ជលផលខេត្តចាប់គ្រឿងចក្រដែលឈូសឆាយរំលោភយកដីបឹងជាង១០០ហិកតានៅស្រុកស្អាង

ជលផលខេត្តចាប់គ្រឿងចក្រដែលឈូសឆាយរំលោភយកដីបឹងជាង១០០ហិកតានៅស្រុកស្អាង

ខេត្តកណ្តាល ៖ កម្លាំងជលផលខេត្ត សហការជាមួយនគរបាលស្រុកស្អាង បានឆ្មក់ចាប់យកគ្រឿងចក្រចំនួន៣គ្រឿង ដែលកំពុងធ្វើការឈូសឆាយរំលោភយកដីបឹងរបស់រដ្ឋ នៅចំណុចអតីតឡូត៍នេសាទលេខ៣ ស្ថិតក្នុងភូមិជ្រោយប្ញស្សី ឃុំប្រាសាទ ស្រុកស្អាង កាលពីព្រឹកថ្ងៃទី០១ មិថុនា ។

លោក សេង ធីម នាយផ្នែករដ្ឋបាលជលផលបាសាក់បានប្រាប់ឱ្យដឹងថា គ្រឿងចក្រដែលកម្លាំងជលផលចាប់យកបានមកនេះ មានអេស្ការវ៉ាទ័រមួយគ្រឿង និងត្រាក់ទ័រ២គ្រឿង ដែលគេស្គាល់ម្ចាស់ឈ្មោះ យ៉ុង សារ៉ាន់ ជាអ្នកជួលគ្រឿងចក្រខាងលើមកឈូសឆាយ លើកទំនប់ព័ទ្ធរំលោភយកដីបឹងរបស់រដ្ឋអតីតឡូត៍នេសាទនៅចំណុចប្រឡាយលេខ៧៥ ក្នុងឡូត៍លេខ៣ ឃុំប្រាសាទ ស្រុកស្អាង ។ ឈ្មោះ យ៉ុង សារ៉ាន់នេះ ជាអ្នកមេការខុសត្រូវក្នុងការឈូសឆាយយកដីរដ្ឋ មានព្រៃលិចទឹកដែលជាជម្រកត្រីពងកូន ដែលផ្ទៃដីកំពុងធ្វើការឈូសឆាយនោះប្រមាណជាង១៤០ហិកតា ។

លោក សេង ធីម បានបញ្ជាក់ថា ក្រោយពីទទួលបានសេចក្តីរាយការណ៍ថា មានគ្រឿងចក្រកំពុងធ្វើការឈូសឆាយរំលោភយកដីរដ្ឋអតីតឡូត៍នេសាទចំណុចខាងលើ សមត្ថកិច្ចជំនាញបានរាយការណ៍ទៅថ្នាក់លើជាបន្តបន្ទាប់ និងសុំគោលការណ៍ដើម្បីចាប់គ្រឿងចក្រនោះ ។ ដោយមានបទបញ្ជាពីលោ ណៅ ធួក ប្រធានរដ្ឋបាលជលផល កម្លាំងជលផលខណ្ឌ ផ្នែក និងសង្កាត់បានសហការជាមួយនគរបាលស្រុកស្អាង ចុះទៅទីតាំងដែលមានគ្រឿងចក្រកំពុងញធ្វើការឈូសឆាយដីព្រៃលិចទឹកនៅអតីតឡូត៍នេសាទលេខ៣ ឃុំប្រាសាទ បានឃើញគ្រឿងចក្រកំពុងធ្វើការឈូសឆាយជាក់ស្តែង ក៏ធ្វើការឃាត់ចាប់យកបានគ្រឿងចក្រមានអេស្ការវ៉ាទ័រចំនួនមួយគ្រឿង និងត្រាក់ទ័រចំនួន២គ្រឿង ដើម្បីនាំយកមករដ្ឋបាលជលផលចាត់ការតាមផ្លូវច្បាប់ ៕
ជលផលខេត្តចាប់គ្រឿងចក្រដែលឈូសឆាយរំលោភយកដីបឹងជាង១០០ហិកតានៅស្រុកស្អាង