទឹម រដ្ឋា អះអាងថា ប្រសិនជាថ្ងៃក្រោយពួកនាងរៀបការជាមួយគ្នា ចំពោះអាជីពសិល្បៈប្រសិនជាអាចនាងនឹងបន្ត ។ តារាបង្ហាញម៉ូដដែលមើលរំលងបុរសរួមសាសន៍ខ្លួនឯងនេះនិយាយថា «នាងខ្ញុំមិនទាន់ហា៊នប្រថុយរឿងរៀបការឆាប់ពេក មកពីគិតថាមនុស្សស្រីមានតម្លៃណាស់រឿងគូអនាគត បើរើសគូត្រូវតែត្រិះរិះពិចារណាឱ្យបានល្អិតល្អន់ច្បាស់លាស់បំផុត ព្រោះគ្មានមនុស្សស្រីណាចង់បានប្តីមួយ ហើយមួយហើយមួយទៀតទេ ។

ដូច្នេះហើយទើបនាងខ្ញុំមិនទាន់សម្រេចចិត្តលឿនពេក ទោះជានាងខ្ញុំស្គាល់គាត់យូរបែបណាក្តីហើយមានអ្នកខ្លះគិតថា ល្មមរៀបការក៏ដោយ ក៏នាងខ្ញុំនៅតែមិនទាន់ហា៊នសម្រេចទេ ។ នាងខ្ញុំទទួលស្គាល់ថា ប្តីប្រពន្ធខ្លះគេស្គាល់គ្នា៤ ឬ៥ខែឬ១ឆ្នាំ គេចូលរោងការ នេះជាភ័ព្វនិស្ស័យរបស់មនុស្សម្នាក់ ។ ចំណែកនាងខ្ញុំសុំពេលគិតបន្តទៅទៀតសិន ណាមួយអាជីពសិល្បៈកាន់តែរីកចម្រើន ដូច្នេះពិធីរៀបមង្គលការចាំគិតក្រោយក៏មិនទាន់ហួសពេលដែរ» ៕

កញ្ញា ទឹម រដ្ឋា និងគូស្នេហ៍